ភ្នំពេញៈ អ្នកប្រដាល់ចិត្តធំ សេក គឹមរួន ដែលបាត់មុខយូរពីសង្វៀនបានវិលមកសាងភាពខ្លាំងឡើងវិញដោយ ៣ ប្រកួតចុងក្រោយបានឈ្នះគួរឲ្យកត់សម្គាល់ ហើយនៅរសៀលថ្ងៃអាទិត្យខាងមុខនេះម្ចាស់សង្វៀន SEATV បានផ្តល់ឱកាសឲ្យ គឹមរួន ឡើងប្រកួតអន្តរជាតិជាមួយជើងខ្លាំងថៃ Khun Soeklek ដែលធ្លាប់ឈ្នះ កូយ ឡាយ ដើម្បីឲ្យរូបគេអាចពង្រឹងសមត្ថភាពសាងកេរ្តិ៍ឈ្មោះល្បីឡើងវិញ ខណៈពេលនេះ គឹមរួន បានប្តូរចេញពីក្លិបសឹករងខេត្តសៀមរាបមកនៅសមាគមប្រដាល់ក្រសួងមហាផ្ទៃវិញ។
សេក គឹមរួន ដែលខកខានប្រកួតយូរដោយបញ្ហាសុខភាពផង និងជាប់រវល់ទៅប្រកបមុខរបររត់ម៉ូតូកង់បីផងនោះគឺបានវិលមកប្រកួត ៣ ដងហើយ ដោយទទួលបានលទ្ធផលល្អគួរឲ្យកត់សម្គាល់ដោយគេបានផ្តួលជើងខ្លាំងកម្ពុជា រឿម វណ្ណៈ ឲ្យសន្លប់ត្រឹមទឹកទី ១ បន្ទាប់មកផ្តួលកីឡាករថៃឲ្យសន្លប់ទឹកទី ៤ នៅសង្វៀន SEATV និងចុងក្រោយឈ្នះជើងខ្លាំងថៃ Amak Tak នៅសង្វៀន CNC។
កីឡាករល្អគ្រប់ស្នៀត ចិត្តធំហ៊ានចូលវាយប្តូរបានគ្រប់ស្ថានភាព សេក គឹមរួន ដែលធ្លាប់ប្រកួត ៨៧ ឈ្នះ ៦៩ ចាញ់ ១៦ ស្មើ ២ និងធ្លាប់ឈ្នះជើងឯករងនៅសង្វៀនប៉ុស្តិ៍លេខ ៥ ដោយចាញ់ សុខ សុវណ្ណ នោះ បាននិយាយថា៖ «ជំនួបប្រកួតជាមួយជើងខ្លាំងថៃ Khun Soeklek លើកនេះ ខ្ញុំគិតថាសង្ឃឹមឈ្នះ ៦០ ភាគរយ។ តាមខ្ញុំមើលការប្រកួតរបស់ Khun Soeklek ខ្លាំង ប៉ុន្តែមិនលំបាកដូច Amak Tak ឡើយ តែត្រូវខ្ញុំវ៉ៃឲ្យអាជ្ញាកណ្តាលរាប់មុននឹងចាញ់ខ្ញុំដោយពិន្ទុ»។
ចំណែក Khun Soeklek ធ្លាប់ប្រកួត ៨៥ ឈ្នះ ៦៧ ចាញ់ ១៦ និងស្មើ ២ ដង។ តាមលោក ថាញ់ វ៉ាឡេក ជាគ្រូបង្វឹកនិយាយថា៖ «កម្រិតវិជ្ជាគុនអ្នកទាំង ២ នេះអាចប្រហាក់ប្រហែលគ្នា ប៉ុន្តែបើនិយាយពីទឹកចិត្តប្រកួតវិញ សេក គឹមរួន ចិត្តធំជាងហ៊ានចូលវាយសម្រុកមិនចេះដកថយ។ ហេតុនេះគូនេះមិនអាចវាយតម្លៃពីលទ្ធផលមុនទេគឺវាស៊ីសងពេលប្រកួតជាក់ស្តែងដែលការវាយចេញចំគោលដៅឬយ៉ាងណា គឺវានឹងឃើញលទ្ធផលទាំងអស់គ្នា»។
ក្នុងកម្មវិធីនោះដែរគូចាប់អារម្មណ៍ ១ ទៀតគឺជើងថ្មីខ្ចីវស្សារបស់កម្ពុជា រិន សារ័ត្ន របស់ក្លិបកងទ័ពជើងទឹកត្រូវដាក់ឲ្យជួបជើងខ្លាំងថៃ Loom Leng ក្នុងទម្ងន់ ៦៣,៥ គីឡូក្រាមដែលធ្វើឲ្យអ្នកទស្សនាលាន់មាត់ថា រិន សារ័ត្ន ពិតជាថ្លើមធំហ៊ានប៉ះនឹង Loom Leng ដែលជាម្ចាស់ខ្សែក្រវាត់នោះ។
ទោះជាយ៉ាងណាប្រធានគ្រប់គ្រងកម្មវិធីប្រដាល់នៅ SEATV លោក ញាន សុធី បាននិយាយថា Loom Leng មួយរយៈចុងក្រោយនេះប្រកួតចាញ់ញឹកហើយធ្លាក់ជាងមុន ផ្ទុយពី រិន សារ័ត្ន ឈ្នះរហូត អ៊ីចឹងអ្នកទាំង ២ នេះអាចប៉ះគ្នាបាន៕