ភ្នំពេញៈ ក្រុមព្រះខ័នរាជស្វាយរៀងបានសម្តែងការខកចិត្តទៅនឹងលទ្ធផលស្មើគ្នា ១-១ ជាមួយក្រុមម្ចាស់ផ្ទះ អង្គរថាយហ្គឺរ ដែលធ្វើឲ្យពួកគេបានថមថយឱកាសបន្តិចក្នុងការឆ្ពោះទៅរកការលើកពានលីកកំពូលកម្ពុជា ឆ្នាំ ២០១៩ នេះ ចំណែកភ្នំពេញក្រោនបានទាញទម្លាក់ក្រុមណាហ្គាវើលចេញពីលេខរៀងទី ២ ហើយបើកផ្លូវឲ្យក្រុម វិសាខា ឡើងមកឈរនៅទីតាំងនេះជំនួសវិញ។
បើទោះបីជាការចែកគ្នាម្នាក់ ១ ពិន្ទុជាមួយក្រុមអង្គរថាយហ្គឺរ ជាលើកទី ២ នេះ វាមិនប៉ះពាល់ខ្លាំងដល់ទីតាំងកំពូលតារាងរបស់ក្រុមស្វាយរៀងទេ ប៉ុន្តែគ្រូជំនួយរបស់ក្រុមនេះបានចាត់ទុកការស្មើគ្នា ១-១ នេះថាជាការប្រកួតដែលគ្មានសាច់បាល់លេង និងពិបាកក្នុងការទទួលយក។
លោក ជូ សារឿន គ្រូជំនួយក្រុមព្រះខ័នរាជស្វាយរៀងបានប្រាប់ភ្នំពេញប៉ុស្តិ៍កាលពីថ្ងៃចន្ទថា៖ «លទ្ធផលស្មើនេះ វាជាការខកចិត្តមួយរបស់យើង ព្រោះបញ្ហាតារាងធ្វើឲ្យយើងអត់មានតាក់ទិកក្នុងការលេងសោះ ឯអាជ្ញាកណ្តាលកាត់សេចក្តីក៏ដូចជាពិបាកយកភ្នែកមើល ព្រោះគេទាត់យើងពីក្រោយ ទាញយើង និងវ៉ៃពីក្រោយ ក៏គាត់អត់ហ្វូត (ពិន័យ) ដល់អ៊ីចឹងធ្វើឲ្យយើងមានការពិបាកលេង ហើយកីឡាករយើងមួយចំនួនក៏មានការបាក់ទឹកចិត្តលើបញ្ហានេះផងដែរ។ និយាយរួម វាអត់មានសាច់បាល់លេងតែម្តង»។
តាមរយៈការប្រកួតនៅកីឡដ្ឋានខេត្តសៀមរាបកាលពីថ្ងៃអាទិត្យនោះ កីឡាករ Charles William Hew Machell រកបានគ្រាប់បាល់ជួយឲ្យក្រុមស្វាយរៀងនាំមុខ ១-០ មុន នៅនាទីទី ៥៤ ប៉ុន្តែ កីឡាករបានកម្ពស់ Ramas Alexis Damian បានតែតបាល់បញ្ជូលទីតាមស្មើឲ្យ អង្គរថាយហ្គឺរ នៅនាទីទី ៦០។
ការឈ្នះបាន ១ ពិន្ទុបន្ថែមនេះ វានៅតែជួយឲ្យក្រុមព្រះខ័នរាជស្វាយរៀង ឈរនៅកំពូលតារាងដោយមាន ៤៩ ពិន្ទុដាច់ឆ្ងាយពីក្រុមផ្សេងទៀត ប៉ុន្តែអង្គរថាយហ្គឺរ បានធ្លាក់ពីលេខ ៤ មកឈរនៅលេខ ៥ វិញមាន ៣៨ ពិន្ទុដដែល ហើយទីតាំងនេះជំនួសវិញដោយក្រុមបឹងកេតដែលមាន ៤០ ពិន្ទុ បន្ទាប់ពីបឹងកេតបានបន្តយកឈ្នះក្រុមសាលាកីឡាបាល់ទាត់ជាតិបាទី ៦-០ ពីថ្ងៃសៅរ៍។
ចំណែកក្រុមណាហ្គាវើល ដែលបានគ្រប់គ្រងលេខ ២ អស់រយៈពេលជាច្រើនសប្តាហ៍មកហើយនោះគឺបានធ្លាក់ចេញពីទីតាំងនេះហើយ បន្ទាប់ពីពួកគេបានត្រឹមស្មើ ២-២ ជាមួយក្រុមភ្នំពេញក្រោនដែលពួកគេធ្លាប់បានឈ្នះ ៣-០ កាលពីជើងទី ១ នោះ។
ក្រុមណាហ្គាវើល ពិតជាមានការខកចិត្តខ្លាំង ចំពោះការធ្លាក់មកឈរនៅលេខ ៣ មាន ៤១ ពិន្ទុនេះ ព្រោះក្នុងជំនួបលើកនេះ Booysen Shane រកបានគ្រាប់បាល់តាមស្មើឲ្យក្រុមភ្នំពេញក្រោននៅនាទីទី ៩០ គឺបន្ទាប់ពី Esho Omogba និង គួច ដានី វាយបកបានម្នាក់ ១ គ្រាប់នៅនាទីទី ៤៩ និងនាទីទី ៦៧ ដើម្បីលុបចោលគ្រាប់បាល់នាំមុខរបស់ភ្នំពេញក្រោនដែលរកបានដោយ Mustafa Zazai នៅនាទីទី ២៣។
ស្របពេលក្រុមណាហ្គាវើលរកបានត្រឹម ១ ពិន្ទុនេះគឺក្រុមវិសាខាបានយកឈ្នះក្រុមខេត្តកំពង់ចាម ២-០ ដើម្បីហក់ពីលេខ ៣ មកឈរនៅលេខ ២ មាន ៤៣ ពិន្ទុ ខណៈក្រុមក្រសួងការពារជាតិបានយកឈ្នះក្រុមសូលទីឡូអង្គរ ២-០ ដើម្បីមាន ៣២ ពិន្ទុស្មើក្រុមភ្នំពេញវិញ។
យ៉ាងណាក៏ដោយការប្តូរពីការឈ្នះ ១៤-០ ក្នុងជើងទី ១ មកឈ្នះត្រឹម ២-០ ក្នុងជើងទី ២ នេះធ្វើឲ្យអ្នកចាត់ការទូទៅក្រុមវិសាខា លោក ហុក សុចិត្ត្រា បាននិយាយកោតសរសើរដល់ក្រុមខេត្តកំពង់ចាមថា៖ «ក្រុមខេត្តកំពង់ចាមបានព្យាយាមកែសម្រួលស្ថានភាពពីជើងទី ១ មកជើងទី ២ នេះបានល្អមែនទែន ព្រោះពួកគាត់មានការយល់ដឹងច្រើន អាចនិយាយបានថាគាត់មានការផ្លាស់ប្តូរបានច្រើនសឹងតែអាច ១៨០ ដឺក្រេ»៕