ទីក្រុងឡុងដ៍៖ ក្រុមហង្សក្រហម Liverpool បានធ្វើការសុំទោស ដូចដែលក្រុមយក្សនៅក្របខ័ណ្ឌ Premier League របស់ប្រទេស អង់គ្លេស មួយនេះ បានសម្រេចលុបចោលគម្រោងដ៏ចម្រូងចម្រាសរបស់ខ្លួន ដែលផ្អាកបុគ្គលិកមិនទាក់ទងនឹងការប្រកួតអំឡុងការរាលដាលវីរុសកូរ៉ូណាកាលពីថ្ងៃចន្ទ ដើមសប្ដាហ៍នេះ ខណៈសហព័ន្ធបាល់ទាត់ពិភពលោក (FIFA) បានជំរុញឲ្យកីឡាករ និងក្លិបទាំងអស់ ឈានដល់កិច្ចព្រមព្រៀងជាមួយគ្នាចំពោះបញ្ហាកាត់ប្រាក់ខែ។
ក្រុម Liverpool បានប្រឈមជាមួយនឹងការរិះគន់យ៉ាងចាស់ដៃពីសំណាក់អ្នកគាំទ្រ និងអតីតកីឡាកររបស់ខ្លួន ក្រោយពីបានបង្ហាញកាលពីចុងសប្ដាហ៍ថា ក្លិបចង់ប្រើគម្រោងរបស់រដ្ឋាភិបាលចក្រភពអង់គ្លេសពាក់ព័ន្ធនឹងការឧបត្ថម្ភថ្លៃនឿយហត់របស់និយោជិត។
ក្រុមហ៊ុន Fenway Sports Group ដែលជាម្ចាស់ក្លិប Liverpool មានទីតាំងនៅសហរដ្ឋអាមេរិកមានបំណងចង់ឲ្យបុគ្គលិកប្រមាណ ២០០ នាក់ ផ្អាកការងារជាបណ្ដោះអាសន្នសិនក្នុងអំឡុងពេលមានការរាតត្បាតនៃជំងឺនេះ ខណៈរដ្ឋាភិបាលបានជួយឧបត្ថម្ភ ៨០ ភាគរយនៃប្រាក់ខែរបស់ពួកគេ។
ជាមួយគ្នានេះ ក្លិបរួមលីកផ្សេងទៀត មាន Tottenham, Newcastle, Bournemouth និង Norwich បានអនុវត្តគម្រោងនេះរួចហើយ ប៉ុន្តែក្រុមកំពូលតារាង Liverpool ដែលមានប្រាក់ចំណេញមុនបង់ពន្ធ ៤២ លានផោន (៥១,៧ លានដុល្លារ) សម្រាប់រដូវកាល ២០១៨-២០១៩ បានធ្វើបែបហ្នឹងដែរ បែរជាទទួលការរិះគន់យ៉ាងខ្លាំង ដោយសារកេរ្តិ៍ឈ្មោះរបស់ខ្លួន ក្នុងនាមជាក្លិបមួយ ដែលមានទំនាក់ទំនងយ៉ាងរឹងមាំជាមួយសហជីពកម្មករ របស់ក្រុមនៅតំបន់ Merseyside។
ការរិះគន់ខ្លាំងៗនេះ បានធ្វើឲ្យមានការកែប្រែភ្លាមៗ ខណៈនាយកប្រតិបត្តិរបស់ក្លិប លោក Peter Moore បានសរសេរលិខិតបើកចំហមួយទៅកាន់អ្នកគាំទ្រ ដោយប្រកាសឲ្យដឹងថា ពួកគេនឹងជ្រើសរើសវិធីដោះស្រាយផ្សេងទៀត សម្រាប់ការផ្អាកបុគ្គលិកនេះ ក្រោយមានការពិភាក្សាជាមួយម្ចាស់ភាគហ៊ុនសំខាន់ៗ។
ការសរសេររបស់លោក Moore បានឲ្យដឹងថា៖ «យើងជឿថា យើងបានធ្វើការសម្រេចចិត្តខុស កាលពីសប្ដាហ៍មុន ដែលប្រកាសថា យើងមានបំណងប្រើគម្រោងរបស់រដ្ឋាភិបាល ដើម្បីឲ្យបុគ្គលិកឈប់សម្រាក ដោយសារមិនមានការប្រកួត នៅ Premier League។ ដូច្នេះយើងពិតជាសោកស្ដាយខ្លាំងណាស់ ក្នុងការជ្រើសរើសវិធីនេះ»។
ក្រោយឃើញសំបុត្ររបស់លោកនាយកប្រតិបត្តិរូបនេះ អតីតខ្សែការពាររបស់ក្រុម Jamie Carragher បានសរសេរក្នុងគណនី Twetter របស់ខ្លួនថា៖ «ល្អណាស់ Peter Moore។ ដំបូងខុសធ្ងន់ណាស់ តែឥឡូវធ្វើត្រូវវិញហើយ។ អរគុណមែនទែន»។
បើទោះជា Premier League បានផ្អាកការប្រកួតរបស់ខ្លួន ដោយសារតែការរុករាននៃវីរុសក៏ដោយ ក៏ក្រុមមេឃខៀវ Manchester City ដែលមានលោក Sheikh Mansour ជាម្ចាស់ក្លិបបានអះអាងថា ខ្លួននឹងមិនប្រើច្បាប់ការងាររបស់រដ្ឋាភិបាលឡើយ ហើយមានក្រុមបិសាចក្រហម Manchester United ត្រៀមធ្វើតាមគំរូនេះដែរ។
ការផ្លាស់ប្ដូរឥរិយាបថរបស់ក្រុមជើងឯកពានទ្វីបអឺរ៉ុបរដូវកាលមុននេះ កើតមានដោយសារតែក្លិបនៅលីកលំដាប់កំពូលរបស់ប្រទេស អង់គ្លេស ដែលស្ថិតក្នុងចំណោមក្លិបអ្នកមានបំផុតលើលោក កំពុងត្រូវបានតាមដានយ៉ាងខ្លាំង ដោយរដ្ឋមន្ត្រីរបស់រដ្ឋាភិបាលបានព្រមានដល់ម្ចាស់ក្លិប និងកីឡាករទាំងអស់ គួរតែពិចារណាឲ្យបានហ្មត់ចត់ ពេលសម្រេចធ្វើអ្វីលើកក្រោយទៀត។
កីឡាករនៅ Premier League ដែលមានចំណូលខ្ពស់បំផុត ដូចជាអ្នកចាំទី David de Gea របស់ Manchester United និង Kevin De Bruyne ខ្សែបម្រើក្នុងក្រុម Manchester City ទទួលបានប្រាក់ខែច្រើនណាស់ ដោយត្រូវគេរាយការណ៍ថា ប្រហែល ២០ លានផោន (២៥ លានដុល្លារ) ក្នុង ១ ឆ្នាំ៕ AFP/VN