ភ្នំពេញ: លោកឧត្តមសេនីយ៍ឯក ជា ប៊ុនហេង ប្រធានអង្គភាពកីឡានគរបាលជាតិកម្ពុជានៃក្រសួងមហាផ្ទៃកាលពីព្រឹកថ្ងៃទី ១៧ ខែមករា ឆ្នាំ ២០១៩ បានប្រគល់សម្ភារហ្វឹកហាត់ដល់ក្លិបកីឡាប្រដាល់ចំនួន ១៤ ក្លិប និងសមាគមកីឡាចំនួន ៣ បន្ថែមទៀតមានតេ្វក្វាន់ដូ ITF និង WTF ព្រមទាំងសមាគមកីឡាហាប់គីដូ។ កម្មវិធីនេះត្រូវបានធ្វើឡើងនៅអង្គភាពកីឡាក្រសួងមហាផ្ទៃក្នុងពហុកីឡដ្ឋានជាតិអូឡាំពិកកម្ពុជា។
លោក គង់ ចាន់ធីណា ជំនួយការលោកឧត្តមសេនីយ៍ឯក ជា ប៊ុនហេង បានប្រាប់ថា៖ «ក្លិប និងសមាគមកីឡាដែលទទួលបានសម្ភារនេះមានសរុបចំនួន ១៧ ក្នុងនោះមានក្លិបប្រដាល់ចំនួន ១៤ ក្លិប សមាគមតេក្វាន់ដូចំនួន ២ និងសមាគមកីឡាហាប់គីដូចំនួន ១»។
លោក ចាន់ ធីណា បានបន្ថែមថា៖ «សម្ភារហ្វឹកហាត់ទាំងនេះបានមកពីសប្បុរសជនដែលស្រឡាញ់វិស័យកីឡា ហើយបានទិញយកមកឧបត្ថម្ភដោយមិនប្រាប់ឈ្មោះដែលមានទំហំទឹកប្រាក់ប្រហែល ៣ ០០០ ដុល្លារអាមេរិក ហើយអង្គភាពកីឡានគរបាលជាតិកម្ពុជាបានកោះហៅក្លិប និងសមាគមចំណុះឲ្យមកទទួលយកតែម្តងដើម្បីបម្រើឲ្យការហ្វឹកហាត់។
លោក ជា ប៊ុនហេង បានមានប្រសាសន៍ថា៖ «សកម្មភាពកីឡាក្នុងក្រសួងមហាផ្ទៃទាំងមូលកំពុងតែមានការរីកចម្រើន និងមានកម្រិតបច្ចេកទេសកាន់តែឈានឡើងល្អជាលំដាប់ ហើយក្នុងការប្រកួតក្នុងព្រឹត្តិកាណ៍កីឡានានាក្រសួងមហាផ្ទៃតែងតែដណ្តើមបានចំណាត់ថ្នាក់ល្អ និងមេដាយជាបន្តបន្ទាប់»។ លោក ជា ប៊ុនហេង បានបន្ថែមថា៖ «សម្ភារដែលត្រូវចែកជូនពេលនេះមានហ្គង់ និងឧបករណ៍ហ្វឹកហាត់ព្រមទាំងថវិកាចំនួន ១០ ម៉ឺនរៀលក្នុង ១ ក្លិបទៀត។ ក្លិបដែលទទួលបានមានក្លិបមកុរាជសីហ៍ ខ្លារខិន វិបុលសែនជ័យ ឡុងសាលវ័ន្ត និរោធមានជ័យ មិត្តប៉ូលីស កងចក្ររាជសីហ៍ អាណាចក្រគុនខ្មែរ កំចាយមារ កុសលកីឡា នាគរាជចតុមុខ និងក្លិបបាត់ដំបងពាយព្យ»៕