អតីតប្រធានសហព័ន្ធកីឡាបាល់ទាត់ហុងឌូរ៉ាស លោក Fafael Callegas បានស្លាប់ ក្នុងអាយុ ៧៦ ឆ្នាំ។ AFP
.jpg)
ក្រុងតេហ្គូស៊ីហ្គាល់ប៉ា៖ ក្រុមគ្រួសាររបស់អតីតប្រធានាធិបតីប្រទេស ហុងឌូរ៉ាស គឺលោក Rafael Callejas ដែលធ្លាប់សារភាពកំហុស នៅសហរដ្ឋអាមេរិក ចំពោះការពាក់ព័ន្ធទៅនឹងរឿងអាស្រូវពុករលួយ របស់សហព័ន្ធបាល់ទាត់ពិភពលោក (FIFA) នោះ បានស្លាប់កាលពីថ្ងៃសៅរ៍ ក្នុងអាយុ ៧៦ ឆ្នាំ។
លោក Callejas បានបាត់បង់ជីវិតដោយសារគាំងបេះដូងនៅឯមន្ទីរពេទ្យមួយនាក្រុងអាត្លង់តា រដ្ឋអាត្លង់តា សហរដ្ឋអាមេរិក។ នេះបើតាមការឲ្យដឹងពីសំណាក់ក្រុមគ្រួសារនៃសព ហើយភរិយារបស់សពអ្នកស្រី Norma Gaborit de Callejas បានឲ្យដឹងតាមរយៈសារមរណទុក្ខរបស់ខ្លួនថា៖ «យើងខ្ញុំមានទុក្ខជាទម្ងន់ ដោយសារស្វាមីសម្លាញ់របស់ខ្ញុំ ដែលត្រូវជាឪពុក និងជីតា បានប្រគល់វិញ្ញាណរបស់គាត់ឲ្យទៅព្រះជាម្ចាស់ហើយ»។
អតីតនិសិ្សតនៃសាកលវិទ្យាល័យ Mississippi នាសហរដ្ឋអាមេរិក លោក Callejas កើតនៅថ្ងៃទី ១៤ ខែ វិច្ឆិកា ឆ្នាំ ១៩៤៣ នាទីក្រុងតេហ្គូស៊ីហ្គាល់ប៉ា ហើយលោកចូលកាន់តំណែងជាប្រធានាធិបតីនៃប្រទេស ហុងឌូរ៉ាស កាលពីឆ្នាំ ១៩៩០ ដល់ ១៩៩៤។
ក្រៅពីកាន់តំណែងជាប្រធានាធិបតី លោកក៏ធ្លាប់ធ្វើជាប្រធានរបស់សហព័ន្ធបាល់ទាត់ជាតិរបស់ខ្លួនដែរ ចន្លោះពីឆ្នាំ ២០០២ ដល់ ២០០៥ ហើយលោកក៏ជាមនុស្សម្នាក់នៅក្នុងចំណោមអតីតសមាជិករបស់គណៈកម្មការទីផ្សារ និងទូរទស្សន៍របស់សហព័ន្ធបាល់ទាត់ពិភពលោកផងដែរ។
ដូចដែលបានដឹងនាពេលកន្លងមកថា លោក Callejas ជាមនុស្សម្នាក់ក្នុងចំណោមមន្ត្រី ៤០ រូបផ្សេងទៀត ដែលមានជាប់ទាក់ទងរឿងអាស្រូវពុករលួយ ដោយលោកត្រូវបានគេចោទប្រកាន់ថា បានទទួលសំណូកពីក្រុមហ៊ុន Media World ដែលមានមូលដ្ឋាននៅ Florida ក្នុងការផ្ដល់សិទ្ធិផ្សាយការប្រកួតវគ្គជម្រុះរបស់ក្រុមជម្រើសជាតិហុងឌូរ៉ាស សម្រាប់ព្រឹត្តិការណ៍ World Cup ឆ្នាំ ២០១៤ ឆ្នាំ ២០១៨ និងឆ្នាំ ២០២២។
ជាមួយនឹងការបង្កើតអំពើពុករលួយនៅក្នុងកីឡាបាល់ទាត់នេះ លោក Callejas ត្រូវបានគេកាត់ទោស នៅឯតុលាការរបស់សហរដ្ឋអាមេរិក តែដោយសារបញ្ហាសុខភាពរបស់គាត់មានជំងឺមហារីកគ្រាប់ឈាមនោះ ទើបធ្វើឲ្យដំណើរការកាត់ក្ដីត្រូវពន្យារពេលជាច្រើនលើកច្រើនសា ហើយគាត់ត្រូវបានបង្ហាញខ្លួននៅក្នុងតុលាការនាថ្ងៃទី ៥ ឧសភា។
រឿងអាស្រូវពុករលួយក្នុងស្ថាប័ន FIFA បានផ្ទុះឡើង កាលពីខែឧសភា ឆ្នាំ ២០១៥ ជាមួយនឹងការចាប់ខ្លួនមន្ត្រីសំខាន់ៗ ៧ រូប នៃសហព័ន្ធដ៏មានឥទ្ធិពលនេះ នៅក្រុង Zurich ដោយនៅក្នុងបណ្ដឹងរបស់តុលាការរបស់អាមេរិកបានចោទពួកគេពីបទទទួលសំណូកជាទឹកប្រាក់ប្រហែល ១៥០ លានដុល្លារ គិតតាំងទសវត្សរ៍ឆ្នាំ ១៩៩០ មក។ មិនខុសពីជនជាប់ចោទដទៃទៀតដែរ លោក Callejas ត្រូវបានកាត់ទោសមិនឲ្យពាក់ព័ន្ធនឹងបាល់ទាត់គ្រប់សកម្មភាពទាំងអស់ក្នុងឆ្នាំ ២០១៦ អស់ ១ ជីវិត៕ AFP/VN
