Halstenberg (ស) តែតបាល់ក្នុងការប្រកួត German Cup ពីថ្ងៃទី ២៥ ខែ ឧសភា ឆ្នាំ ២០១៩។ រូប AFP
.jpg)
ក្រុងបែលហ្វាស់៖ លោក Joachim Loew គ្រូបង្វឹកជម្រើសជាតិអាល្លឺម៉ង់និយាយថា ក្រុមរបស់គាត់ស្ថិតនៅក្នុង «ដំណាក់កាលរៀនសូត្រ» ជាដដែល ទោះបីជាពួកគេបានត្រឡប់ទៅឈរនៅលើកំពូលតារាងនៃពូល C ក្រោយពីឈ្នះជម្រើសជាតិអៀរឡង់ខាងជើង ២-០ នៅក្នុងការប្រកួតជម្រុះEuro 2020 ពីថ្ងៃចន្ទ។
ក្រុមអាល្លឺម៉ង់បានធ្វើដំណើរទៅទីក្រុង Belfast នៃប្រទេស អៀរឡង់ខាងជើង ក្នុងបំណងត្រូវតែឈ្នះក្រោយពីបានជួបភាពជូរចត់ដោយចាញ់ក្រុមជម្រើសជាតិហូឡង់ ៤-២ នៅទីក្រុង Hamburg ប្រទេស អាល្លឺម៉ង់ ពីថ្ងៃសុក្រដែលធ្វើឲ្យពួកគេធ្លាក់ពីកំពូលតារាងជាស្វ័យប្រវត្តិ។
ក្នុងការប្រកួតពីថ្ងៃចន្ទនេះ កីឡាករ Halstenberg រកបាន ១ គ្រាប់នៅនាទីទី៤៨ បន្ទាប់មកកីឡាករ Gnabry រកបាន ១ គ្រាប់ទៀត នៅចុងការប្រកួត ធ្វើឲ្យក្រុមអាល្លឺម៉ង់ឈ្នះក្រុមអៀរឡង់ខាងជើង ២-០ ដោយគ្មានរបូត ១ គ្រាប់សោះឡើយ។
ជ័យជម្នះរបស់អាល្លឺម៉ង់នេះបានទម្លាក់ក្រុមអៀរឡង់ខាងជើងចេញពីកំពូលតារាងនៃពូល C ដោយបញ្ចប់ការឈ្នះទាំង ៤ លើកជាប់គ្នាសម្រាប់ក្រុមនេះ។
លោក Loew បានប្រាប់ប្រព័ន្ធផ្សព្វផ្សាយ RTL ថា៖ «យើងទទួលរងសម្ពាធយ៉ាងខ្លាំងក្រោយពីយើងបានចាញ់ក្រុមហូឡង់កាលពីថ្ងៃសៅរ៍»។
ក្រុមរបស់លោក Loew មានការព្រួយបារម្ភយ៉ាងខ្លាំងនៅក្នុងតង់ទី១ ដោយសារពួកគេមិនទាន់រកបានគ្រាប់បាល់ទាល់តែសោះ ប៉ុន្តែអ្វីៗបានល្អប្រសើរឡើងវិញក្រោយពីកីឡាករ Halstenberg និងកីឡាករ Gnabry រកបានម្នាក់ ១ គ្រាប់ ដើម្បីជួយឲ្យក្រុមអាល្លឺម៉ង់បាន ៣ ពិន្ទុថែមទៀត ក្រោយពីបញ្ចប់ការប្រកួតនេះ។
គ្រូបង្វឹកអាល្លឺម៉ង់ លោក Loew បានទទួលស្គាល់ថា ក្រុមរបស់គាត់គួរតែបានសម្លាប់ការប្រកួតនេះនៅក្នុងតង់ទី១ ដោយអះអាងថា៖ «យើងខិតខំជម្នះបញ្ហា ២-៣ នៅក្នុងការប្រកួតនេះព្រោះក្រុមអៀរឡង់ខាងជើង មានភាពក្លាហាន និងវាយបកទៅលើពួកយើងភ្លាមៗ»។
គ្រូបង្វឹករូបនេះបានបន្ថែមទៀតថា៖ «យើងលេងបានល្អជាងនៅក្នុងតង់ទី២ ប៉ុន្តែយើងនៅតែស្ថិតនៅក្នុងដំណាក់កាលរៀនសូត្រជាដដែល»។
បើទោះជាក្រុមអៀរឡង់ខាងជើង ឈ្នះបាន ៤ ប្រកួតជាប់គ្នាក៏ដោយ ប៉ុន្តែបរាជ័យលើកនេះបានធ្វើឲ្យពួកគេស្ថិតក្រោមក្រុមអាល្លឺម៉ង់ក្នុងចំណាត់ថ្នាក់ទី២ មាន ១២ ពិន្ទុ ក្នុង ៥ ប្រកួតនៅក្នុងពូល C ខណៈក្រុមជម្រើសជាតិហូឡង់ ស្ថិតនៅចំណាត់ថ្នាក់ទី ៣ មាន ៩ ពិន្ទុ ប៉ុន្តែទើបតែបាន ៤ ប្រកួត រួមការប្រកួតដែលបានឈ្នះក្រុមជម្រើសជាតិអេស្តូនី ៤-០ កាលពីថ្ងៃចន្ទផងដែរ។
ក្នុងការប្រកួតពីថ្ងៃចន្ទនោះ កីឡាករ Ryan Babel របស់ក្រុមជម្រើសជាតិហូឡង់រកបាន ២ គ្រាប់បើកឆាក បន្ទាប់មកគ្រាប់ទី ៣ និងទី ៤ រកបានដោយកីឡាករ Memphis Depay និងកីឡាករ Georginio Wijnaldum។
ក្រុមរបស់លោក Ronald Koeman គ្រូបង្វឹកជម្រើសជាតិហូឡង់នៅតែមានការងារត្រូវធ្វើទៀត ដើម្បីឡើងដល់វគ្គផ្ដាច់ព្រ័ត្រដ៏សំខាន់លើកដំបូងតាំងពីបានឡើងដល់វគ្គ ៤ ក្រុមចុងក្រោយនៃព្រឹត្តិការណ៍ World Cup 2014 បើទោះជាពួកគេចាញ់ក្រុមអៀរឡង់ខាងជើង ៣ ពិន្ទុ នៅក្នុងពូល C ជាមួយការនៅសល់ ១ ប្រកួតក្នុងដៃក៏ដោយ។
កីឡាករ Babel អាយុ ៣២ ឆ្នាំ បានប្រាប់ទូរទស្សន៍ NOS ថា៖ «ខ្ញុំលែងជាកីឡាករវ័យក្មេងម្នាក់នៅក្នុងក្រុមនេះទៀត ហើយដូច្នេះខ្ញុំមិនអាចរត់លឿនដូចពីមុនបានទេ ប៉ុន្តែខ្ញុំអាចប្រើបច្ចេកទេស និងបទពិសោធរបស់ខ្ញុំជំនួសវិញ»៕ AFP/SN
