លោក Damiano Tommasi ប្រគល់ពានកីឡាករល្អដល់ Ronaldo និងជាអ្នកផ្តើមឲ្យមានការជួយដល់ក្លិបលីកកម្រិតទាប។ AFP
.jpg)
ក្រុងមីឡាន៖ ប្រធានសមាគមកីឡាករបាល់ទាត់ប្រទេស អ៊ីតាលី (AIC) កាលពីថ្ងៃអាទិត្យកន្លងមកនេះ បានស្នើដល់មន្ត្រីពាក់ព័ន្ធនឹងបាល់ទាត់ក្នុងប្រទេសទាំងអស់ បង្កើតឲ្យមានកិច្ចព្រមព្រៀងមួយ ដើម្បីធានាដល់កីឡាករ ក្នុងក្រុមលីកកម្រិតទាប ដែលកំពុងប្រឈមនឹងហានិភ័យ ក្នុងការបាត់បង់អាជីពខ្លួន ព្រោះតែការរាតត្បាតពីវីរុសកូរ៉ូណាដ៏គ្រោះថ្នាក់។
ថ្លែងទៅកាន់ប្រព័ន្ធផ្សព្វផ្សាយ Rainews24 លោក Damiano Tommasi ប្រធាន AIC បានឲ្យដឹងថា៖ «នៅ Lega Pro (ស្ថាប័នដែលគ្រប់គ្រងលីកកម្រិតទី ៣ Serie C) Serie D និងបាល់ទាត់នារី ឃើញថា កីឡាករអាជីពទាំងអស់មានប្រាក់ចំណូលតិចតួចណាស់ សម្រាប់ផ្គត់ផ្គង់គ្រួសាររបស់ពួកគេ»។
លោកប្រធានរូបនេះ បាននិយាយបន្តទៀតថា៖ «យើងកំពុងស្វែងរកប្រភពចំណូលផ្សេងៗ ដែលយើងគិតថា យើងអាចយកទៅជួយពួកគេបានខ្លះ។ ៧០ ភាគរយ នៃកីឡាករលេងនៅ Lega Pro មានចំណូលមិនដល់ ៥០ ០០០ អឺរ៉ូ (៥៤ ០០០ ដុល្លារ) នោះទេ ក្នុង ១ ឆ្នាំ។
បុរសមានវ័យ ៤៥ ឆ្នាំរូបនេះ បាននិយាយបន្ថែមទៀតថា៖ «លើសពីការយកចិត្តទុកដាក់លើកីឡាករម្នាក់ៗ ខ្ញុំជឿថា យើងមានតួនាទីផ្សេងទៀត ក្នុងការការពារមនុស្សទាំងអស់ ដែលពាក់ព័ន្ធនឹងកីឡានេះ មិនថាកីឡាករ ពេទ្យព្យាបាល អ្នកបើកបរ និងបុគ្គលិកថែទាំទីលានជាដើម»។
សម្ដីរបស់លោក Tommasi ដែលធ្លាប់លេងតំណែងខ្សែបម្រើជាមួយក្លិបល្បីៗមួយចំនួន មាន Roma ជាដើម បានកើតមាន ១ ថ្ងៃ មុនការប្រជុំតាមវីដេអូ រវាងក្លិបទាំងអស់ នៅក្របខ័ណ្ឌ Serie A ដែលពិភាក្សាបញ្ហាប្រាក់ខែរបស់កីឡាករ ក៏ដូចជាកាលបរិច្ឆេទសម្រាប់ការប្រកួតឡើងវិញ នឹងស្ថិតក្នុងការពិភាក្សា ក្រោយមិនអាចឈានដល់កិច្ចព្រមព្រៀងជាមួយ AIC។
ក្រុមបាល់ទាត់នៅក្របខ័ណ្ឌកំពូលរបស់ប្រទេស អ៊ីតាលី ត្រូវបានគេរាយការណ៍ថា បានដាក់ចេញនូវគោលការណ៍កាត់បន្ថយប្រាក់នឿយហត់រយៈពេល ៤ ខែ ក្នុងនោះឃើញថា កីឡាកររបស់ក្លិបសេះបង្កង់ Juventus បានយល់ព្រមជាមួយវិធានការនេះ តែបើយោងតាមការចុះផ្សាយរបស់កាសែតកីឡា Gazzetta Dello Sport បានឲ្យដឹងថា AIC បានអនុវត្តផ្ទុយ ដោយធ្វើការកាត់ប្រាក់តែ ១ ខែ។
កាលពីថ្ងៃសៅរ៍ ប្រធាន Lega Pro លោក Francesco Ghirelli បាននិយាយថា ក្រុមក្នុងលីកនេះ អាចរលាយបាត់បន្តិចម្ដងៗ ក្រោយមានការរាលដាលវីរុសកូរ៉ូណា ដែលកាលពីថ្ងៃអាទិត្យ ហាក់ធ្លាក់ចុះបន្តិចនៅអ៊ីតាលី តែនៅតែបានផ្ដាច់ជីវិតមនុស្សរាប់ពាន់នាក់ដដែល។
«ជាមួយនឹងពេលវេលាកន្លងទៅរាល់ថ្ងៃ ហានិភ័យមានកាន់តែខ្លាំង ដែលអាចធ្វើក្លិប និងក្រុមហ៊ុនទាំងអស់ បង្ខំចិត្តដើរចេញពីពាណិជ្ជកម្មនេះ»។ លោក Ghirelli បានឲ្យដឹងក្នុងសេចក្ដីប្រកាសមួយ។
លោកប្រធានរូបនេះ បញ្ជាក់ថា៖ «បណ្ដាញទាំងមូលនៃក្លិបនៅ Serie C ទាំងអស់ ជិតដួលរលំហើយ ហានិភ័យពិតប្រាកដគឺថា ម្ចាស់ក្លិបទាំងអស់ អាចនឹងដាក់ពាក្យក្ស័យធន។ ពេលនោះ កីឡាករទាំងអស់នឹងមិនមានក្រុមលេង និងគ្មានប្រាក់ចំណូលអ្វីទាំងអស់។ នេះហើយជាមូលហេតុ ដែលយើងត្រូវការការលះបង់ពីគ្រប់គ្នា ដើម្បីស្រោចស្រង់វិស័យបាល់ទាត់។ ពួកយើងត្រូវតែដឹងថា មិនយូរទេ វីរុសនេះ នឹងអាចធ្វើឲ្យក្លិបនៅក្របខ័ណ្ឌ Serie C បាត់រូបរាងបន្តិចម្ដងៗ»៕ AFP/VN
