ក្រុងឡុងដ៍៖ លោក Carlo Ancelotti បានស្ដីបន្ទោសលោកអាជ្ញាកណ្ដាល Kevin Friend ថា ជារឿងគួរឱ្យអស់សំណើចណាស់ ដែលផ្ដល់កាតក្រហមឱ្យ Lucas Digne អំឡុងការប្រកួតក្របខ័ណ្ឌ Premier League ដែលក្រុម Everton ទទួលបាននូវលទ្ធផលបរាជ័យលើកដំបូង នៅដើមរដូវកាលថ្មីនេះ ក្រោមថ្មីជើងរបស់ក្រុមម្ចាស់ផ្ទះ Southampton ២-០។
Everton លេងអត់ចាញ់សោះឡើយចំនួន ៨ លើក អំឡុងពេលនេះ នៅគ្រប់កម្មវិធីប្រកួតទាំងអស់ តែពួកគេបានស្គាល់រសជាតិចាញ់នេះ ដោយសារការលេងដូចសោះអង្គើយ នៅឯកីឡដ្ឋាន St Mary''s កាលពីថ្ងៃអាទិត្យកន្លងទៅ។
ក្រុមរបស់លោក Ancelotti ដែលមានទម្រង់លេងគួរចាប់អារម្មណ៍ខ្លាំង មុនប្រកួតនេះ ត្រូវតាមពីក្រោយក្រុមម្ចាស់ផ្ទះ Southampton នៅពេលខ្សែបម្រើ James Ward-Prowse ស៊ុតពេញកម្លាំងជើង ក្នុងតំបន់គ្រោះថ្នាក់ បញ្ចូលទីយ៉ាងស្អាត នៅនាទីទី ២៧ និងបន្ទាប់មក ខ្សែប្រយុទ្ធ Che Adams បន្ថែមការនាំមុខទ្វេដងនៅនាទីទី៣៥។
ក្រោយត្រូវក្រុមដែលមានឈ្មោះក្រៅថា «The Saints» នាំមុខ ក្រុមភ្ញៀវ មិនត្រឹមតែមិនអាចតាមស្មើវិញបាន ថែមទាំងកីឡាកររបស់ខ្លួន Digne ត្រូវបណ្ដេញចេញទៀតផង នៅនាទីទី៧២ ដោយសារទាក់ជើង Kyle Walker-Peters ដែលកំពុងរត់លឿន តែខ្សែការពារឆ្វេងរូបនោះ តវ៉ាថា ខ្លួនគ្រាន់តែជាន់កែងជើង ដោយអចេតនាប៉ុណ្ណោះ។
ពាក់ព័ន្ធនឹងការផ្ដល់កាតក្រហមនេះ លោក Ancelotti និយាយថា៖ «ការផ្ដល់កាតក្រហមនោះ គួរឱ្យអស់សំណើចណាស់។ វាជារឿងអចេតនាប៉ុណ្ណោះ ហើយប្រាកដណាស់ វាមិនមែនជាការបង្កគ្រោះថ្នាក់អ្វីទេ។ កំហុសនោះ សមនឹងទទួលបានកាតលឿងច្រើនជាង។ វាជារឿងមិនត្រឹមត្រូវ និងអយុត្តិធម៌។ ពិតណាស់ យើងនឹងប្ដឹងតវ៉ា»។
ទោះបីយ៉ាងណា លោក Ancelotti ទទួលស្គាល់ថា ក្រុមលោកពិតជាលេងមិនល្អមែន ដោយបុរសសញ្ជាតិអ៊ីតាលីវ័យ ៦១ ឆ្នាំ ប្រាប់ថា៖ «យើងលេងមិនបានល្អឡើយ ពោលគឺ Southampton ល្អជាងយើង ដូច្នេះពួកគេសមនឹងឈ្នះ។ ខ្ញុំបាននិយាយទៅកីឡាករទាំងអស់ថា រដូវរងា ជិតមកដល់ហើយ ហើយត្រូវប្រឈមនឹងវា»។
ដោយអវត្តមានកីឡាករ Richarlison ដែលជាប់ពិន័យ និង Seamus Coleman ដែលមានរបួស បន្ទាប់ពីជំនួបរវាងក្រុមគូប្រជែងក្នុងក្រុងតែមួយ គឺ Liverpool ដែលបញ្ចប់ទៅក្នុងលទ្ធផល ២-២ កាលពីសប្ដាហ៍មុន នៅប្រកួតនេះ ក្រុម Everton ហាក់គ្មានសម្ទុះ (ថាមពល) និងគុណភាព ដែលជាចំណុចគួរឱ្យចាប់អារម្មណ៍យ៉ាងខ្លាំងពេលពួកគេចាប់ផ្ដើមយុទ្ធនាការរបស់ខ្លួននារដូវកាលនេះឡើយ។
អ្នកចាំទី Jordan Pickford របស់ Everton ឃើញមានសកម្មភាពលើកដំបូងតាំងពីមានរឿងចម្រូងចម្រាសពាក់ព័ន្ធនឹងការឈូសស្កាត់របស់គេ រហូតធ្វើឱ្យខ្សែការពារ Virgil van Dijk របស់ Liverpool មានរបួសជង្គង់ធ្ងន់ធ្ងរ ខណៈទង្វើនោះនាំឱ្យមានការប្រើពាក្យមើលងាយមើលថោកចំពោះកីឡាករអន្តរជាតិអង់គ្លេស នៅតាមបណ្ដាញសង្គម។
ប៉ុន្តែ Everton នៅតែឈរទី ១ ក្នុងតារាងពីលើក្រុមគូប្រជែង និងជាជើងឯកចាស់ Liverpool ដដែល ទោះមាន ១៣ ពិន្ទុស្មើគ្នាក៏ដោយ ព្រោះមានគ្រាប់បាល់ចំណេញច្រើនជាង ខណៈ Southampton ហក់ឡើងទៅលេខ ៦ ដោយមាន ១០ ពិន្ទុ ហើយក្រោយចប់ប្រកួតនេះ ក្រុមរបស់លោក Ralph Hasenhuttl ចាញ់តែ ២ ដងប៉ុណ្ណោះ ក្នុងចំណោមការប្រកួត ១៣ លើកចុងក្រោយក្នុងលីគ៕ AFP/VN