Bale តែតបាល់ក្នុងការប្រកួតពីថ្ងៃទី ១១ ខែមិថុនា ឆ្នាំ ២០១៩។ រូបថត AFP
.jpg)
ក្រុងម៉ាឌ្រីដៈ កីឡាករ Gareth Bale នៅក្លិប Real Madrid បានចូលលេងជាលើកដំបូងក្នុងការប្រកួតមិត្តភាពមុនរដូវកាលចំនួន ៤ លើកកាលពីថ្ងៃចន្ទដើម្បីបង្ហាញថា រូបគេនៅតែអាចមានតួនាទីដដែលក្រោមការដឹកនាំរបស់លោក Zinedine Zidane។
ខ្សែប្រយុទ្ធសញ្ជាតិវេលស៍ Bale បានចូលលេង ខណៈក្រុម Madrid បានប្រកួតស្មើគ្នា ២-២ ជាមួយក្លិប Roma នៅកីឡដ្ឋាន Stadio Olimpico មុនពេលក្រុមនេះចាញ់ការប្រកួតមិត្តភាពនេះដោយការស៊ុតបាល់ប៉េណាល់ទី។
ក្រោយពីការប្រកួតនេះហើយលោក Zidane ក៏ត្រូវបានគេសួរនាំពាក់ព័ន្ធនឹងការចុះកុងត្រាទិញខ្សែប្រយុទ្ធ Neymar មកពីក្លិប PSG ផងដែរ ប៉ុន្តែលោកបានបដិសេធឆ្លើយនឹងសំណួរនេះ។
នេះជាការប្រកួតកម្ដៅសាច់ដុំចុងក្រោយ និងជាលើកទី ៧ របស់ក្លិប Madrid នៅមុនពេលចាប់ផ្ដើមការប្រកួតក្របខ័ណ្ឌអេស្ប៉ាញ LaLiga នៅចុងសប្ដាហ៍ក្រោយនេះ ប៉ុន្តែក្នុងចំណោមការប្រកួតទាំង ៧ លើកនេះគឺកីឡាករ Bale ចូលលេងបានតែ ៣ ប្រកួតប៉ុណ្ណោះដែលក្នុងការប្រកួតនីមួយៗក្នុងនាមជាកីឡាករជំនួសទាំងអស់។
កីឡាករ James Rodriguez ដែលគេរំពឹងថានឹងចេញពីក្លិប Madrid នៅរដូវក្ដៅនេះក៏មិនត្រូវបានដាក់ឲ្យចូលលេងក្នុងការប្រកួតជាមួយក្លិប Roma នេះផងដែរ។
លោក Zidane បាននិយាយក្រោយមកទៀតថា៖ «កីឡាករ Bale និង James គឺជាកីឡាកររបស់ក្លិប Real Madrid ខណៈអ្វីៗអាចកើតឡើងរហូតថ្ងៃទី ៣១ ខែសីហា ប៉ុន្តែយើងកំពុងរាប់បញ្ចូលជាកីឡាករយើងទាំងអស់ពេលនេះ»។
ជុំវិញលទ្ធភាពចង់បានខ្សែប្រយុទ្ធ Neymar ដែលគេរាយការណ៍ថា ចង់ចេញពីក្លិប PSG ទៅចូលរួមនឹងក្លិប Barcelona វិញនោះ លោក Zidane បាននិយាយថា៖ «យើងនៅទីនេះជាមួយសមាជិកក្រុមដែលយើងមាន ហើយយើងគ្រាន់តែគិតពីបញ្ហានោះតែប៉ុណ្ណោះ»។
លោក Zidane បានបញ្ជាក់ច្បាស់ថា កីឡាករ Bale មិនមែនជាផ្នែករបស់ផែនការគាត់សម្រាប់ក្លិប Real Madrid នៅរដូវកាលថ្មីនេះទេ ហើយកីឡាករវេលស៍រូបនេះមិនបានចូលរួមការប្រកួតមុនរដូវកាល ៣ លើកដែលទី ១ ជាមួយក្លិប RB Salzhurg, ក្លិប Fenerbahce និង Tottenham។
ប៉ុន្តែក្រោយពីផែនការទៅប្រទេសចិនត្រូវបានបរាជ័យ និងរដូវកាលដោះដូរកីឡាករនៅក្របខ័ណ្ឌ Premier League ត្រូវបានបិទបញ្ចប់នោះ ខ្សែប្រយុទ្ធ Bale បានត្រឡប់ទៅចូលរួមនឹងក្លិបនេះវិញដោយបានចូលលេងនៅរយៈពេលកន្លះម៉ោង ចុងក្រោយនៃការប្រកួតជាមួយក្លិប Roma៕ SN
