Barty វាយបកកូនបាល់ត្រឡប់ទៅគូប្រជែងក្នុងការប្រកួត Australian Open ពីថ្ងៃអង្គារ។ រូបថត AFP
.jpg)
ក្រុងស៊ីដនី៖ កីឡាការិនីជាប់លេខ ១ ពិភពលោក Ashleigh Barty បានអស់ក្ដីកង្វល់កាលពីថ្ងៃអង្គារ មុនពេលឆ្លងកាត់ការប្រកួតបើកឆាកនៅព្រឹត្តិការណ៍ Adelaide International ដោយបានឈ្នះកីឡាការិនី Anastasia Pavlyuchenkova ក្នុង ៣ សីតដ៏លំបាក។
កីឡាការិនីដែលបានចាញ់នៅជុំទី ១ នៅការប្រកួត Memorial Drive រូបនេះបានប្រកួតយ៉ាងស្វិតស្វាញ ដើម្បីយកឈ្នះគូប្រជែងសញ្ជាតិរុស្ស៊ីដ៏មានបទពិសោធរបស់ខ្លួនក្នុងលទ្ធផល ៤-៦, ៦-៣, ៧-៥ ហើយបានកក់កៅអីនៅវគ្គ ៨ នាក់ចុងក្រោយ។
កីឡាការិនីអូស្ត្រាលីរូបនេះបាននិយាយថា៖ «ខ្ញុំអាចលេងតាមស្ទីលរបស់ខ្ញុំ និងគ្រប់គ្រងការប្រកួតបានច្រើនបន្តិចនៅក្នុងសិតទី ៣»។
កីឡាការិនីរូបនេះបានបន្ថែមថា៖ «ប៉ុន្តែគូប្រជែងខ្ញុំបានរត់យកកូនបាល់មិនបានល្អ។ ខ្ញុំសប្បាយចិត្តដែលបានឆ្លងកាត់ និងមានឱកាសលេងនៅវគ្គបន្តទៀតនៅទីនេះ»។
កីឡាការិនីវ័យ ២៣ ឆ្នាំរូបនេះបានចាញ់ការប្រកួតបើកឆាករបស់រូបនាងកាលពីសប្តាហ៍មុននៅការប្រកួតពានរង្វាន់ Brisbane ហើយកំពុងស្វែងរកពេលវេលាប្រកួតដ៏សំខាន់នៅមុនពេលព្រឹត្តិការណ៍ Australian Open ចាប់ផ្តើមនៅថ្ងៃចន្ទសប្តាហ៍ក្រោយនៅទីក្រុង Melbourne ប្រទេស អូស្ត្រាលី។
កីឡាការិនីអូស្ត្រាលីដែលបានឈ្នះពានរង្វាន់ French Open កាលពីឆ្នាំមុននោះបាននិយាយថា រូបនាងមិនខ្វល់ពីចំណាត់ថ្នាក់នោះទេខណៈដែលរូបនាងកំពុងមានចំណាត់ថ្នាក់កំពូលរបស់សមាគម វាយកូនបាល់ពិភពលោក ដែលហៅកាត់ថា WTA។
កីឡាការិនី Barty បាននិយាយថា៖ «វាជាការធ្វើដំណើរដ៏អស្ចារ្យមួយសម្រាប់ខ្ញុំ និងក្រុមរបស់ខ្ញុំ»។
កីឡាការិនីរូបនេះបានបន្ថែមថា៖ «វាជាឆ្នាំដែលកន្លងទៅដ៏រហ័សមួយប៉ុន្តែខ្ញុំបានត្រឡប់មកប្រកួត និងធ្វើអ្វីដែលខ្ញុំបានកំណត់រួចហើយ»។
ទន្ទឹមនេះដែរ អតីតម្ចាស់ជើងឯក US Open គឺកីឡាការិនី Sloane Stephens ធ្វើមិនបានល្អទេដោយប្រកួតចាញ់កីឡាការិនីអូស្ត្រាលីជាប់ចំណាត់ថ្នាក់ទី ២០១ គឺកីឡាការិនី Arina Rodionova ក្នុងលទ្ធផល ៦-២, ៦-២។
កីឡាការិនីសញ្ជាតិអាមេរិកដែលការប្រកួតចុងក្រោយរបស់រូបនាងបានឈ្នះនៅជុំទី ២ នៅទីក្រុងប៉េកាំង ប្រទេស ចិន កាលពីថ្ងៃទី ១ ខែតុលានោះ បានចាញ់ក្នុងការប្រកួតរយៈពេល ៧២ នាទី ដោយវាយឲ្យទាក់សឺវីស ៤ លើក។
កីឡាការិនី Rodionova បាននិយាយថា៖ «នេះគឺជាជ័យជម្នះធំលើកទី ៣ របស់ខ្ញុំនៅសប្ដាហ៍នេះ ហើយនេះខ្ញុំមិនទាន់រាប់បញ្ចូលជ័យជម្នះផ្សេងទៀតទេ»។
កីឡាការិនីរូបនេះបានបន្ថែមថា៖ «សង្ឃឹមថា ខ្ញុំអាចបន្តដំណើរទៅមុខទៀត។ វាតែងតែប្រសើរដែលទទួលបានជ័យជម្នះដ៏អស្ចារ្យនៅក្នុងការប្រកួតជាមួយកីឡាការិនីឆ្នើមៗបែបនេះដែលធ្វើឲ្យខ្ញុំមានអារម្មណ៍ល្អបំផុតពីខ្លួនឯងឥឡូវនេះ»៕ AFP/SN
