Thomas Mueller (ស្តាំ) របស់ Bayern និង Kasim Adams Nuhu របស់ Hoffenheim's ។ AFP
.jpg)
ក្រុងប៊ែរឡាំង: Bayern Munich កំពុងតែមានអារម្មណ៍ជឿជាក់ខ្ពស់ក្នុងការប្រជែងរបស់ពួកគេដើម្បីតាមឲ្យទាន់ក្រុមកំពុងនាំមុខលើតារាង Bundesliga គឺ Borussia Dortmund ខណៈដែលក្រុមម្ចាស់ជើងឯកអាល្លឺម៉ង់មួយនេះនឹងចាប់ផ្តើមយុទ្ធនាការពាក់កណ្តាលរដូវកាលចុងក្រោយរបស់ពួកគេជាមួយនឹងការធ្វើដំណើរទៅកាន់ទឹកដីក្រុង Hoffenheim នៅរាត្រីនេះ។
សម្រាប់រយៈពេលជាលើកទី ១ ចាប់តាំងពីខែមករាឆ្នាំ ២០១១ ក្រុម Bayern មិនស្ថិតនៅលើកំពូលតារាងនៃក្របខ័ណ្ឌលីកក្រោយពីសម្រាករដូវរងា ខណៈពួកគេដេញតាមពីក្រោយក្រុម Dortmund ចំនួន ៦ ពិន្ទុ ប៉ុន្តែក្រុមរបស់លោក Niko Kovac ជឿជាក់ថាពួកគេអាចឡើងឈរពីលើគូប្រកួតរបស់ខ្លួនវិញ និងឈ្នះពានក្របខ័ណ្ឌ Bundesliga ជាលើកទី ៧ ជាប់ៗគ្នា។
ខ្សែការពារ Niklas Suele ដែលនឹងត្រូវចាប់ដៃគូជាមួយនឹងកីឡាករ Jerome Boateng នៅតំបន់ការពារកណ្តាលលើទឹកដីក្រុម Hoffenheim ដោយសារតែការអវត្តមានរបស់ខ្សែការពារអន្តរជាតិអាល្លឺម៉ង់ Mats Hummels បាននិយាយថា៖ «គ្មាននរណាម្នាក់នៅទីនេះដែលមិនជឿជាក់ថាយើងនឹងក្លាយជាម្ចាស់ជើងឯកឡើយ ការដេញតាមពីក្រោយ ៦ ពិន្ទុមិនមែនជាចុងបញ្ចប់នៃពិភពលោកឡើយ»។
អ្នកចាំទី Manuel Neuer ប្រធានក្រុមនៃក្រុម Bayern បានបញ្ជាក់ថា «គ្មានអ្វីដែលធ្វើឲ្យយើងចាប់អារម្មណ៍» ជាងការឈ្នះពានក្របខ័ណ្ឌលីកក្រោយពីក្រុម Bayern បានផ្តួលក្រុម Borussia Moenchengladbach ដោយការស៊ុតបាល់ប៉េណាល់ទីក្នុងវគ្គផ្តាច់ព្រ័ត្រនៃយុទ្ធនាការតូចមួយដែលមានក្រុមចូលរួមចំនួន ៤ ក្នុងទីក្រុង Duesseldorf។ ស្របពេលជាមួយគ្នានេះលោក Hasan Salihamidzic ប្រធានផ្នែកកីឡារបស់ Bayern ជឿជាក់ថា៖ «បទពិសោធ ពិតជាសំខាន់ណាស់ ហើយយើងមានក្រុមមួយដែលមានបទពិសោធគ្រប់ការប្រកួតទាំងអស់»។
លោក Lothar Matthaeus អតីតប្រធានក្រុមនៃក្រុមជម្រើសជាតិអាល្លឺម៉ង់ និងជាអតីតកីឡាករដ៏ឆ្នើមរបស់ Bayern បាននិយាយថាពាននេះនឹងត្រូវកាត់សេចក្តីដោយក្រុមណាដែលសម្របខ្លួនបានល្អបំផុតទៅនឹងតួនាទីថ្មីរបស់ពួកគេក្នុងការប្រជែងពាន។
លោកបានឲ្យដឹងថា៖ «Dortmund កំពុងតែរងនូវការប្រជែងតាមពីក្រោយ ហើយក្រុម Bayern ក៏កំពុងតែស្ថិតក្នុងការប្រជែងតាមពីក្រោយដែរ។ នោះគឺជាតួនាទីថ្មីសម្រាប់ក្រុមទាំង ២ ហើយក្រុមណាដែលអាចសម្របខ្លួនបានល្អបំផុតនឹងឈ្នះពាន»។
ក្នុងការប្រកួតកម្តៅសាច់ដុំសម្រាប់ Bundesliga តារាឆ្នើមកាណាដាទើបតែរះ Alphonso Davies វ័យ ១៨ ឆ្នាំបានបង្ហាញខ្លួនជាលើកទី ១ របស់គេសម្រាប់ Bayern ក្រោយពីការផ្ទេរក្នុងតម្លៃខ្លួន ១៣ លានផោនរបស់គេពីក្លិប Vancouver Whitecaps របស់ក្របខ័ណ្ឌ MLS។
ការចុះហត្ថលេខានេះបង្ហាញពីគោលនយោបាយទិញកីឡាកររបស់ Bayern ក្នុងការស្វែងរកកីឡាករវ័យក្មេងមកជំនួសតារាឆ្នើមវ័យចាស់ និងពង្រឹងក្រុមរបស់ពួកគេ។ ខ្សែការពារ Benjamin Pavard វ័យ ២២ ឆ្នាំសមាជិកឈ្នះពាន World Cup ជាមួយក្រុមបារាំងត្រូវបានប្រកាសរួចជាស្រេចថានឹងចូលរួមជាមួយនឹងក្លិប Bayern ពីក្លិប Stuttgart នៅខែកក្កដា៕ IS
