ក្រុងប៊ែរឡាំង៖ ក្លិប Bayern Munich ដែលជាក្រុមយក្សនៅក្របខ័ណ្ឌ Bundesliga របស់ប្រទេស អាល្លឺម៉ង់ បានបង្ហើបថា ពួកគេបានឲ្យកីឡាករក្នុងក្រុមត្រឡប់ទៅហ្វឹកហាត់វិញ ជាលើកដំបូងកាលពីថ្ងៃចន្ទម្សិលមិញ គិតតាំងពីមានការផ្អាកការប្រកួតបណ្ដោះអាសន្ន ដោយសារវីរុសកូរ៉ូណា។
មុនការប្រកួតត្រូវបានប្រកាសផ្អាកកាលពីថ្ងៃទី ១៣ ខែមីនា ក្រុមដែលមានរហស្សនាមថា «The Bavarians» កំពុងនាំមុខក្រុមលេខ ២ Borussia Dortmund ៤ ពិន្ទុ ក្រោយការប្រកួតបានបញ្ចប់ទៅទាំងស្រុង ២៥ សប្ដាហ៍។
ក្នុងសេចក្ដីប្រកាសរបស់ក្លិប កាលពីព្រឹកថ្ងៃចន្ទបានឲ្យដឹងថា៖ «ក្រុមឈុតធំរបស់ Bayern Munich ត្រឡប់មកហ្វឹកហាត់វិញក្នុងទម្រង់ជាក្រុមតូចៗ នៅថ្ងៃចន្ទទី ៦ ខែមេសា។ កិច្ចការនេះត្រូវបានធ្វើឡើងមិនផ្ទុយនឹងគោលនយោបាយរបស់រដ្ឋាភិបាលឡើយ ដោយយើងមានការរួមសហការពីអាជ្ញាធរពាក់ព័ន្ធទាំងអស់។ ការហ្វឹកហាត់នេះ ធ្វើឡើងជាមួយគោលការណ៍អនាម័យ ដែលគ្រប់គ្នាត្រូវគោរពតាមយ៉ាងតឹងរ៊ឹង»។
ក្លិបដែលឈ្នះពានលីកកំពូលច្រើនជាងក្រុមផ្សេងៗ នៅអាល្លឺម៉ង់ Bayern Munich បានបន្ថែមក្នុងសេចក្ដីប្រកាសនោះទៀតថា៖ «ដើម្បីបន្ថយការរាលដាលនៃវីរុសកូរ៉ូណាឲ្យនៅកាន់តែទាប ក្លិប Bayern សុំឲ្យអ្នកគាំទ្រទាំងអស់ គោរពតាមបទប្បញ្ញត្តិរបស់អាជ្ញាធរ ហើយព្រោះតែហេតុនេះ សុំមេត្តាកុំធ្វើដំណើរមកកាន់ទីកន្លែងហ្វឹកហាត់របស់ក្រុមធ្វើអី»។
ប្រទេស អាល្លឺម៉ង់ ក៏ជាប្រទេសមួយដែលរងផលប៉ះពាល់យ៉ាងខ្លាំងពីការផ្ទុះឡើងនៃជំងឺកូវីដ ១៩ ដោយមានមនុស្សជាង ១ ៣០០ នាក់ត្រូវបានគេរាយការណ៍ថា បានបាត់បង់ជីវិត ហើយពីដំបូងក្រុមអ្នករៀបចំការប្រកួតក្របខ័ណ្ឌ Bundesliga បានសម្រេចផ្អាកការប្រកួតត្រឹមថ្ងៃទី ២ ខែមេសា តែឥឡូវនេះពួកគេបានពន្យារពេលបន្ថែមទៀតរហូតដល់ថ្ងៃទី ៣០ ខែ មេសា ឆ្នាំ ២០២០៕ AFP/VN