ការប្រកួតជម្រុះវគ្គ ១៦ ក្រុម Champions League រវាងក្រុម Liverpool (ក្រហម) និងក្រុម Atletico Madrid។ រូបថត AFP
.jpg)
សហព័ន្ធកីឡាបាល់ទាត់សហភាពអឺរ៉ុប ហៅកាត់ថា UEFA បានសម្រេចប្រកាសជាផ្លូវការឲ្យផ្អាកការប្រកួតវគ្គផ្ដាច់ព្រ័ត្រទាំងក្នុងក្របខ័ណ្ឌ Champions League និង Europa League ហើយការសម្រេចផ្អាកភ្លាមៗនេះ ដោយសារវិបត្តិនៃវីរុសកូរ៉ូណាបានរីករាលដាលហាក់មិនថមថយសោះ។
តាមការគ្រោងទុកការប្រកួតដណ្ដើមពានដ៏ធំជាងគេប្រចាំទ្វីបអឺរ៉ុប គឺ UEFA Champions League ក្នុងវគ្គផ្ដាច់ព្រ័ត្រ នឹងប្រព្រឹត្តទៅក្នុងទីក្រុង Istanbul របស់ប្រទេស តួកគី នាថ្ងៃទី ៣០ ខែឧសភា ខណៈពានលំដាប់ទី ២ គឺ UEFA Europa League នឹងធ្វើឡើងមុន ៣ ថ្ងៃ នៅក្នុងទីក្រុង Gdansk នៃប្រទេស ប៉ូឡូញ។
ទោះជាយ៉ាងណា ការប្រកួតទាំងនោះ រួមទាំងការប្រកួតក្របខ័ណ្ឌ Champions League ក្នុងវគ្គផ្ដាច់ព្រ័ត្រផ្នែកនារីផង ដែលកាលពីដំបូងឡើយ បម្រុងរៀបចំនៅក្រុងវីយែន របស់ប្រទេស អូទ្រីស នោះ នឹងត្រូវផ្អាកជាបណ្ដោះអាសន្នដោយរង់ចាំការកំណត់ពេលវេលាប្រកួតជាថ្មី។
ទោះមានសេចក្ដីប្រកាសបញ្ឈប់រាល់ការប្រកួតប្រចាំអឺរ៉ុបរបស់ UEFA ក៏ដោយ ក៏ហាក់មិនបានធ្វើឲ្យគ្រប់គ្នាភ្ញាក់ផ្អើលនោះដែរ ព្រោះការប្រកួតបាល់ទាត់ក្នុងលីកជាច្រើន ត្រូវបានប្រកាសផ្អាកបន្តបន្ទាប់គ្នា ជាពិសេសក្របខ័ណ្ឌធំៗនៅអឺរ៉ុបតែម្ដង ក្រោយមានការផ្ទុះឡើងនូវវីរុសកូរ៉ូណានេះដូចគ្នា។
ក្រុមការងារ ដែលត្រូវបានបង្កើតឡើងកាលពីសប្តាហ៍មុន ក្រោយពីមានកិច្ចប្រជុំរវាងអ្នកពាក់ព័ន្ធទាំងអស់នៃបាល់ទាត់នៅអឺរ៉ុប គឺដើម្បីធ្វើការវិភាគនូវជម្រើសដែលអាចទៅរួច សម្រាប់រៀបចំការប្រកួតជាថ្មី។
នៅក្នុងសេចក្ដីប្រកាសផ្លូវការមួយរបស់ខ្លួន UEFA បានអះអាងថា៖ «សហព័ន្ធបានសម្រេចការប្រកួតជាបណ្ដោះអាសន្នសិន។ ក្រុមការងាររបស់យើង បានចាប់ផ្ដើមធ្វើការពិនិត្យកាលបរិច្ឆេទថ្មី ហើយសេចក្ដីប្រកាសនឹងត្រូវធ្វើឡើងក្នុងពេលវេលាដ៏សមរម្យមួយ»។
សម្រាប់ក្របខ័ណ្ឌ Champions League ដែលពេលនេះឈានដល់វគ្គ ១៦ ក្រុមចុងក្រោយ ឃើញថា ៨ ក្រុម បានធ្វើការប្រកួតគ្នារួចរាល់ហើយ ក្នុងនោះក្រុមដែលបន្តដំណើររបស់ខ្លួនទៅវគ្គបន្ទាប់ មាន ៤ ក្រុម ដូចជា Paris Saint-Germain របស់ប្រទេស បារាំង ក្រុមរបស់អ៊ីតាលី Atalanta, Atletico Madrid ជាក្រុមនៃប្រទេស អេស្ប៉ាញ និងក្រុមរបស់ប្រទេស អាល្លឺម៉ង់ RB Leipzig។
ដោយឡែកសម្រាប់ការប្រកួតក្របខ័ណ្ឌ Europa League ក៏កំពុងស្ថិតក្នុងវគ្គដូចគ្នាដែរ ប៉ុន្តែមានត្រឹម ៦ គូរប៉ុណ្ណោះ ដែលបានបញ្ចប់ប្រកួតជើងទី ១ របស់ខ្លួន ហើយជាលទ្ធផលក្រុមម្ចាស់ផ្ទះ Wolves បានស្មើ ១-១ ជាមួយក្រុម Olympiacos ប៉ុន្តែ Bayer បានយកឈ្នះក្រុមភ្ញៀវ Rangers ៣-១។
ចំណែកក្រុមម្ចាស់ផ្ទះ FC Basel បានយកឈ្នះក្រុម Eintracht ៣-០ ខណៈ Man United បានលត់ក្រុម LASK ៥-០ ហើយក្រុមម្ចាស់ផ្ទះ Roma បានត្រឹមស្មើ ០-០ ជាមួយក្រុម Sevilla ប៉ុន្តែវាប្រសើរជាងក្រុម Kobenhavn ដែលបានចាញ់ក្រុម Istanbul Basaksehir ១-០ នោះលើទឹកដីខ្លួនឯង។
ដោយឡែកសម្រាប់ការប្រកួត Champions League ផ្នែកនារីវិញ បានឡើងដល់វគ្គ ៨ ក្រុមចុងក្រោយហើយ ខណៈប្រកួតជើងទី ១ គ្រោងធ្វើនៅថ្ងៃទី ២៥ ខែមីនា ហើយប្រកួតជើងទី ២ ប្រុងរៀបចំនៅថ្ងៃទី ១ ខែមេសា ប៉ុន្តែគ្រប់ការប្រកួតត្រូវបានបញ្ឈប់ ដោយសារការរាតត្បាតរបស់វីរុសកូរ៉ូណា ដែលផ្ដាច់ជីវិតមនុស្សជាង ១៦ ០០០ នាក់ ហើយនៅទូទាំងពិភពលោក៕ VN
