ម៉ា្រឌីដ៖ ខ្សែប្រយុទ្ធ Joao Felix ទម្លុះសំណាញ់ទីបាន ២ គ្រាប់ ក្នុងនោះរួមទាំងគ្រាប់ជ័យជម្នះនៅចុងម៉ោងផង ខណៈក្រុមយក្សអេស្ប៉ាញ Atletico Madrid តាមពីក្រោយរហូតយកឈ្នះក្រុម Salzburg របស់អូទ្រីស ៣-២ បានវិញ នៅទឹកដីខ្លួនឯង អំឡុងការប្រកួតនៅក្របខ័ណ្ឌកំពូលអឺរ៉ុប Champions League កាលពីថ្ងៃអង្គារ។
ក្រោយបរាជ័យយ៉ាងដំណំក្រោមថ្វីជើងក្រុមជើងឯកចាស់ Bayern Munich នៅអាល្លឺម៉ង់ កាលពីសប្ដាហ៍មុន ការភ្លាត់ទទួលបានលទ្ធផលអាក្រក់ម្ដងទៀត នឹងធ្វើឱ្យក្ដីសង្ឃឹមរបស់ Atletico ក្នុងការឆ្លងផុតពីពូល A ស្ថិតក្នុងភាពមិនច្បាស់លាស់ខ្ពស់ជាមិនខាន។
តែ ២ គ្រាប់ របស់កីឡាករអន្តរជាតិព័រទុយហ្គាល់ Felix ស្រោចស្រង់បាននូវជ័យជម្នះដ៏សំខាន់នៅកីឡដ្ឋាន Wanda Metropolitano ដែលក្រុម Salzburg ស៊ុតផ្ទួនៗ ត្រឡប់មកនាំមុខ ២-១ ដោយកីឡាករ Dominik Szoboszlai និង Mergim Berisha មុនចប់វគ្គទី១ បន្ទាប់ពីខ្សែបម្រើ Marcos Llorente ជួយឱ្យក្រុមម្ចាស់ផ្ទះមានគ្រាប់បាល់មុននៅដើមតង់។
ក្រុមរបស់លោក Diego Simeone នាសប្ដាហ៍ក្រោយ នឹងធ្វើដំណើរទៅសួរសុខទុក្ខក្រុម Lokomotiv Moscow ដែលកំពុងនៅបាតតារាង ក្រោយក្រុមរបស់រុស្ស៊ី ១ នេះ ចាញ់ក្រុម Bayern នៅផ្ទះខ្លួនឯង ២-១។
សម្រាប់កីឡាករ Felix ឥឡូវនេះ ស៊ុតបញ្ចូលទីបាន ៤ គ្រាប់ហើយ ឱ្យក្រុម Atletico ក្នុងចំណោម ៧ ប្រកួត ក្នុងអំឡុងពេលនេះ ដោយរក្សាការចាប់ផ្ដើមដ៏វិជ្ជមានរបស់ខ្លួនបន្តទៀតនៃរដូវកាលនេះ ក្នុងការចាប់ដៃគូជាមួយកីឡាករចំណូលថ្មី Luis Suarez ស្របពេលអវត្តមានកីឡាករមានរបួស Diego Costa។
ក្រោយការប្រកួតបញ្ចប់ទៅ Felix និយាយថា៖ «នៅពេលខ្ញុំលេងនៅ Champions League វាជាអ្វី ដែលខ្ញុំចូលចិត្តបំផុត ដោយអ្នកបានឃើញនូវភាពរីករាយនោះ ពេលខ្ញុំកំពុងលេង»។
ក្រោយចប់ប្រកួតទី២ នេះ នៅពូល A ក្រុមការពារជើងឯក Bayern កំពុងឈរលេខ ១ ក្រោយដណ្ដើមបាន ៦ ពិន្ទុពេញ តាមពីក្រោយដោយ Atletico ដែលមាន ៣ ពិន្ទុ បន្ទាប់ពីឈ្នះលើកដំបូងនេះ ខណៈក្រុមលេខ ៣ Salzburg និងលេខ ៤ Lokomotiv មាន ១ ពិន្ទុស្មើគ្នា៕ AFP/VN