ក្រុងឡុងដ៍ៈ គ្រូបង្វឹកក្លិប Chelsea លោក Frank Lampard បានវាយបកចំពោះការរិះគន់របស់លោក Jose Mourinho ក្រោយពីក្រុមនេះបានចាញ់ក្រុម Man Utd ៤-០ ពីថ្ងៃអាទិត្យ។
ការប្រកួតស្វិតស្វាញក្រោមការដឹកនាំលើកដំបូងរបស់លោក Lampard ដែលជាការចាប់ផ្ដើមរបស់ក្លិបលេងនៅក្របខ័ណ្ឌ Premier League នេះ បានបញ្ចប់ទៅដោយការចាញ់ទាំងស្រុងនៅកីឡដ្ឋាន Old Trafford កាលពីថ្ងៃអាទិត្យដោយកីឡាករ Marcus Rashford រកបាន ២ គ្រាប់គឺនៅនាទីទី ១៨ និងនាទីទី ៦៧ ហើយកីឡាករ Anthony Martial រកបាន ១ គ្រាប់ទៀតនៅនាទីទី ៦៥ នៅមុនពេលកីឡាករ Daniel James បន្ថែម ១ គ្រាប់ចុងក្រោយនៅនាទីទី ៨១។
គ្រូបង្វឹកក្លិប Man Utd លោក Mourinho អតីតគ្រូបង្វឹកក្លិប Chelsea បានរិះគន់ចំពោះការជ្រើសរើសកីឡាករឲ្យចូលលេងរបស់លោក Lampard ដោយនិយាយថា កីឡាករដែលមានបទពិសោធជាច្រើនដូចជា កីឡាករ N''Golo Kante, Marcos Alonso, និង Oliver Giroud ជាដើមគួរតែដាក់ឲ្យចូលលេង ខណៈកំពុងមានបញ្ហាចោទជាច្រើនជុំវិញទម្រង់លេងរបស់កីឡាករ Mason Mount, Tammy Abraham និង Andreas Christensen។
លោក Lampard ហាក់ដូចជាមានការភ្ញាក់ផ្អើលចំពោះការលើកឡើងរបស់លោក Mourinho ដោយអះអាងថា ការរងរបួសគឺជាហេតុផលដែលនាំឲ្យមានការជ្រើសរើសកីឡាករឲ្យចូលលេងបែបនេះនៅក្នុងការប្រកួតបើកឆាកនៅរដូវកាលថ្មី។
គ្រូបង្វឹករូបនេះបានប្រាប់សន្និសីទកាសែតថា៖ «គាត់មិនចូលចិត្តទម្រង់លេងរបស់កីឡាករ Mason Mount ឬ? តើនោះជាអ្វីដែលគាត់ចង់មានន័យឬ?»។
លោក Lampard និយាយថា៖ «ខ្ញុំមិនអាចអូសកីឡាករចេញពីបន្ទប់ព្យាបាលឲ្យមកចូលលេងបានទេប្រសិនបើពួកគេមាន ឬគ្មានបទពិសោធក៏ដោយដូច្នេះនេះជាកីឡាករដែលបានលេងក្នុងការប្រកួតដែលយើងពិតជាក្រុមល្អបានរយៈពេល ៤៥ ទៅ ៦០ នាទី»។
គ្រូបង្វឹករូបនេះបានបន្ថែមថា៖ «អ្វីជាភ័ស្តុតាងនោះគឺថា យើងបានប្រពឹត្តកំហុសមួយចំនួនដែលនាំឲ្យមានការស៊ុតបញ្ចូលទីក្នុងចំណោមឱកាសស៊ុតទាំង ៥ លើករបស់ពួកគេ ដូច្នេះហើយវាមានតថភាពចំពោះយើង»។
លោក Lampard បានបន្តថា៖«ខ្ញុំមិនត្រូវព្រួយបារម្ភពេកពីអ្វីដែលនរណាម្នាក់និយាយរិះគន់នោះទេ ព្រោះវាជាសិទ្ធិរបស់ពួកគេ ប៉ុន្តែខ្ញុំត្រូវគិតពីអ្វីដែលពិតប្រាកដគឺថា ក្រុមរបស់យើងមានទម្រង់លេងល្អ និងមានទំនុកចិត្តខ្ពស់»។
កីឡាករ Giroud និងកីឡាករ Kante ត្រូវបានដាក់ឲ្យចូលលេង ខណៈកីឡាករអាមេរិក Christian Pulisic ក៏បានចូលលេងសម្រាប់ការប្រកួត Premier League នៅក្នុងតង់ទី ២ ផងដែរ។
លោក Lampard បានពន្យល់ពីការសម្រេចចិត្តរបស់គាត់ក្នុងការមិនដាក់កីឡាករអាមេរិករូបនេះក្នុងជម្រើសដំបូងដែលរូបគេបានទៅដល់ក្លិបនេះក្នុងការបិទបញ្ចប់រដូវកាលក្រោយពីបានចុះកុងត្រាទិញពីក្លិប Borussia Dortmund ពីខែមករាក្នុងតម្លៃខ្លួន ៥៨ លានផោនស្មើនឹង ៦២,៣ លានដុល្លារ។
គ្រូបង្វឹករូបនេះបានបញ្ជាក់ថា៖ «Cristian Pulisic មានអាយុ ២០ ឆ្នាំ ហើយគាត់នឹងក្លាយជាកីឡាករឆ្នើមមួយរូបសម្រាប់ក្លិបនេះ ព្រោះគាត់មានសមត្ថភាពអស្ចារ្យដូចអ្នកបានឃើញគាត់បន្តិចហើយពីល្បឿនអូសបាល់របស់គាត់ក្នុងការប្រកួតនេះ»។
គ្រូបង្វឹកដដែលនេះបានបន្តថា៖ «ប៉ុន្តែខ្ញុំក៏មានជម្រើសផ្សេងនៅក្នុងតំបន់បម្រើ និងតំបន់ផ្សេងទៀតដែរ ហើយខ្ញុំមិនចង់ផ្ដោតខ្លាំងលើ Christian ក្នុងការប្រកួតដោយមិនបានជួយគាត់នៅតាមផ្លូវនោះទេ ដូច្នេះហើយខ្ញុំក៏បានដាក់កីឡាករ Ross Barkley និង Mason ដែលមានកម្លាំងខ្លាំងឲ្យនៅអមជាមួយកីឡាករ Christian ផងដែរ»៕ SN