ក្រុងឡុងដ៍៖ ក្លិប Man Utd បានលុបចោលជំរំហ្វឹកហាត់រដូវត្រជាក់នៅតំបន់មជ្ឈិមបូព៌ា ដោយសារក្ដីកង្វល់ពីភាពតានតឹងនៅក្នុងតំបន់នេះ។
ក្រុម Man Utd តែងតែប្រើជំរំ Nad Al Sheba Sports នៅក្នុងទីក្រុងឌូបៃធ្វើជាមូលដ្ឋានហ្វឹកហាត់សម្រាប់អាកាសធាតុកក់ក្ដៅក្នុងរយៈពេលប៉ុន្មានឆ្នាំថ្មីៗនេះ ហើយក្រុមនេះគ្រោងនឹងធ្វើដំណើរទៅកាន់ជំរំនោះនៅក្នុងការឈប់សម្រាករដូវត្រជាក់លើកដំបូងសម្រាប់ក្រុមទាំងអស់ដែលលេងនៅក្របខ័ណ្ឌ Premier League នៅក្នុងពេលខាងមុខ។
ប៉ុន្តែគ្រូបង្វឹកក្រុម Man Utd លោក Ole Gunnar Solskjaer បានបញ្ជាក់ថា ផែនការទាំងនោះឥឡូវនេះត្រូវបានពន្យារពេលហើយក្រោយពីសហរដ្ឋអាមេរិកបានសម្លាប់ឧត្ដមសេនីយ៍របស់អ៊ីរ៉ង់ម្នាក់ គឺលោក Qassem Soleimani ថ្មីៗនេះ។
ការសម្លាប់នេះបានបង្កឱ្យមានភាពតានតឹងផ្នែកនយោបាយនៅក្នុងតំបន់នេះ ដូច្នេះហើយលោក Solskjaer បានសម្រេចចិត្តថា ក្រុម Man Utd នឹងមិនធ្វើដំណើរទៅប្រទេស កាតា នោះទេ ដោយសារតែព្រួយបារម្ភពីបញ្ហាសន្តិសុខរបស់ក្រុមគាត់។
លោក Solskjaer បាននិយាយថា៖ «មានរឿងមួយដែលធ្វើឱ្យខ្ញុំព្រួយបារម្ភនោះ គឺមិនមែនជាពេលដែលយើងស្ថិតនៅលើទីលានបាល់ទាត់នោះទេ ប៉ុន្តែវាអាចជារឿងផ្សេងទៀត ដែលធ្វើឲ្យព្រួយបារម្ភកាន់តែខ្លាំងជាងនោះទៅទៀត»។
គ្រូបង្វឹករូបនេះបានបន្ថែមថា៖ «យើងកំពុងតាមដានស្ថានភាពនៅតំបន់មជ្ឈិមបូព៌ា ប៉ុន្តែនោះពិតជាគ្មានអ្វីកើតឡើងនោះទេ»។
លោក Solskjaer បានបង្ហាញថា ជំនួសឲ្យការទៅប្រទេសនោះ គាត់នឹងអនុញ្ញាតឲ្យកូនក្រុមរបស់គាត់ឈប់សម្រាកក្នុងពេលសម្រាករដូវត្រជាក់នោះ ក្រោយពីពួកគេនឹងត្រូវប្រកួតជាមួយក្រុម Wolves នៅថ្ងៃទី ១ ខែកុម្ភៈ ក្នុងទឹកដីខ្លួនឯង។
គ្រូបង្វឹករូបនេះបានបញ្ជាក់ថា៖ «ខ្ញុំនឹងឲ្យពួកគេឈប់សម្រាក់ ២-៣ ថ្ងៃ អ៊ីចឹងខ្ញុំមិនដឹងថា ពួកគេនឹងធ្វើដំណើរទៅកន្លែងណានោះទេ ប៉ុន្តែយើងទាំងអស់គ្នានឹងស្ថិតនៅក្នុងតំបន់អឺរ៉ុបតែប៉ុណ្ណោះ»។
លោក Solskjaer បានចាត់ទុកការឈប់សម្រាកពាក់កណ្ដាលរដូវកាលដែលទើបបង្កើតឡើងនៅរដូវកាលនេះថាជាពេលវេលាដ៏សំខាន់សម្រាប់កូនក្រុមគាត់ ក្រោយពីបានធ្វើការប្រកួតដ៏លំបាកកន្លងមកនេះ។
ដោយក្រុមMan Utd នៅសល់ការប្រកួត ៤ លើកទៀតនោះ ការប្រកួតនៅក្នុងជុំទី ៣ ជាមួយក្រុម Wolves នៅកីឡដ្ឋាន Old Trafford ពីថ្ងៃម្សិលមិញនោះ គឺជាការប្រកួតលើកទី ១៥ ក្នុងរយៈពេល ៤៩ ថ្ងៃ ហើយតួលេខនេះនឹងឡើងដល់លេខ ១៩ ក្នុងរយៈពេល ៦៦ ថ្ងៃ នៅពេលពួកគេនឹងជួបគ្នាម្ដងទៀតនៅដើមខែកុម្ភៈ ខាងមុខនេះ។
គ្រូបង្វឹករូបនេះបាននិយាយថា៖ «ខ្ញុំគិតថា ការឈប់សម្រាកពាក់កណ្ដាលរដូវកាលនេះ គឺពិតជាសំខាន់ខ្លាំងណាស់សម្រាប់គ្រប់គ្នា»។
លោក Solskjaer បន្ថែមថា៖ «ទម្រាំដល់ពេលនោះ យើងមានការប្រកួត ៥ ឬ ៦ លើកទៀត ដូច្នេះយើងត្រូវតែប្រឹងប្រែង និងមានទម្រង់លេងល្អដើម្បីទទួលបានលទ្ធផលតាមអ្វីដែលយើងចង់បាន បន្ទាប់មកយើងនឹងសម្រាកស្រូបយកវីតាមីន D»៕ AFP/SN