Neymar (ស្ដាំ) គ្រប់គ្រងបាល់ក្នុងការប្រកួតមិត្តភាពរវាងប្រេស៊ីល និងនីហ្សេរីយ៉ា កាលពីខែតុលា។ រូប AFP
.jpg)
ក្រុងបាសេឡូណា៖ នាយកកីឡានៅក្លិប Barcelona លោក Eric Abidal បាននិយាយថា៖ «ក្លិប Barcelona តែងតែចាប់អារម្មណ៍ចំពោះកីឡាករ Neymar ប៉ុន្តែបញ្ហានៅត្រង់តម្លៃខ្លួនក្នុងការនាំយកកីឡាករនេះត្រឡប់មកវិញ»។
កីឡាករ Neymar បានប៉ុនប៉ងត្រឡប់ទៅលេងនៅក្លិបនេះវិញកាលពីរដូវកាលបិទបញ្ចប់ គឺមានរយៈពេល ២ ឆ្នាំ បន្ទាប់ពីចាកចេញទៅនៅក្លិប Paris Saint-Germain ក្នុងកុងត្រាមួយ ធ្វើឲ្យរូបគេមានតម្លៃខ្លួនថ្លៃបំផុតក្នុងប្រវត្តិសាស្ត្រ។
ក្លិប Barcelona ម្ចាស់ជើងឯក LaLiga បានជជែកជាមួយក្លិប PSG ប៉ុន្តែមិនអាចឆ្លើយតបតាមតម្រូវការរបស់ក្លិបបារាំង PSG។
លោក Abidal បានប្រាប់កាសែត Mundo Deportivo ថា៖ «កីឡាករឆ្នើមម្នាក់ដែលមានទស្សនៈចំពោះក្លិប Barcelona និងដែលមានទម្រង់លេងល្អបំផុតនោះ គឺតែងតែជាជម្រើសល្អ»។
នាយកកីឡារូបនេះបានបន្តថា៖ «យើងអាចធ្វើការសម្រេចចិត្តពីកម្រិតកីឡា ប៉ុន្តែពាក់ព័ន្ធនឹងបញ្ហាហិរញ្ញវត្ថុគឺមានរឿងច្រើនដែលអ្នកអាចធ្វើបាន ហើយអ្នកផ្សេងទៀតមិនអាចធ្វើបានទេ គឺមានតែពេលអនាគតទេនឹងប្រាប់យើងឲ្យដឹងពីបញ្ហានេះ»។
លោក Abidal បានបន្ថែមថា៖ «ខ្ញុំនឹងមិននិយាយថា វានឹងជាជម្រើសលេខ ១ នោះទេ ព្រោះរដូវកាលនេះមានរយៈពេលយូរទៅមុខ ប៉ុន្តែជាការពិតវាអាចជាជម្រើសមួយ»។
ក្លិប Barcelona បានបង្កើនចំណាប់អារម្មណ៍ចំពោះកីឡាករ Neymar កាន់តែខ្លាំងនៅចំពេលមានបំណងស្វែងរកកីឡាករ ដើម្បីបន្តវេនពីខ្សែប្រយុទ្ធ Luis Suarez ដែលកំពុងរងរបួស។
ការស្វែងរកនេះត្រូវបានគេនិយាយថា បានជំរុញឲ្យក្លិបនេះមើលឃើញខ្សែប្រយុទ្ធ Lautaro Martinez នៅក្លិប Inter ផងដែរ ប៉ុន្តែមិនទាន់ជាជម្រើសល្អពេញលេញនៅឡើយទេ៕ AFP/SN
