កីឡាករជប៉ុន Kei Nishikori វាយកូនបាល់ទៅកាន់ Ivo Karlovic វិញក្នុងការប្រកួតកាលពីថ្ងៃម្សិលមិញ។ AFP ហុង មិនា
.jpg)
ក្រុងមែលប៊ន: កីឡាករវាយកូនបាល់សញ្ជាតិជប៉ុន Kei Nishikori បានខ្ជះខ្ជាយការនាំមុខ ២ សិត នៅពេលប្រកួតជាមួយនឹងកីឡាករជើងចាស់ Ivo Karlovic និងបានប្រឈមមុខនឹងការធ្លាក់ចេញត្រឹមប្រកួតជុំទី ២ ក្នុងព្រឹត្តិការណ៍ Australian Open កាលពីថ្ងៃព្រហស្បតិ៍នៅមុនពេលយកឈ្នះក្នុងការប្រកួតសិតកាត់សេចក្តី។
កីឡាករ Karlovic វ័យ ៣៩ ឆ្នាំបានស្ថិតយ៉ាងប្រកៀកក្នុងការក្លាយជាកីឡាករវ័យចាស់ជាងគេបំផុតក្នុងការឈានទៅប្រកួតជុំទី ៣ បើគិតចាប់តាំងពីអតីតកីឡាករឆ្នើមអូស្ត្រាលី Ken Rosewall វ័យ ៤៤ ឆ្នាំធ្វើបានក្នុងឆ្នាំ ១៩៧៨ នៅមុនពេល Nishikori បានធ្វើឲ្យរូបគេវិលទៅរកការប្រជែងវិញតាមរយៈការសង្គ្រោះពិន្ទុដ៏សំខាន់ចំនួន ៣ លើកក្នុងពេលស្ថិតក្នុងពិន្ទុស្មើ ៤-៤ ក្នុងសិតចុងក្រោយ។
កីឡាករកំពូលរបស់អាស៊ីរូបនេះបានប្រើប្រាស់ពេលដល់ទៅ ៣ ម៉ោង និង ៤៨ នាទីដើម្បីយកឈ្នះលើកីឡាករ Karlovic សញ្ជាតិក្រូអាស៊ីដែលមានកម្ពស់ ២,១១ ម៉ែត្រក្នុងលទ្ធផល ៦-៣ ៧-៦ (៨/៦) ៥-៧ ៥-៧ ៧-៦ (១០/៧) ក្រោមអាកាសធាតុសើម។
ក្រោយពីលុតជង្គង់របស់គេដើម្បីបង្ហាញពីភាពធូរស្រាលក្រោមការអបអរយ៉ាងខ្លាំងពីអ្នកទស្សនាជប៉ុនលើទីលាន Margaret Court Arena កីឡាករ Nishikori ដែលឈានទៅប្រកួតវគ្គ ៨ នាក់ចុងក្រោយ ៣ លើកនៅលើទីលាន Melbourne Park បានឲ្យដឹងថា៖ «វាគឺជាការប្រកួតដ៏តានតឹងមួយដែលអាចបញ្ចប់ក្នុងលទ្ធផលទាំង ២ បាន។ រូបគេស្ទើរតែធ្វើបានទៅហើយ»។
ស្របពេលជាមួយគ្នានេះកីឡាការិនី Karolina Pliskova ដែលមានចំណាត់ថ្នាក់លេខ ៧ ប្រចាំព្រឹត្តិការណ៍បានស្រោចស្រង់ពីការចាប់ផ្តើមមិនបានល្អ ដើម្បីយកឈ្នះលើកីឡាការិនី Madison Brengle របស់អាមេរិក និងឈ្នះកៅអីទៅលេងក្នុងជុំទី ៣ នៃព្រឹត្តិការណ៍ Australian Open។
កីឡាការិនីសញ្ជាតិឆែកវ័យ ២៦ ឆ្នាំរូបនេះបានវាយពីការដេញតាមពីក្រោយ ១ សិតនៅមុនពេលដើម្បីបានជ័យជម្នះក្នុងលទ្ធផល ៤-៦ ៦-១ និង ៦-០ និងដើម្បីទៅជួបកីឡាការិនី CamilaGiorgi ក្នុងជុំទី ៣ ថ្ងៃស្អែកនេះ៕ IS
