Barty និង Osaka ទទួលពានរង្វាន់វាយកូនបាល់ China Open ពីថ្ងៃអាទិត្យនៅទីក្រុងប៉េកាំង។ រូប AFP
.jpg)
ក្រុងប៉េកាំង៖ កីឡាការិនីវាយកូនបាល់ Naomi Osaka បាននិយាយថា រូបនាងបានស្ដារការឈឺចាប់នៃការមិនបានពានរង្វាន់វាយកូនបាល់ US Open ក្រោយពីបានឈ្នះកីឡាការិនី Ashleigh Barty ជាប់ចំណាត់ថ្នាក់លេខ ១ ពិភពលោក នៅវគ្គផ្ដាច់ព្រ័ត្រនៃពានរង្វាន់ China Open កាលពីថ្ងៃអាទិត្យ។
កីឡាការិនី Osaka អាយុ ២១ ឆ្នាំ បានមានឆ្នាំដ៏ច្របូកច្របល់មួយដោយបានឈ្នះពានរង្វាន់ Australian Open ប៉ុន្តែបានទទួលការឈឺចាប់មួយរួមទាំងការធ្លាក់នៅវគ្គ ១៦ នាក់ចុងក្រោយ នៃការប្រកួតពានរង្វាន់ Flushing Meadows ផងដែរ។
ទោះយ៉ាងណា ម្ចាស់ជើងឯក Grand Slam ២ ជំនាន់សញ្ជាតិជប៉ុនរូបនេះបានឡើងរាសីវិញដោយបានឈ្នះពានរង្វាន់ Pan Pacific Open ក្នុងទឹកដីខ្លួនឯងកាលពីខែមុន និងបានបន្តឈ្នះពានរង្វាន់ក្នុងទីក្រុងប៉េកាំង ប្រទេស ចិន នេះថែមទៀត។
កីឡាការិនី Osaka បានចាញ់កីឡាការិនីវ័យក្មេង Bianca Andreescu ជាម្ចាស់ជើងឯក US Open បន្ទាប់មកបានចាញ់កីឡាការិនី Barty ជាម្ចាស់ជើងឯក French Open ក្នុងដំណើរការឆ្ពោះទៅរកការគ្រងតំណែងលើកទី ៥ នៅក្នុងអាជីពវ័យក្មេងរបស់រូបនាង។
ការទទួលបានជ័យជម្នះនៅប្រទេស ជប៉ុន និងប្រទេស ចិន នេះ គឺជាគោលបំណងរបស់នាងក្រោយពីមានការខកចិត្តចំពោះការលើកពានរង្វាន់ US Open ជាទីដែលរូបនាងគឺជាម្ចាស់ជើងឯកការពារខ្សែក្រវាត់ និងចំណាត់ថ្នាក់កំពូលក្នុងពិភពលោករបស់រូបនាង។
កីឡាការិនី Osaka បាននិយាយថា៖ «ខ្ញុំមិនចង់និយាយថា ខ្ញុំមានផែនការលើកពាននេះទេ ប៉ុន្តែខ្ញុំពិតជាផ្ដោតលើពានរង្វាន់នេះ ហើយវាគ្រាន់តែមានអារម្មណ៍ដូចជាខ្ញុំបានបំពេញតាមអ្វីដែលខ្ញុំគ្រោងនឹងធ្វើដូច្នោះឯង»។
កីឡាការិនីរូបនេះបានបន្ថែមថា៖ «ខ្ញុំមិនបានលេងការប្រកួតទាំង ២ នោះ ដើម្បីខ្លួនឯងទេ ប៉ុន្តែខ្ញុំលេងការប្រកួតនេះដើម្បីក្រុមរបស់ខ្ញុំព្រោះពានរង្វាន់ US Open គឺមិនអស្ចារ្យនោះទេ ហើយខ្ញុំពិតជាមានអារម្មណ៍សោកស្ដាយ និងសុំទោសមិត្តរួមក្រុមផងដែរ»។
កីឡាការិនី Osaka បានទទួលស្គាល់ថា រូបនាងស្ទើរស្រក់ទឹកភ្នែកក្រោយពីចាញ់ ១ សិតដំបូង ចំពោះកីឡាការិនីអូស្ត្រាលី Barty មុនពេលមានកម្លាំងចិត្តវិលទៅរកការឈ្នះនៅវគ្គផ្ដាច់ព្រ័ត្រក្នុងលទ្ធផល ៣-៦, ៦-៣, ៦-២។
អតីតអ្នកជាប់ចំណាត់ថ្នាក់លេខ ១ ពិភពលោកដែលឥឡូវបានលេខ ៤ រូបនេះ បាននិយាយថា៖ «នៅក្នុងសិតដំបូង អ្វីដែលខ្ញុំអាចគិតបាននោះ គឺថាតើខ្ញុំចង់ឈ្នះកម្រិតណា ហើយខ្ញុំមានកម្លាំងចិត្តឡើងវិញ»។
ក្នុងចំណោមការផ្លាស់ប្ដូរក្រោយពីពានរង្វាន់ US Open ហើយ កីឡាការិនីជប៉ុនរូបនេះបានយកឪពុករបស់នាង Leonard Francois ដែលជាគ្រូបង្វឹករបស់រូបនាងនោះឲ្យចូលទស្សនាការប្រកួតនេះដែរ។
វាបានបង្ហាញពីការរីកចម្រើន និងជោគជ័យក្នុងរយៈពេលខ្លី ប៉ុន្តែកីឡាការិនី Osaka មិនបានចាត់ទុកបញ្ហានេះថាជាការរៀបចំរយៈពេលយូរនោះទេ។
កីឡាការិនីជប៉ុនរូបនេះបាននិយាយទាំងញញឹមថា៖ «គាត់មិនចូលចិត្តមើលការប្រកួតរបស់ខ្ញុំទេ ហើយខ្ញុំគិតថា វាបានដាក់សម្ពាធខ្លាំងទៅលើគាត់ព្រោះគាត់តែងតែមានអារម្មណ៍ភ័យអរនៅពេលខ្ញុំ វាយកូនបាល់ម្ដងៗ»។
ចំណែកកីឡាការិនី Barty វិញបាននិយាយថា ក្បាច់គុនរបស់នាងដែលជាអាវុធសំខាន់របស់ពលរដ្ឋអូស្ត្រាលីនោះត្រូវបានបំបែកហើយដោយសារស្ថានភាពត្រជាក់ពេកនៅក្នុងទីក្រុងប៉េកាំង ប្រទេស ចិន។
ប៉ុន្តែកីឡាការិនីអាយុ ២៣ ឆ្នាំ ដែលជាប់ចំណាត់ថ្នាក់ទី ១ ក្នុងពិភពលោករូបនេះបាននិយាយថា៖ «ខ្ញុំពិតជាមានមោទនភាពចំពោះខ្លួនឯង និងក្រុមរបស់ខ្ញុំព្រោះយើងតែងតែបានចូលរួមប្រកួតក្នុងព្រឹត្តិការណ៍ទាំងអស់ដោយមិនខ្វល់ថា វាជាឆ្នាំអ្វី ឬស្ថានភាពបែបណានោះទេ»។
កីឡាការិនីអូស្ត្រាលីរូបនេះបានបន្ថែមទៀតថា៖ «ខ្ញុំគិតថា វាពិតជាឱកាសអស្ចារ្យមួយសម្រាប់យើងទាំង ៣ នាក់ គឺខ្ញុំផ្ទាល់ Osaka និង Andreescu»៕ AFP/SN
