.jpg)
ប្រ៊ៃថុន៖ ខ្សែប្រយុទ្ធ Mohamed Salah ស៊ុតបញ្ចូលទី ២ គ្រាប់ ពេលក្រុមជើងឯក Liverpool មាន ៩២ ពិន្ទុ ក្រោយឈ្នះក្រុមម្ចាស់ផ្ទះ Brighton and Hove Albion ៣-១ ក្នុងជំនួបនៃក្របខ័ណ្ឌ Premier League សប្ដាហ៍ទី ៣៤។
ជ័យជម្នះនេះជួយឲ្យក្រុមហង្សក្រហមរក្សាគោលដៅដែលចង់ធ្វើឲ្យបានកំណត់ត្រាថ្មី នៅ Premier League ដោយបញ្ចប់រដូវកាលជាមួយនឹងពិន្ទុសរុបខ្ពស់បំផុត ខណៈក្រុមរបស់លោក Juergen Klopp ត្រូវការ ៩ ពិន្ទុ ពីការប្រកួត ៤ លើកចុងក្រោយ ដើម្បីលើសពិន្ទុរបស់ក្រុម Manchester City ដែលប្រមូលបាន ១០០ ពិន្ទុ កាលពីរដូវកាល ២០១៧-២០១៨។
គ្រប់គ្នាគិតថា ក្រុម Liverpool សម្រាប់ការប្រកួតនៅសល់នឹងមិនលេងដូចត្រូវការជ័យជម្នះនោះទេ ព្រោះពួកគេក្លាយជាជើងឯករួចរាល់ហើយ តែមិនដូច្នោះឡើយជាក់ស្ដែងដូចការប្រកួតនេះអ៊ីចឹង ពួកគេមិនបានបន្ធូរបន្ថយជើងឲ្យក្រុមគូប្រជែងឡើយ ដោយត្រឹមតែ ៨ នាទីប៉ុណ្ណោះ មានឱកាសនាំមុខដល់ទៅ ២ គ្រាប់បាត់ទៅហើយ ដោយគ្រាប់ដំបូងស៊ុតដោយកីឡាករ Salah នាទីទី ៦ ហើយគ្រាប់ទី ២ ធ្វើបានសម្រេចដោយកីឡាករប្រធានក្រុម Jordan Henderson នាទីទី ៨។
ក្រុមម្ចាស់ផ្ទះ ព្យាយាមរកគ្រាប់បាល់វិញ ហើយទីបំផុតមុនចប់វគ្គទី ១ ពោលគឺនាទីទី ៤៥ ក៏ទម្លុះសំណាញ់ទីបាន ដោយកីឡាករ Leandro Trossard។ នៅវគ្គទី២ ក្រុមទាំង ២ មានឱកាសល្អៗដូចគ្នា តែរាល់ការស៊ុតឆ្លងមិនផុតដៃរបស់អ្នកចាំទី រហូតដល់នាទីទី ៧៦ ទើបកីឡាករ Salah រកឃើញគ្រាប់ទី២ និងជាគ្រាប់ចុងក្រោយ សម្រាប់ការប្រកួតនេះ។
ចំណែករឿងកំណត់ត្រា លោក Klopp និយាយថា លោកមិនខ្វល់ពីការបំបែកកំណត់ត្រាពិន្ទុអ្វីឡើយ ដោយបុរសសញ្ជាតិអាល្លឺម៉ង់ប្រាប់ថា៖ «វាមិនមែនរឿងសំខាន់អ្វីចំពោះខ្ញុំឡើយ។ ខ្ញុំមិនចាប់អារម្មណ៍ពីរឿងនេះទេ តែខ្ញុំចង់ឈ្នះការប្រកួតបាល់ទាត់។ សម្រាប់អ្នកកីឡា ទូទៅវាប្រហែលជាសំខាន់។ យើងជាជើងឯក ហើយយើងអាចលេងតាមសម្រួល តែយើងមិនអាចធ្វើបែបហ្នឹងឡើយ។ កូនក្រុមទាំងអស់ធ្វើបានល្អនៅគ្រប់តំណែងទាំងអស់»។
លោក Klopp បានបន្តទៀតថា៖ «ឥឡូវនេះ យើងមាន ៩២ ពិន្ទុ ហើយឆ្នាំមុនយើងបញ្ចប់រដូវកាលជាមួយនឹង ៩៧ ពិន្ទុ។ យើងមាន ៥ ពិន្ទុ ច្រើនជាងពេលនេះ ដែលវាជារឿងមិនគួរឲ្យជឿទាល់តែសោះ។ ខ្ញុំមិនដឹងថា យើងធ្វើបានដោយរបៀបណានោះទេ?»៕ AFP/VN
