លោក Scaloni បានស្រែកបញ្ជាក្រុម ពេលអាហ្សង់ទីនស្មើក្រុមអ៊ុយរូហ្គាយ។ រូប AFP
.jpg)
គ្រូបង្វឹកក្រុមជម្រើសជាតិអាហ្សង់ទីន លោក Lionel Scaloni មានការពេញចិត្តទៅនឹងការរីកចម្រើនរបស់ក្រុមមួយនេះ ក្រោយពីអាហ្សង់ទីនទទួលបានលទ្ធផលស្មើគ្នា ក្នុងការប្រកួតមិត្តភាពជាមួយជម្រើសជាតិអ៊ុយរូហ្គាយ កាលពីថ្ងៃចន្ទ។
ក្រុមអាហ្សង់ទីន បានតាមពីក្រោយទាំង ២ លើក ដើម្បីស្មើគ្នា ២-២ ក្នុងការប្រកួតមិត្តភាពនៅទីក្រុង Tel Aviv ជាទីដែលកីឡាករ Lionel Messi ស៊ុតបាល់ពិន័យចូលយ៉ាងល្អ ដើម្បីលុបចោលគ្រាប់បាល់ទី ២ ដែលរកបានដោយកីឡាករ Luis Suarez ក្រោយពីកីឡាករEdinson Cavani រកបាន ១ គ្រាប់បើកឆាក ប៉ុន្តែត្រូវបានកីឡាករ Sergio Aguero រកបាន ១ គ្រាប់វិញ ដើម្បីលុបចោលការនាំមុខនោះ។
លទ្ធផលនេះ បានធ្វើឲ្យក្រុមជម្រើសជាតិអាហ្សង់ទីន បន្តឈ្នះក្នុង ៧ ប្រកួត ខណៈពួកគេបានបន្តត្រៀមខ្លួនសម្រាប់ការប្រកួតវគ្គជម្រុះនៃព្រឹត្តិការណ៍ World Cup 2022 ដែលនឹងចាប់ផ្ដើមនៅឆ្នាំក្រោយនេះ។ លោក Scaloni ពេញចិត្តចំពោះការរីកចម្រើនរបស់ក្រុមជម្រើសជាតិអាហ្សង់ទីន បើទោះជាគ្រូបង្វឹករូបនេះ នៅតែសម្លឹងឃើញឱកាសសម្រាប់ការពង្រឹងសមត្ថភាពក្រុមនេះថែមទៀតក៏ដោយ។
ក្រុមអ៊ុយរូហ្គាយ បានព្យាយាមបិទខ្សែប្រយុទ្ធ Messi ក្នុងជំនួប កាលពីថ្ងៃចន្ទ។ រូប AFP
គ្រូបង្វឹករូបនេះបាននិយាយថា៖ «តាមកម្រិតលទ្ធផលនេះ យើងពិតជាល្អ ប៉ុន្តែតាមកម្រិតនៃការប្រកួតនេះ យើងអាចនឹងកែតម្រូវថែមទៀត។ ក្រុមនេះមានអារម្មណ៍ល្អបំផុត ហើយរឿងសំខាន់ គឺថាកីឡាករយើងលេងបានល្អ ខណៈអ្នកខ្លះទៀតមានការរីកចម្រើន និងខ្លះទៀតគាំទ្រ»។
លោក Scaloni បានទទួលស្គាល់ថា បញ្ហាប្រឈមកំពុងរង់ចាំក្រុមរបស់លោក ដោយចាត់ទុកការប្រកួតជម្រុះនៃពានរង្វាន់ CONMEBOL ជាការប្រកួតលំបាកបំផុតក្នុងពិភពលោក។ «ឥឡូវយើងត្រូវគិតពីអ្វីដែលយើងធ្វើបានល្អ និងអ្វីដែលយើងអាចកែតម្រូវឡើងវិញ ព្រោះអ្វីដែលនឹងកើតឡើងនៅពេលខាងមុខនេះ គឺលំបាកបន្តិចហើយ»។
គ្រូបង្វឹកដដែលនេះបានបន្តថា៖ «ខ្ញុំបាននិយាយជាមួយមនុស្សមកពីប្រទេស អ៊ុយរូហ្គាយ ហើយវានឹងលំបាក នៅក្នុងវគ្គជម្រុះនេះ ព្រោះការប្រកួតនៅតំបន់អាមេរិកខាងត្បូងនេះ គឺលំបាកបំផុតក្នុងពិភពលោក។ ទោះបីជាយ៉ាងណា យើងមានមូលដ្ឋានល្អ»៕ AFP/SN
