ក្រុងឡុងដ៍៖ ក្រុម Tottenham Hotspur (Spurs) ហក់ឡើងទៅឈរទីកំពូលតារាងពិន្ទុក្របខ័ណ្ឌ Premier League អង់គ្លេស ជាមួយនឹងជ័យជម្នះដ៏គួរឱ្យរំភើបលើក្រុម Manchester City ២-០ ខណៈក្រុម Chelsea រំកិលខ្លួនទៅលេខ ២ ក្រោយឈ្នះ Newcastle អំឡុងការប្រកួត កាលពីថ្ងៃសៅរ៍។
ស្របពេល Leicester City ដែលអាចឡើងទៅលេខ ១ បើឈ្នះនៅផ្ទះ Liverpool ពេលប៉ះគ្នានៅថ្ងៃអាទិត្យ Spurs ក៏ឆ្លៀតឱកាសឈរតំណែងនេះបណ្ដោះអាសន្នសិន ដែលវាជាលើកដំបូងក្នុងរយៈពេល ៦ ឆ្នាំ ខណៈគ្រាប់បាល់របស់ Son Heung-min និង Giovani Lo Celso បានជូនដំណើរ Man City ពេលចាកចេញពីកីឡដ្ឋាន Tottenham Hotspur ជាមួយនឹងការខកចិត្ត។
ការប្រកួតរវាងក្រុមទាំង ២ នៅសប្ដាហ៍ទី៩ នេះ បានតែ ៥ នាទីប៉ុណ្ណោះ ក្រុមម្ចាស់ផ្ទះ Spurs នាំមុខបាត់ទៅហើយ ពេលខ្សែប្រយុទ្ធកូរ៉េខាងត្បូង Son រត់សំដៅទៅរកបាល់ ដែលបញ្ជូនដោយបំប្លោងពីកីឡាករ Tanguy Ndombele ហើយស៊ុតបញ្ចូលទីគ្រាប់ទី១១ សម្រាប់រដូវកាលនេះយ៉ាងអស្ចារ្យ។
ក្រុម Man City របស់លោក Pep Guardiola (Pep) គ្រប់គ្រងបាល់ច្រើនជាងក្រុមរបស់លោក Jose Mourinho តែពិបាកក្នុងការរកចន្លោះទម្លុះសំណាញ់ទី ហើយជាថ្មីម្ដងទៀតមិនអាចរារាំងគ្រាប់ទី២ របស់កីឡាករបម្រុង Lo Celso។
ជាកាដូសម្រាប់ថ្ងៃដែលលោក Mourinho ត្រូវបានតែងតាំងជាគ្រូបង្វឹកគម្រប់ ១ ឆ្នាំ Spurs ធ្វើបានយ៉ាងល្អ ដោយការលេងមិនចាញ់សោះរហូតដល់ទៅ ៨ លើក សម្រាប់ការប្រកួតក្នុងលីគកំពូលនេះ គិតតាំងពីចាញ់ក្រុម Everton នៅថ្ងៃបើកឆាក ដោយលទ្ធផលនេះ បានបង្កើននូវក្ដីសង្ឃឹមរឹតតែខ្ពស់ក្នុងការមានសិទ្ធិប្រជែងពានយ៉ាងពិតប្រាកដ។
គ្រូបង្វឹករបស់ក្រុម Spurs លោក Mourinho ថ្លែងថា៖ «កីឡាករទាំងអស់ផ្ដល់គ្រប់យ៉ាង និងអនុវត្តតាមយុទ្ធសាស្ត្រ។ ពួកគេធ្វើបានល្អ។ យើងរកឃើញចង្វាក់នៃការលេង ហើយប្រសើរណាស់ដែលឃើញការលេងតាមវិធីរបស់ពួកគេ»។
Spurs ដែលឈ្នះពានលីគកំពូលចុងក្រោយ ក្នុងឆ្នាំ ១៩៦១ កំពុងនាំមុខ Chelsea ២ ពិន្ទុ មុនក្រុមទាំង ២ ត្រូវតទល់គ្នានៅចុងសប្ដាហ៍ក្រោយ រីឯក្រុម Man City ធ្លាក់ទៅលេខ ១១ ដោយតាមក្រុមលេខ ១ ដល់ទៅ ៨ ពិន្ទុ តែសល់ ១ ប្រកួតក្នុងដៃ។
អ្នកចាត់ការក្រុម Man City លោក Pep និយាយថា៖ «យើងមានឱកាសច្រើនជាងពួកគេ តែយើងចាញ់។ ក្រុមរបស់លោក Mourinho គឺអ៊ីចឹង ពោលគឺបើអ្នកបង្កើតនូវកំហុស នោះដៃគូប្រយុទ្ធរបស់ពួកគេ នឹងផ្ដល់មេរៀនឱ្យអ្នកភ្លាមៗ»។
ចំណែកក្រុមលេខ ២ Chelsea នៅបន្តរក្សាទម្រង់លេងដ៏ល្អទៀត ខណៈគ្រាប់បាល់ ដែលធ្វើឱ្យចូលទីខ្លួនឯងរបស់ Federico Fernandez នៅវគ្គទី១ និងការស៊ុតបញ្ចូលទីពី Tammy Abraham នៅវគ្គទី ២ បានជួយឱ្យក្រុមរបស់លោក Frank Lampard ឈ្នះ ២-០ អំឡុងប្រកួតនៅកីឡដ្ឋាន St James'' Park របស់ក្រុម Newcastle។
ជ័យជម្នះនេះ ធ្វើឱ្យក្រុម Chelsea អត់ចាញ់ ៩ លើក ក្នុងការប្រកួតនៅគ្រប់កម្មវិធីទាំងអស់ក្នុងនោះអត់ទាន់ស្គាល់ពាក្យថា បរាជ័យនោះឡើយ សម្រាប់ ៦ ប្រកួតចុងក្រោយក្នុងលីគ ហើយនេះ ក៏ជាការបង្ហាញថា ពួកគេកំពុងធ្វើដំណើរលើផ្លូវដ៏ល្អឥតខ្ចោះ ដើម្បីប្រជែងពានដែរ៕ AFP/VN