ក្រុងឡុងដ៍៖ កីឡាករវាយកូនបាល់ Stefanos Tsitsipas បានវាយបកឈ្នះកីឡាករ Dominic Thiem ដើម្បីឈ្នះពានរង្វាន់ ATP Finals កាលពីថ្ងៃអាទិត្យ ធ្វើឲ្យរូបគាត់ក្លាយជាកីឡាករនាំមុខគេសម្រាប់អ្នកជំនាន់ក្រោយនៃកំពូលតារាពិភពលោក។
កីឡាករក្រិកអាយុ ២១ ឆ្នាំ ដែលបានឈ្នះ ៦-៧ (៦/៨), ៦-២, ៧-៦ (៧/៤) នោះ គឺជាម្ចាស់ជើងឯកក្មេងជាងគេចាប់តាំងពីកីឡាករ Lleyton Hewitt ធ្លាប់សម្រេចបានបែបនេះនៅក្នុងឆ្នាំ ២០០១ និងជាជើងឯកលើកទី ៤ នៅព្រឹត្តិការណ៍បញ្ចប់រដូវកាលនេះជាច្រើនឆ្នាំមកហើយ។
នេះជាពានរង្វាន់លើកទី ៣ របស់កីឡាករ Tsitsipas នៅរដូវកាលនេះ និងបានកើតឡើង ១ ឆ្នាំ បន្ទាប់ពីរូបគាត់បានគ្រងតំណែងជាម្ចាស់ជើងឯកនៅព្រឹត្តិការណ៍ Next Gen ATP Finals នៅទីក្រុង Milan ប្រទេស អ៊ីតាលី។
កីឡាកររូបនេះបានធ្វើឱ្យហ្វូងអ្នកទស្សនាចាប់អារម្មណ៍ខ្លាំងនៅទីលាន O2 Arena ក្នុងទីក្រុងឡុងដ៍ពេញ ១ សប្តាហ៍ ហើយបានទទួលកៅអីរបស់គាត់នៅវគ្គផ្តាច់ព្រ័ត្រជាមួយនឹងជ័យជម្នះជាប់ៗគ្នាដ៏គួរឲ្យចាប់អារម្មណ៍ក្នុងការប្រកួតនឹងម្ចាស់ជើងឯក ៦ សម័យកាល Roger Federer។
កីឡាករ Tsitsipas បាននិយាយថា៖ «ខ្ញុំមិនអាចបញ្ជាក់ពីអារម្មណ៍របស់ខ្ញុំឥឡូវនេះទេ។ វាពិតជាអស្ចារ្យដែលត្រូវបានគេចងចាំថា ជាម្ចាស់ជើងឯកឆ្នាំ ២០១៩ ហើយវាជាសុបិនក្លាយជាការពិតមួយ និងជាវិធីល្អបំផុត ដើម្បីបញ្ចប់ការប្រកួតនេះ»។
កីឡាកររូបនេះបានបន្ថែមថា៖ «ខ្ញុំពិតជាភ័យនៅចំណុចខ្លះនៅក្នុងការប្រកួតនេះ ប៉ុន្តែខ្ញុំអាចគ្រប់គ្រងអារម្មណ៍របស់ខ្ញុំ ហើយខ្ញុំមានកម្លាំងចិត្តនៅក្នុងការប្រកួតដ៏តឹងតែងនេះ»។
កីឡាករក្រិករូបនេះបានបន្តថា៖ «ស្មារតីប្រកួតរបស់ខ្ញុំ គឺតែងតែព្យាយាមជំរុញទឹកចិត្តខ្លួនឯងឲ្យធ្វើបានកាន់តែល្អរហូតសម្រេចបានជោគជ័យបែបនេះ»។
បរាជ័យ គឺជាការខកចិត្តដ៏ជូរចត់មួយសម្រាប់កីឡាករ Thiem ដែលបានឈ្នះពានរង្វាន់ ៥ លើក នៅឆ្នាំនេះរួមទាំងពានរង្វាន់ Indian Wells Masters ផងដែរ និងបានឡើងដល់វគ្គផ្ដាច់ព្រ័ត្រ French Open ជាប់គ្នា ២ លើក។
មានជម្រើសតិចតួចណាស់រវាងកីឡាករ Tsitsipas ជាប់ចំណាត់ថ្នាក់ទី ៦ ពិភពលោក និងកីឡាករអូទ្រីស Thiem ជាប់លំដាប់លេខ ៥ ពិភពលោកនៅក្នុងសិតទី ១ ខណៈពិន្ទុកាត់សេចក្ដីចំនួន ៥ បានប្រកៀកប្រកិតគ្នា។
កីឡាករទាំង ២ រូបនេះទទួលបានការចាប់អារម្មណ៍យ៉ាងខ្លាំងនៅលើការវាយសឺវីសក្នុងការប្រកួតនេះជាពិសេស គឺកីឡាករ Tsitsipas ដែលបានវាយសឺវីសឈ្នះ ៤៤ លើក ក្នុងចំណោមសឺវីស ៤៧ លើក ដែលធ្វើឲ្យរូបគាត់បានឡើងទៅវគ្គផ្ដាច់ព្រ័ត្រ។
នៅក្នុងការប្រកួតកាត់សេចក្ដីនោះ កីឡាករ Tsitsipas បានសង្គ្រោះ ១ ពិន្ទុ ក្នុងលទ្ធផល ៥/៦ ប៉ុន្តែកីឡាករ Thiem ទទួលបានពិន្ទុសិត ២ លើករបស់ខ្លួនជាមួយការវាយសឺវីសយ៉ាងខ្លាំង ដោយបានធ្វើឲ្យកីឡាករក្រិករូបនេះបានវាយបកទៅវិញ ដោយទាក់នឹងសំណាញ់ទី៕ AFP/SN