ក្រុងឡុងដ៍៖ ការរង់ចាំ ដើម្បីបាននូវជ័យជម្នះជាលើកដំបូងរបស់ក្រុម Burnley នៅក្របខ័ណ្ឌ Premier League រដូវកាលនេះ ទីបំផុតបានរកឃើញ ដោយសារបាល់ ១ គ្រាប់របស់ខ្សែប្រយុទ្ធ Chris Wood ខណៈ Southampton បាត់បង់ឱកាសឡើងទៅលេខ ៣ ដោយសារស្មើជាមួយ Wolverhampton Wanderers (Wolves) ១-១។
ក្រុម Burnley មិនឈ្នះសូម្បី ១ ដង ក្នុងចំណោមការប្រកួត ៧ លើកដំបូងរបស់ខ្លួននេះ ដែលវាជាការចាប់ផ្ដើមរដូវកាលមួយដ៏អាក្រក់បំផុត ក្នុងប្រវត្តិសាស្ត្ររបស់ក្លិប តែការឈ្នះត្រឹម ១-០ លើក្រុម Crystal Palace នៅទឹកដីខ្លួនឯង បានជួយបញ្ចប់នូវកំណត់ត្រាដ៏សែនយ៉ាប់នេះ។
ក្រុមដែលត្រូវបានដឹកនាំដោយលោក Sean Dyche គឺជាក្រុមនៅ Premier League តែមួយគត់ ដែលមិនទាន់បានស៊ុតបញ្ចូលទីក្រុមគូប្រជែងនៅផ្ទះខ្លួនឯង នាពេលនេះ ដោយត្រូវរង់ចាំទាល់តែកីឡាករសញ្ជាតិនូវែលសេឡង់ Wood ទម្លុះសំណាញ់ទីរបស់ Crystal នៅនាទីទី៨ ក្នុងប្រកួតសប្ដាហ៍ទី៨ នេះឯង។
លទ្ធផលនោះ គ្រប់គ្រាន់ផ្ដល់នូវ ៣ ពិន្ទុដ៏សំខាន់បំផុតសម្រាប់ Burnley ដែលពេលនេះ ឡើងផុតពីតំបន់ត្រូវកាត់ចោល ដោយរុញទម្លាក់ក្រុម Fulham មកជំនួសវិញ។
គ្រូបង្វឹករបស់ក្រុម Burnley លោក Dyche បាននិយាយថា៖ «យើងបង្កើតបានឱកាសពិសេសៗ ២-៣ ដង តែធ្វើបានសម្រេច ១ លើក។ យើងមានអារម្មណ៍អន្ទះអន្ទែងបន្តិច ដោយសារយើងមិនទាន់ឈ្នះសូម្បី ១ លើក។ លទ្ធផលនេះ នឹងធ្វើពួកយើងជួបនូវពិភពដ៏ស្រស់ថ្លាមួយ»។
គ្រូបង្វឹកវ័យ ៤៩ ឆ្នាំ លោក Dyche បានបន្តថា៖ «យើងប្រឈមជាមួយក្រុមមួយ ដែលអាចប្រជែងយើងបាន។ យើងមាននូវការចាប់ផ្ដើមដ៏តានតឹងមួយ តែរឿងនោះ កំពុងជិតសាបរលាបហើយ»។
ចំណែកការប្រកួត ១ គូទៀត នៅឯកីឡដា្ឋន Molineux ឃើញថា ក្រុម Southampton បានកំពុងធ្វើដំណើរលើផ្លូវទៅរកការឈ្នះ ៤ ដងជាប់ៗគ្នា ពេលដែលខ្សែបម្រើប្រយុទ្ធ Theo Walcott បំប៉ោងសំណាញ់ទីបាន នៅនាទីទី៥៨ ជួយឱ្យនាំមុខក្រុមម្ចាស់ផ្ទះ Wolves។
តែកីឡាករ Pedro Neto បានងើបចេញពីកៅអីរបស់កីឡាករបម្រុង ហើយមកស៊ុតបញ្ចូលទីឱ្យក្រុម Wolves តាមស្មើវិញ នៅនាទីទី៧៥ ដែលវាជាលទ្ធផលធ្វើឱ្យក្រុមទាំង ២ ចែកគ្នា ម្នាក់ ១ ពិន្ទុ ខណៈក្រុមលេខ ៥ Southampton ទំនងជាទទួលយកដោយពេញចិត្តនូវលទ្ធផលនេះ ដើម្បីបន្ដការមិនចាញ់រហូតដល់ ៧ ប្រកួត។
គ្រូបង្វឹករបស់ Southampton លោក Ralph Hasenhuttl ប្រាប់ថា៖ «ខ្ញុំរីករាយ។ សម្រាប់គ្រប់គ្នា វាជាការប្រកួតដ៏តឹងតែង ដោយវាទាមទារនូវយុទ្ធសាស្ត្រខ្លាំងណាស់ ដូចនឹងការលេងល្បែងអុកចត្រង្គអ៊ីចឹង។ ពួកគេរៀបប្រព័ន្ធលេង ៤-៣-៣ ពោលគឺយើងគិតមិនដល់ថាពួកគេរៀបបែបហ្នឹង តែយើងបានរកឃើញវិធីដោះស្រាយទប់ទល់បាន»។
រីឯអ្នកចាត់ការរបស់ក្រុម Wolves លោក Nuno Espirito Santo សម្ដែងការយល់ឃើញថា៖ «ខ្ញុំគិតថា វាជាកំហុស ដែលធ្វើឱ្យពួកគេស៊ុតបញ្ចូលទីបាន។ ក្រោយពីនោះ វាជាការតបតនឹងកំហុស ដែលកើតឡើងនោះ។ កូនក្រុមទាំងអស់ធ្វើបានល្អ។ យើងបញ្ចប់ការលេងបានយ៉ាងប្រសើរ ដោយការបង្កើតបាននូវឱកាសល្អយ៉ាងច្រើន»៕ AFP/VN