Zidane បានវិលមកដឹកនាំក្រុម Real Madrid ជាថ្មីម្តងទៀត។ រូប AFP
.jpg)
អេស្ប៉ាញៈ អស់រយៈពេល ២៨៣ ថ្ងៃហើយ ដែលលោក Zinedine Zidane បានដាក់ពាក្យលាឈប់ពីក្រុម Real Madrid ប៉ុន្តែពេលនេះគ្រូបង្វឹករូបនេះបានវិលមកគ្រប់គ្រងក្លិបមួយនេះម្តងទៀតជាមួយនឹងការផ្តល់កិច្ចសន្យានូវចំនួនទឹកប្រាក់ទ្វេដងគឺ ៥,៥ លានអឺរ៉ូ (ជាង ៦ លានដុល្លារ)។
អង្គុយក្បែរលោក Florentino Perez ដែលជាប្រធានក្លិប Real Madrid កាលពីខែឧសភា ឆ្នាំ ២០១៨ ក្នុងសភាពបែបរាងរន្ធត់ចិត្តដែរនោះលោក Zidane នឹកគិតក្នុងចិត្តថា ប្រសិនបើខ្លួនបន្តទៀតក្លិប Real Madrid នឹងមានបញ្ហាមិនខាន។ ប៉ុន្តែបើគ្មានរូបលោក ក្លិបនេះក៏មានបញ្ហាមិនតិចដែរ ដូច្នេះបានជា Zidane សម្រេចចិត្តវិលមកដឹកនាំក្លិប Real Madrid នេះម្តងទៀត។
Zidane ធ្លាប់បានដឹកនាំក្លិប Real Madrid ឲ្យបានលើកពាន Champions League ចំនួន ៣ ដងជាប់គ្នា ចំណែកការវិលមកដឹកនាំជាថ្មីនេះត្រូវបានគេឲ្យដឹងថា ប្រធានក្លិបលោក Florentino Perez បានចុះកិច្ចសន្យាក្នុងការត្រៀមផ្តល់ទឹកប្រាក់រហូតដល់ ៣០០ លានផោនសម្រាប់ Zidane ដើម្បីផ្ទេរកីឡាករ ដែលខ្លួនចង់បានក្នុងគោលបំណងកែទម្រង់ក្រុម Real Madrid បច្ចុប្បន្នទៅតាមបែប Galactico ដូចដែលក្លិបធ្លាប់ធ្វើជាលើកដំបូងចាប់តាំងពីឆ្នាំ ២០១៤។
ចំណែកលោក Julen Lopetegui ត្រូវបានក្លិប Real Madrid បណ្តេញចេញ ក្រោយពីបានកាន់តំណែងជំនួស Zidane បានត្រឹមតែ ៣ ខែ ខណៈក្លិបយក្សរបស់អេស្ប៉ាញមួយនេះបានចាញ់ក្រោមដៃក្លិប Barcelona ចំនួន ២ ដង និងចាញ់ក្លិប Ajax ក្នុងរដូវកាលប្រកួតឆ្នាំនេះក្នុងវគ្គ ១៦ ក្រុមខែមីនានេះ។
កាលពីដើមរដូវក្តៅនៃការប្រកួតបាល់ទាត់នៅតំបន់អឺរ៉ុបបេក្ខភាពគ្រូបង្វឹកថ្មីនៃក្លិប Real Madrid ត្រូវបានគេមើលឃើញថាក្រៅពី Zidane ក៏មានលោក Jose Mourinho អតីតគ្រូបង្រឹកក្លិបបិសាចក្រហម Man United ផងដែរ។ ប៉ុន្តែទីបំផុត Zidane ត្រូវបាន Real Madrid ទទួលលោកម្តងទៀត។
ប៉ុន្តែក្នុងពេល Zidane វិលមកវិញនេះ ក្លិប Real Madrid ក៏មានស្ថានភាពក៏មិនសូវល្អដែរ ដោយពួកគេកំពុងឈរនៅលេខ ៣ នៃពាន La Liga ដោយមាន ៥១ ពិន្ទុតិចជាងក្រុមកំពុងឈរនៅលើតារាង Barcelona រហូតដល់ ១២ ពិន្ទុ ព្រោះ Barcelona មាន ៦៣ ពិន្ទុ។
ដូច្នេះការវិលមកស្រោចស្រង់ស្ថានភាពក្លិប Real Madrid របស់លោក Zidane លើកនេះក៏អាចមានសម្ពាធនានាផងដែរ ឬមួយពេលវេលាមិនល្អដែលបានរំលងទៅប្រមាណ ៩ ខែនៃពិភពបាល់ទាត់ La Liga នេះ លោក Zidane ពិតជាអាចស្រោចស្រង់បាន។
ការវិលត្រឡប់មកវិញរបស់លោក Zidane នេះក៏បានធ្វើឲ្យកីឡាករស្ទើរគ្រប់គ្នានៃក្លិប Real Madrid មានការងឿងឆ្ងល់ផងដែរ ដូចជាកីឡាឆ្នើម Gareth Bale ជាដើម ខណៈគ្រូបង្វឹកលោក Lopetegui និង លោក Solari សុទ្ធតែបណ្តេញចេញ បន្ទាប់ពី Zidane បានចាកចេញនោះ។
លោក Solari ធ្លាប់បាននិយាយក្នុងសន្និសីទកាសែតកាលពីខែតុលាឆ្នាំ ២០១៨ ថា៖ «គាត់ជាមនុស្សម្នាក់ដ៏អស្ចារ្យដែលយើងធ្លាប់បានជួបនៅក្នុងក្លិបនេះ។ គ្មានអ្វីដែលមានលក្ខណៈប្រសើរខ្លាំងនៅលើពិភពលោកនេះ ដើម្បីយកពិពណ៌នាទៅលើចំណុចល្អៗរបស់ Zindane នោះទេ ព្រោះគាត់ជាមនុស្សដ៏ស្ងប់ស្ងាត់ និងគ្រូបង្វឹកដ៏ល្អដែលគ្មាននរណាម្នាក់អាចយកមកប្រៀបប្រដូចទៅនឹងគាត់បាននោះទេ»៕
