ភ្នំពេញ៖ ខណៈបានចំណាយពេល ១០ ឆ្នាំ ដើរលើវិថីសិល្បៈចម្រៀងទទួលបានផ្លែផ្កាល្អ មានកេរ្តិ៍ឈ្មោះល្បីល្បាញ និងទ្រព្យធនច្រើនរូបសម្ផស្សក៏កាន់តែស្រស់សោភាខ្លាំងហើយនោះ តែមហាជនក៏នៅតែងឿងឆ្ងល់ពីរឿងកញ្ញា អ៊ីវ៉ា នៅមិនទាន់មានដំណឹងបង្ហើបបង្ហាញមុខមាត់គូស្នេហ៍ពិតនៅឡើយ។
នៅពេលថ្មីៗក្នុងខែវិច្ឆិកា ឆ្នាំ ២០២០ នេះ កញ្ញា អ៊ីវ៉ា ក៏ក្លាយជាតារាទូតសុច្ឆន្ទៈរបស់ក្រុមហ៊ុនអិលស៊ីភីអេស អ៊ិនធើប្រាយ ជាក្រុមហ៊ុនធំស្របច្បាប់ និងមានការទទួលខុសត្រូវខ្ពស់នាំចូលផ្តាច់មុខ និងចែកចាយនូវផលិតផលថែរក្សាសម្រស់ និងសុខភាពនៅក្នុងប្រទេសកម្ពុជា ក្រោយពីតារាចម្រៀងរូបនេះ សម្រេចចិត្តបន្តកុងត្រានៅតែជ្រកកោនលើទ្រនំសាន់ដេដដែល ដើម្បីបំបាត់មន្ទិលសង្ស័យថា នាងទំនងជាដូរទៅទ្រនំថ្មីនាពេលកន្លងមកនោះ។
យ៉ាងណាមិញ នៅតែមានការសួរនាំរឿងគូស្រករ ឬម្ចាស់ចិត្តតារាចម្រៀងស្រីជ្រកនៅទ្រនំសាន់ដេ ឈ្មោះពិត ឃីន ស្រីនាថ ហៅកញ្ញា អ៊ីវ៉ា ដដែលគេនៅតែមិនទាន់ដឹងច្បាស់ថា អនាគតស្វាមីរបស់នាងអាចជាបុរសរស់នៅក្នុង ឬក្រៅស្រុកនោះទេ ព្រោះថាតារាចម្រៀងសាន់ដេរូបនេះ តែងតែព្យាយាមលាក់មុខគូស្នេហ៍ថ្មីជានិច្ច តាំងពីប្រេះឆាស្នេហ៍ចាស់ដែលល្បីថាជាថៅកែក្លិប និងហាងបញ្ចាំមួយនៅសៀមរាប។
តារាចម្រៀងស្រី រាងស្ល៊ីម សម្រស់កាន់តែផូរផង់ កញ្ញា អ៊ីវ៉ា ក៏បានព្រលយឱ្យដឹងថា នាងនឹងរៀបការមិនឱ្យមានវ័យលើសពី ៣០ ឆ្នាំ នោះឡើយ ស្របពេលដែលលោកឪពុកនាង គឺលោក អ៊ូ វ៉ាវ ហៅអ៊ូ ចន្ថា ក៏ធ្លាប់បង្ហើបថា មិនចង់ឱ្យកូនស្រីមានប្ដីនៅវ័យក្មេងពេកនោះទេ ហើយរឿងអ្នកមកស្រឡាញ់កូនស្រីលោកនោះក៏លោកមិនដែលប្រកាន់ឋានៈអ្វីដែរ។
តារាចម្រៀងស្រីសំឡេងស្រួយ ស្រទន់មុត កញ្ញា អ៊ីវ៉ា ដែលសុខចិត្តចុះឡើងទៅមកៗ ពីខេត្តមកភ្នំពេញ ដោយគ្មានគម្រោងទិញផ្ទះវីឡាថ្មីដូចគេឯងឡើយ ខណៈខ្លួនមានផ្ទះវីឡាដ៏ស្កឹមស្កៃ នៅខេត្តកំពង់ស្ពឺ មិនចាញ់ទ្រនំដ៏ធំប្រណីតរបស់តារាចម្រៀងប្រុសលោក ខេមរៈ សិរីមន្ដ បច្ចុប្បន្នវ័យ ២៧ ឆ្នាំ នោះក៏បានព្រលយថា៖ «ចង់រៀបការឱ្យបានមុន ឬត្រឹមអាយុ ៣០ ឆ្នាំ គឺមិនពន្យារពេលឱ្យអាយុច្រើនជាងនេះទៀតទេ។ រឿងគូស្រករនេះ គឺវាពិបាកព្រោះជួនកាលដល់ជួបហើយ គឺគូព្រេងមិនអាចប្រកែកបាននោះឡើយ អ៊ីចឹងហើយបានជានាងខ្ញុំក៏ពិបាកនឹងនិយាយទុកមុនដែរ»៕