រូបតំណាង : ក្រដាសបង្គន់មានតម្រូវការខ្ពស់សម្រាប់ប្រជាជនលោកខាងលិច។ រូបថត AFP
.jpg)
ក្រុងប៊ែរឡាំង៖ ការរីករាលដាលជាសកលនៃវីរុសកូរ៉ូណា បានធ្វើឲ្យមនុស្សម្នាជាច្រើនសម្រុកទិញក្រដាសបង្គន់ច្រើនហួសហេតុ ដោយភ្លេចពិតពីតម្រូវការជាក់ស្ដែង។
កម្មវិធីគណនាតម្រូវការក្រដាសបង្គន់ត្រូវបានដាក់ឲ្យប្រើអនឡាញលើវេបសាយ www.blitzrechner.de/toilettenpapier ដែលមហាជនអាចកំណត់ថា តើបរិមាណដែលពួកគេទិញស្ដុកទុក អាចប្រើបានប៉ុន្មានថ្ងៃ។
អ្នកប្រើប្រាស់គ្រាន់តែវាយតួលេខក្រដាសបង្គន់ប៉ុន្មានដុំ និងទម្លាប់ខ្ជះខ្ជាយ ឬសន្សំសំចៃនោះ វានឹងគណនាតួលេខចំនួនថ្ងៃសម្រាប់ស្ដុកក្រដាសបង្គន់នោះ។
អ្នកដែលចង់ប្រើប្រាស់កម្មវិធីឲ្យស៊ីជម្រៅជាងនេះ ពួកគេក៏វាយអាចបញ្ចូលចំនួនថ្ងៃនៃការដាក់ឲ្យពលរដ្ឋនៅផ្ទះដាច់ដោយឡែក និងចំនួនសន្លឹកក្រដាសបង្គន់ដែលអ្នកប្រើជូតក្នុង ១ លើកៗ។
វេបសាយនេះបានទទូចថា៖ «មនុស្សជាច្រើនប្រើក្រដាសបង្គន់លើសពីតម្រូវការជាក់ស្ដែង។ ចំនួនដែលត្រឹមត្រូវ គឺត្រឹមតែ ២ សន្លឹកប៉ុណ្ណោះសម្រាប់ការចូលបង្គន់ម្ដង»។
រដ្ឋមន្ត្រីស្បៀងអាហារអាល្លឺម៉ង់ នៅឃ្លាំងស្ដុកក្រដាស។ រូបថត AFP
វេបសាយនេះក៏បានស្នើពីជម្រើសក្នុងករណីអាសន្នអត់ក្រដាសប្រើក្នុងបង្គន់ ដោយប្រជាជនអាចប្រើកន្សែងជូត ចម្រៀកក្រណាត់ ឬក៏ចូលងូតទឹកលាងតែម្ដង។
កម្មវិធីគណនាស្រដៀងគ្នានេះក៏មាននៅអង់គ្លេស តាមរយៈវេបសាយ Howmuchtoiletpaper.com.។
ផ្ទុយពីសកម្មភាពស្លន់ស្លោទិញក្រដាសបង្គន់ អធិការបតី អេនជេឡា មឺរកែល បានធ្វើជាគំរូដ៏ប្រពៃ ដោយលោកស្រីត្រូវបានប្រមាញ់រូបថត ទៅផ្សារទិញក្រដាសបង្គន់តែ ១ យួរ និងស្រា ៤ ដបដាក់រទេះរុញ កាលពីចុងសប្ដាហ៍កន្លងទៅថ្មីៗនេះ៕ AFP
