លោក ឧត្តមសេនីយ៍ទោ អ៊ុច សំណាង ម្ចាស់ជយលាភីលេខ ១។ រូបថត ហ្វេសប៊ុក, លោក អៀ ហុកនីម ម្ចាស់ជយលាភីលេខ ២។ រូបថត ហ្វេសប៊ុក
.jpg)
ភ្នំពេញ៖ ក្រោមកិច្ចសហការជាមួយមជ្ឈមណ្ឌលឯកសារកម្ពុជា ទីបំផុតសមាគមអ្នកនិពន្ធខ្មែរ ចម្រាញ់រកឃើញជយលាភីចំនួន ១០ រូប បានពីការប្រកួតជ្រើសរើសស្នាដៃរឿងខ្លីពានរង្វាន់អក្សរសិល្ប៍ស្លឹករឹតលើកដំបូងនៅឆ្នាំ ២០២០ ដែលមានប្រធានបទស្តីពី «ជីវិតរស់នៅប្រចាំថ្ងៃរបស់ប្រជាជនកម្ពុជាក្នុងរបបកម្ពុជាប្រជាធិបតេយ្យ ប៉ុល ពត»។
លោកបណ្ឌិត ឡឹក ជំនោរ ជាអនុប្រធានសមាគមអ្នកនិពន្ធខ្មែរ ដែលទទួលបន្ទុកខាងផ្នែកស្រាវជ្រាវបោះពុម្ពផ្សាយ និងនវានុវត្តន៍បានបង្ហើបឲ្យដឹងថា៖ «សមាគមអ្នកនិពន្ធខ្មែរសហការជាមួយមជ្ឈមណ្ឌលឯកសារកម្ពុជាសម្រាប់ការប្រកួតជ្រើសរើសស្នាដៃតែងនិពន្ធរឿងខ្លី «ពានរង្វាន់អក្សរសិល្ប៍ស្លឹករឹត» លើកទី ១ នៅឆ្នាំ ២០២០ ខណៈបេក្ខជនត្រូវសរសេរឲ្យឆ្លុះបញ្ចាំងតាមប្រធានបទរួមមួយ «ជីវិតរស់នៅប្រចាំថ្ងៃរបស់ប្រជាជនកម្ពុជាក្នុងរបបកម្ពុជាប្រជាធិបតេយ្យ ប៉ុល ពត»។
កញ្ញា គង់ ច័ន្ទ វ៉ាន់ណេង ម្ចាស់ជយលាភីលេខ ៥។ រូបថត ហ្វេសប៊ុក
សម្រាប់ជយលាភីទាំង ១០ រូបនេះ យើងបានចម្រាញ់ចេញពីបេក្ខភាពដាក់ពាក្យប្រកួតចំនួន ៦៨ រូប ហើយជម្រុះលើកទី ១ យក ៣០ រូប និងលើកទី ២ ដែលក្រុមគណៈកម្មការបានសម្រេចយកបេក្ខភាពចំនួន ១០ រូបចុងក្រោយ ដោយផ្អែកទៅតាមលក្ខខណ្ឌនៃការវាយតម្លៃ និងតាមកម្រិតពិន្ទុខ្ពស់មកទាប ហើយជយលាភីទាំង ១០ រូបនោះមានទី១ បានលើស្នាដៃរបស់លោក ឧត្តមសេនីយ៍ទោ អ៊ុច សំណាង សរសេររឿងមានចំណងជើងថា «បាយក្តាំង» ទី២ បានទៅលើស្នាដៃរបស់លោក អៀ ហុកនីម សរសេររឿងមានចំណងជើងថា «ពេលម៉ែឃ្លាតទៅ» ទី៣ បានទៅលើស្នាដៃរបស់លោក វ៉ា មឿន សរសេររឿងមានចំណងជើងថា«ស្នាមដំបៅ» ទី៤ បានទៅលើស្នាដៃរបស់លោក ឃុត សុខឿន បានសរសេររឿងមានចំណងជើងថា «ក្រោមមេឃតែមួយ» ទី៥ បានទៅលើស្នាដៃរបស់កញ្ញា គង់ ច័ន្ទ វ៉ាន់ណេង បានសរសេររឿងមានចំណងជើងថា «ព្រះអាទិត្យឥតពន្លឺ» ទី៦ បានទៅលើស្នាដៃរបស់លោក ម៉ៅ សុវណ្ណឌី បានសរសេររឿងមានចំណងជើងថា «មួយថ្ងៃមួយយប់» ទី ៧ បានទៅលើស្នាដៃរបស់លោក ឆាន់ វុត្ថា បានសរសេររឿងមានចំណងជើងថា «ជើងមេឃពណ៌ក្រហម» ទី៨ បានទៅលើស្នាដៃរបស់លោក ស៊ឹម គឹមសាត បានសរសេររឿងមានចំណងជើងថា «មិនព្រមរៀបការ» ទី៩ បានទៅលើស្នាដៃរបស់លោកស្រី អ៊ុច ថាវី បានសរសេររឿងមានចំណងជើងថា «អ្នកទោសទួលស្លែង» និងទី១០ បានទៅលើស្នាដៃរបស់លោក រឹម ទិត្យបញ្ញា បានសរសេររឿងមានចំណងជើងថា «អាប់សែ»។
លោក រឹម ទិត្យបញ្ញា ម្ចាស់ជយលាភីលេខ ១០។ រូបថត ហ្វេសប៊ុក, លោកស្រី អ៊ុច ថាវី ម្ចាស់ជយលាភីលេខ ៩។ រូបថត ហ្វេសប៊ុក
លោកបណ្ឌិត ឡឹក ជំនោរ ក៏បញ្ជាក់បន្តដែរថា៖ «ចំពោះជយលាភីទាំង ១០ រូប យើងបានបែងចែកជា ២ ផ្នែក គឺចំនួន ៥ រូបចាប់ពីលេខទី១ ដល់លេខទី៥ នឹងត្រូវបានពានរង្វាន់ជយលាភី និងចំនួន ៥ រូបទៀតគឺយើង នឹងផ្តល់ជូនរង្វាន់លើកទឹកចិត្ត ព្រោះថាពួកគាត់ ក៏មានស្នាដៃសរសេររឿងខ្លីស្ថិតនៅក្នុងកម្រិតល្អពីការប្រកួតពានរង្វាន់អក្សរសិល្ប៍ស្លឹករឹតលើកទី១ នេះ ហើយតាមរយៈការប្រកួតនេះ យើងឃើញថា បេក្ខជនបានចូលរួមប្រកួត មានទាំងការសរសេររឿងផ្ទាល់ខ្លួន ដែលបានឆ្លងកាត់សម័យប៉ុលពត និងមានទាំងអ្នកនិពន្ធ ដែលបានសរសេររឿង តាមរយៈការសម្ភាសពីសាច់ញាតិចាស់ៗបានឆ្លងកាត់សម័យប៉ុលពត»។
គួរបញ្ជាក់ផងដែរថា ការប្រកួតជ្រើសរើសស្នាដៃតែងនិពន្ធរឿងខ្លី «ពានរង្វាន់អក្សរសិល្ប៍ស្លឹករឹត» លើកទី១ ឆ្នាំ ២០២០ ក្រោមប្រធានបទថា «ជីវិតរស់នៅប្រចាំថ្ងៃរបស់ប្រជាជនកម្ពុជា ក្នុងរបបកម្ពុជាប្រជាធិបតេយ្យប៉ុលពត» ក្នុងគោលបំណងរួមចំណែកថែរក្សា ឯកសារប្រវត្តិសាស្ត្រនៃជីវិតរស់នៅ របស់ប្រជាជនខ្មែរ នៅក្នុងរបបកម្ពុជាប្រជាធិបតេយ្យ ប៉ុល ពត តាមរយៈស្នាដៃតែងនិពន្ធ និងលើកស្ទួយតម្លៃអក្សរសាស្ត្រជាតិខ្មែរ ដោយសមាគមអ្នកនិពន្ធខ្មែរ បានសហការជាមួយមជ្ឈមណ្ឌលឯកសារកម្ពុជា។ ចំពោះការប្រគល់ពានរង្វាន់ដល់បេក្ខភាពជយលាភីនៃការបរកួតតែងនិពន្ធរឿងខ្លី «ពានរង្វាន់អក្សរសិល្ប៍ស្លឹករឹត» លើកទី១ នឹងជូនដំណឹងក្នុងពេលឆាប់ៗ៕
