ភ្នំពេញ៖ ការប្រកួតប្រជែងទេពកោសល្យគំនូរនៅកម្ពុជាឆ្នាំ ២០១៩ ឬ Kbach Artist Competition 2019 បានវិលត្រឡប់មកវិញទៀតហើយ នេះបើតាមសេចក្តីជូនដំណឹងពីគេហទំព័រនៃក្រុមរៀបចំការប្រកួត នៅវិចិត្រសាល Kbach Gallery បានប្រកាសជូនដំណឹងពីគេហទំព័រផ្លូវការរបស់ខ្លួននាពេលថ្មីៗនេះ។
បើតាមគេហទំព័រសិល្បៈក្បាច់បានឲ្យដឹងជាសារជូនដំណឹងក្នុងបណ្តាញសង្គមថា៖ «យើងខ្ញុំពិតជារំភើបរីករាយនឹងសូមប្រកាសជូនដល់សិល្បករទាំងអស់គ្នា ជាពិសេសសិល្បករវ័យក្មេងថា វិចិត្រសាលក្បាច់របស់យើងនឹងមានការប្រកួតប្រជែងស្នាដៃជា ៣ ប្រភេទនៅក្នុងឆ្នាំនេះ។
ទី១ គំនូរវិចិត្រសាលក្បាច់ (ផ្ទាំងក្រណាត់ ៤០ សង់ទីម៉ែត្រ x ៥០ សង់ទីម៉ែត្រ) ទី២ ផ្ទាំងគំនូរស្ទូឌីយោក្បាច់ (បង្កើតផ្ទាំងគំនូរលើជញ្ជាំងនៅវិចិត្រសាលក្បាច់ ទំហំ ១ ម៉ែត្រ គុណ ២ ម៉ែត្រ) និង ៣ រូបចម្លាក់ស្ទូឌីយោក្បាច់ (បង្កើតរូបចម្លាក់ណាមួយទៅតាមទំហំដែលពេញចិត្តនៅវិចិត្រសាលក្បាច់)។ សិល្បករដែលទទួលបានជយលាភីលេខ ១ នឹងទទួលបានរង្វាន់ជាសាច់ប្រាក់ចំនួន ១ ០០០ ដុល្លារ ក៏ដូចជាកិច្ចសន្យារយៈពេល ១ ឆ្នាំ ជាមួយនឹងវិចិត្រសាលក្បាច់ផងដែរ»។
ដោយឡែកជយលាភីលេខ ២ កាលពីការប្រកួតប្រជែងនៅឆ្នាំ ២០១៨ នោះជានិស្សិតពេទ្យឈ្មោះ លោក ហួរ សុបិន ដែលកំពុងតែរៀនជំនាញជាគិលានុបដ្ឋាកនៃសាកលវិទ្យាល័យវិទ្យាសាស្ត្រសុខាភិបាលនៅឆ្នាំទី២។ ខណៈស្នាដៃភាគច្រើនលោក សុបិន បានលើកយកពីគុណសម្បត្តិរបស់ព្រះនាងជ័យរាជទេវី ជាប្អូនស្រីរបស់ព្រះនាងឥន្ទ្រទេវី និងជាមហេសីទី ១ របស់ព្រះបាទជ័យវរ្ម័នទី ៧ ដែលជាមហាក្សត្រខ្មែរនៅសម័យអង្គរ។
គួររំឭកដែរថា វិចិត្រសាលក្បាច់ Kbach Gallery គឺជាវិចិត្រសាលដំបូងដែលមានការលាយផ្សំសិល្បៈបែបប្រពៃណីខ្មែរជាមួយសិល្បៈទីក្រុងបែបអន្តរជាតិ បង្កើតឡើងតាមក្បាច់រចនាប្លែកនានានៅតាមប្រាសាទ និងចង់សំដៅទៅលើគ្រឹះរចនាប័ទ្មនៃសិល្បៈខ្មែរ មានប្រភពចេញពីវប្បធម៌បុរាណនាសម័យអង្គរ ចម្លាក់ថ្មលើប្រាង្គប្រាសាទ អាទិទេព និងទេពអប្សរាជាអាទិ៍ ឆ្ពោះទៅរកស្នាដៃគំនូរបែបសហសម័យរបស់ខ្មែរ។
តាំងពីចាប់មានរូបរាងឡើងនៅឆ្នាំ ២០១៧ មកនោះ វិចិត្រសាលក្បាច់ក៏បានខិតខំប្រឹងប្រែង ដោយមិនខ្លាចហត់នឿយ ដើម្បីឲ្យមានការលើកស្ទួយលើវិស័យសិល្បៈគំនូរ ដ៏រុងរឿងរបស់ទីក្រុងភ្នំពេញ និងធ្វើឡើងមុនគេបង្អស់ក្នុងការបង្កើតនូវផ្ទាំងទស្សនីយភាពសិល្បៈទីក្រុងតាមរយៈការស្វែងរកការគាំទ្រ និងការលើកកម្ពស់ទៅវិចិត្រករឲ្យមានការបណ្តុះគំនិតទៅលើទម្រង់សិល្បៈខ្មែរនេះទៀតផង។
សេចក្តីជូនដំណឹងដដែលនេះបានបន្តថា៖ «វិចិត្រសាលក្បាច់ គឺជាទង់នាវានាំមុខនៅក្នុងការប្រមូលបណ្តុំសិល្បៈក្បាច់ មានការចូលរួមយ៉ាងពេញចិត្តពីក្រុមវិចិត្រករនានា និងមានគម្រោងជាច្រើនទៀត ដែលអមដោយគោលបំណងបង្កើតជាសហគមន៍មួយសម្រាប់ក្រុមវិចិត្រករខ្មែរនៅជំនាន់ក្រោយៗ ដែលអាចដាក់តាំងបង្ហាញនូវស្នាដៃខ្លួន និងលើកកម្ពស់តម្លៃសិល្បៈខ្មែរ»។
ដើម្បីទទួលបានការណែនាំពីរបៀបដាក់ពាក្យប្រកួតប្រជែងសិល្បៈក្បាច់ប្រចាំនៅឆ្នាំ ២០១៩ និងចង់ដឹងអំពីលក្ខន្តិកៈបែបបទនានានោះ ឬចង់បំពេញឯកសារពាក្យប្រឡង ដើម្បីទទួលបានពាក្យចូលរួមប្រកួតនោះលោកអ្នកសូមចុចទៅលើគេហទំព័រ ខាងក្រោមនេះ https://forms.gle/XMCY2kTzrDuTdQxQA៕