កូនភ្លោះជាង ៦ ០០០ គូ បានមកជួបជុំគ្នានៅកីឡដ្ឋានក្រុងកូឡុំបូ។ រូបថត AFP
.jpg)
ក្រុងកូឡុំបូ៖ ការប៉ុនប៉ងរបស់ប្រជាជនស្រីលង្កាក្នុងការគ្រងកំណត់ត្រាពិភពលោក តាមរយៈការប្រមូលផ្ដុំកូនភ្លោះដ៏ច្រើនគូបំផុតកាលពីថ្ងៃចន្ទបានបរាជ័យ ដោយសារតែអ្នកចូលរួមមកច្រើនពេក ពុំអាចឲ្យអ្នករៀបចំកម្មវិធីកត់ត្រាទាន់ពេលវេលា។
អ្នករៀបចំកម្មវិធីមកពីក្រុមកូនភ្លោះស្រីលង្កា បានប្រកាសឲ្យកូនភ្លោះមកពីគ្រប់តំបន់នៅស្រីលង្កា ធ្វើដំណើរមកកាន់ពហុកីឡដ្ឋាននៅក្រុងកូឡុំបូ ដើម្បីបំបែកឯតទគ្គកម្មប្រជុំកូនភ្លោះដ៏ច្រើនបំផុតក្នុងលោក ដែលកំណត់ត្រានេះធ្វើឡើងនៅតៃវ៉ាន់ កាលពីឆ្នាំ ១៩៩៩ ជាមួយចំនួនកូនភ្លោះពីរ ៣ ៩៦១ គូ កូនភ្លោះបី ៣៧ គ្រួសារ និងកូនភ្លោះបួន ៤ គ្រួសារ។
ប៉ុន្តែមហាជំនួបកូនភ្លោះនៅស្រីលង្កាកាលពីថ្ងៃចន្ទ ដោយសារមនុស្សកកកុញនៅពហុកីឡដ្ឋាន អ្នករៀបចំកម្មវិធីពុំអាចចុះឈ្មោះ ពិនិត្យរូបថត និងផ្ទៀងផ្ទាត់សំបុត្រកំណើតកូនភ្លោះបានទាន់ពេលវេលា។
ការសម្ដែងសិល្បៈរបស់ក្រុមនារីកូនភ្លោះ កាលពីថ្ងៃចន្ទកន្លងទៅ។ រូបថត AFP
អ្នកនាំពាក្យក្រុមកូនភ្លោះស្រីលង្កា Wasana Ranasinghe បានប្រាប់ទីភ្នាក់ងារ AFP ថា ចំនួនមនុស្សច្រើនពេកធ្វើឲ្យការរៀបចំកម្មវិធីពុំអាចឆ្លើយតបតាមស្ដង់ដាដ៏តឹងរ៊ឹងពីកំណត់ត្រាហ្គីណេស។
អ្នកនាំពាក្យដែលមានកូនភ្លោះស្រី ១ គូ អាយុ ១០ ឆ្នាំ បានឲ្យដឹងថា ក្នុងព្រឹត្តិការណ៍នោះ ចំនួនកូនភ្លោះជាង ៦ ០០០ គូ ដែលមានអាយុចន្លោះ ៣ ឆ្នាំ ទៅ ៨៩ ឆ្នាំ។ ពួកគេបានធ្វើការចុះឈ្មោះរយៈពេល ៥ ម៉ោង។ យ៉ាងណាមិញ ពួកគេពុំបានថតរូបជុំគ្នា តាមការណែនាំពីអ្នករៀបចំកម្មវិធីនោះទេ។
អ្នកនាំពាក្យរូបនេះបានបញ្ជាក់ថា៖ «យើងត្រូវរង់ចាំ ២ សប្ដាហ៍ទៀត ទើបដឹងថា តើជំនួបកូនភ្លោះរបស់យើង បានបំពេញលក្ខណសម្បត្តិគ្រប់គ្រាន់ក្នុងការបំបែកឯតទគ្គកម្មបានដែរឬទេ?»៕ AFP
