ក្រុងស៊ីដនី៖ ក្រពើ ១ ក្បាល រស់នៅក្នុងព្រែកភាគពាយព្យប្រទេស អូស្ដ្រាលី កំពុងស្ថិតក្នុងស្ថានភាពវឹកវររវាងក្រុមអាជ្ញាធរដែលចង់ចាប់វា និងអ្នកស្រុកដែលចង់ពង្រីកព្រែកសម្រាប់ឲ្យស្ដេចទឹកមួយនេះរស់នៅស្រួល។
ក្រុមមន្ដ្រីមកពីរដ្ឋឃ្វីនលែន រៀបចំអន្ទាក់ចាប់ក្រពើសមុទ្រ ដែលពលរដ្ឋហៅថា ហូវើដ ដោយបាននិយាយថា វាជាសត្វនាំគ្រោះដល់មនុស្ស ។
ក្មេងប្រុសម្នាក់បារម្ភការសម្រេចរបស់អាជ្ញាធរ ដែលរូបគេបានសរសេរលិខិតមួយផ្ញើទៅកាន់រដ្ឋមន្ដ្រីក្រសួងបរិស្ថាន លោកស្រី Leeanne Enoch ដោយបានអង្វរករឲ្យក្រពើ ១ ក្បាលនេះ បន្ដរស់ក្នុងព្រែកដដែល។
កុមារា អេលរ៉យ វូដស៍ អាយុ ១០ ឆ្នាំ មកពីតំបន់ Miallo នៃរដ្ឋឃ្វីនលែន សរសេរថា៖ «ខ្ញុំរស់នៅតាមដងផ្លូវព្រែកឫស្សី ៥ ឆ្នាំហើយ ខ្ញុំចូលចិត្ដមើលក្រពើ ហូវើដ សំដិលថ្ងៃ និងឈរមើលវាពីលើស្ពានរៀងរាល់ល្ងាច»។
ដាវីដ វ៉ាយ ជាម្ចាស់ជំនួញនាំភ្ញៀវទស្សនាក្រពើក្នុងស្រុកម្នាក់ឲ្យដឹងថា មានអ៊ីមែលប្រមាណ ៣០០ សារ ផ្ញើមកគាំទ្រឲ្យរក្សាទុកក្រពើប្រវែង ៤ ម៉ែត្រនេះនៅកន្លែងដដែល និងមានអ្នកតវ៉ាតែម្នាក់ប៉ុណ្ណោះ។
សូម្បីតែសួនសត្វអូស្ដ្រាលីក្នុងរដ្ឋឃ្វីនលែន ដែលដំណើរការដោយអ្នកមេម៉ាយអតីតអ្នកប្រមាញ់ក្រពើល្បីឈ្មោះ ស្ដេវ អ៊ីរវីន ក៏ចង់ទុកដែរ។ សួនសត្វឲ្យដឹងថា ពិតជាមានមោទនភាពចំពោះកិច្ចខិតខំប្រឹងប្រែងរបស់ក្មេងប្រុស អេលរ៉យ។ មច្ចុរាជប្រហារចំណីគ្រប់លំដាប់ថ្នាក់ជាធាតុផ្សំសំខាន់នៃប្រព័ន្ធអេកូឡូស៊ី។ ប៉ុន្ដែរដ្ឋាភិបាលបានបញ្ជាក់ថា អន្ទាក់នៅតែបន្ដដាក់ ដោយក្រពើយក្សនេះនឹងមិនត្រូវបានសម្លាប់នោះទេ បើចាប់ខ្លួនបាន។
មន្ដ្រីនាយកដ្ឋានបរិស្ថានឲ្យដឹងថា តុល្យភាពរវាងតម្រូវការកិច្ចការពារសុវត្ថិភាពសាធារណៈ និងតម្រូវការអភិរក្សចំនួនក្រពើក្នុងព្រៃត្រូវតែធ្វើទន្ទឹមគ្នា៕ AFP/HR