ក្រុមស្គរនារី ដែលបង្កើតថ្មីមានសមាជិកស្រ្តីទាំងអស់ឈ្មោះ «មេធា» នាពេលសម្តែងកាលពីឆ្នាំ ២០១៨។ រូបថត Sokharun Sam
.jpg)
ក្រុងសៀមរាប៖ ក្រុមស្គរនារី ដែលមានសមាជិកសុទ្ធតែជាស្រ្តីឈ្មោះ «មេធា» ចេះលេងឧបករណ៍ភ្លេងបុរាណ បង្កើតកាលពីឆ្នាំ ២០១៧ ហើយបានហាត់រៀនបទភ្លេងថ្មី ប្រកបដោយទេពកោសល្យ និងច្នៃប្រឌិតតាមស្នាដៃភ្លេងថ្មី «មន្តភ្លេង» នឹងបង្ហាញវត្តមានសាជាថ្មីនៅលើឆាកតន្រ្តី Bambu Stage នៅខេត្តសៀមរាប ចាប់ពីថ្ងៃចន្ទ ទៅដល់ថ្ងៃសៅរ៍ នារដូវកាលថ្មីឆ្នាំ ២០១៩ នេះ។
បើតាមលោក គាត សុគីម ដែលជាបុគ្គលិកផ្នែកទំនាក់ទំនងព័ត៌មាន នៃអង្គការសិល្បៈខ្មែរអមតៈ បានឲ្យដឹងពីវត្តមានវិលមកសម្តែងសាជាថ្មីរបស់ក្រុមស្គរនារី «មេធា» នៅលើឆាកតន្រ្តីក្នុងខេត្តសៀមរាប ថា៖ «ការសម្ដែងរបស់ក្រុមស្គរនារី មេធា នាំមកជូនដោយបទពិសោធសិល្បៈខ្មែរអមតៈ គឺជាកម្មវិធីមួយរបស់អង្គការសិល្បៈខ្មែរអមតៈ។ មេធា គឺជាក្រុមតន្ត្រីករ មានសមាជិកជាស្ត្រីទាំងអស់ បង្កើតឡើងនៅខែមករា ឆ្នាំ ២០១៧ ដោយអង្គការសិល្បៈខ្មែរអមតៈ បានផ្ដល់ជំនួយឧបត្ថម្ភដល់ស្ត្រី ១ ក្រុម នៅខេត្តសៀមរាបនេះ ដើម្បីដំឡើងនូវស្នាដៃថ្មីមួយ ដែលមានស្ត្រីជាអ្នកលេងស្គរ ខណៈតាំងពីដើមមកមានតែក្រុមបុរសប៉ុណ្ណោះ គឺជាអ្នកលេងស្គរនោះ។ ពេលបច្ចុប្បន្នកម្មវិធីពិសោធន៍សិល្បៈខ្មែរ កំពុងរៀបចំការសម្ដែងជាប្រចាំនៅលើឆាកសម្ដែងនៃបរិវេណសារមន្ទីរជាតិ។ ក្រៅពីនោះ ក៏មានការសម្ដែងលក្ខណៈឯកជន សិក្ខាសាលាសិល្បៈ និងដំណើរកម្សាន្តបែបសិល្បៈផងដែរ»។
ក្រុមស្គរនារី «មេធា» មានសមាជិកសុទ្ធតែជាស្រ្តីចំនួន ៧ នាក់។ រូប Sovan Philong
លោក សុគីម បន្តថា៖ «សម្រាប់កម្មវិធីសម្ដែងនៅសៀមរាប គឺជាការរៀបចំការសម្ដែងជាប្រចាំលើកដំបូង ក្រោមកម្មវិធីពិសោធន៍របស់សិល្បៈខ្មែរអមតៈ។ គម្រោងនេះ ក៏បានទទួលជោគជ័យខ្លាំង ហើយក្រុមក៏សម្រេចចិត្តបន្តការងារនេះទៀត ដើម្បីជម្នះផ្នត់គំនិតចាស់អំពីស្ត្រី និងសិល្បៈ ដោយបានហៅខ្លួនឯងថា «មេធា» ដែលមានន័យថា «គំនិត ឬប្រាជ្ញា អាចទម្លុះទម្លាយដំណើរអ្វីនីមួយៗ»។ ក្រុមនេះក៏បានដំឡើងស្នាដៃសម្ដែង ២ ដង នៅអង្គការស្ត្រីមួយក្នុងស្រុក និងសម្ដែងម្ដងទៀត នៅកម្មវិធីមហោស្រពបុណ្យរួម «REPfest» ដែលមានសិល្បករជាច្រើនប្រទេសចូលរួមនៅខេត្តសៀមរាប។ ក្រុម មេធា នឹងធ្វើការជជែកដេញដោលទៅលើតួនាទីស្តីពីរឿងអតីតជាមួយនឹងសមាជិកសុទ្ធតែស្រ្តីនោះផងដែរ»។
លក្ខណៈពិសេស ក្រុមស្គរនៅក្នុងក្រុមមេធា គឺជាស្គរដែលត្រូវបានគេស្រាវជ្រាវ និងដកស្រង់ចេញមកពីជញ្ជាំងប្រាសាទបាយ័ន និងមាននូវប្រវត្តិជាស្គរហែក្បួនទ័ព កាលពីសម័យបុរាណ។ ស្គរក្រុមមេធា នេះ មានស្គរសាំងណា ស្គរទីមីឡា ស្គរធំ ស្គរតូច ស្គរដៃ ហើយសុទ្ធតែមានគូ ញីឈ្មោលទាំងអស់។ ទៅថ្ងៃអនាគតក្រុមនេះក៏មានបំណងចង់ស្រាវជ្រាវឧបករណ៍ផ្លុំដូចជា ខ្យង ត្រែ ស្នែង ជាដើម មកលេងជាមួយឧបករណ៍ស្គរ និងបង្កើតបទភ្លេងថ្មីកាន់តែសម្បូរបែប និងអស្ចារ្យមួយកម្រិតទៀត។
ការសម្តែងក្រុមស្គរនារី «មេធា» នៅឯឆាកតន្រ្តី Bambu Stage នៃខេត្តសៀមរាប នៅវេលាម៉ោង ៨ យប់ គឺសម្តែងចាប់ពីថ្ងៃចន្ទដល់ថ្ងៃសៅរ៍ ខណៈសំបុត្រចូលទស្សនា ១ សន្លឹក តម្លៃ ២៤ ដុល្លារ សម្រាប់មនុស្សធំ ហើយសំបុត្រ ១ សន្លឹកតម្លៃ ១២ ដុល្លារ សម្រាប់កុមារក្រោមវ័យ ១២ ឆ្នាំ និងការចូលទស្សនាឥតគិតថ្លៃសម្រាប់កុមារក្រោមវ័យ ៦ ឆ្នាំ៕
