ភ្នំពេញ : កូនខ្មែរមួយក្រុមត្រៀមទុកវាយលុកទីផ្សារយូធូប និងបណ្តាញសង្គមផ្សេងៗលើវីដេអូគំនូរជីវចលមិនត្រឹមតែក្នុងប្រទេស ប៉ុន្តែចង់ទាក់ទាញចិត្តមនុស្សក្នុងពិភពលោកឲ្យចាប់អារម្មណ៍មកលើស្នាដៃកូនខ្មែរ ដែលមិនទាន់មាននរណាម្នាក់ធ្វើបាននៅឡើយ។
ក្រោមដំបូលផ្ទះជួលមួយកន្លែងពេញទៅដោយកុំព្យូទ័រ ជាមួយមនុស្ស ៦ នាក់ជាអ្នកមានបទពិសោធបង្កើតវីដេអូគំនូរជីវចលដ៏រស់រវើក និងទាក់ទាញជាមួយរូបភាពធម្មជាតិស្រស់ស្អាតដែលមិនបង្ហាញពីភាសានិយាយ អ្នកទស្សនាអាចស្វែងយល់សាច់រឿងតាមរយៈកាយវិការរបស់តួអង្គ។
ក្រោមការដឹកនាំរបស់លោក យក់ ស៊ីវ៉ាល់រី អាយុ ៣០ ឆ្នាំបានប្រាប់ភ្នំពេញប៉ុស្តិ៍ថា៖ «ខ្ញុំចាប់ផ្តើមធ្វើវីដេអូគំនូរជីវចលនេះច្រើនឆ្នាំហើយ ប៉ុន្តែក៏ត្រូវបានបញ្ឈប់ជាច្រើនដងហើយដែរ ដោយសារវាមានការលំបាកក្នុងការផលិតខ្លាំងពេក។ វាមិនដូចជាភាពយន្តសម្ដែងដោយមនុស្ស ការផលិតគ្រាន់តែរៀបតួអង្គនោះទេគឺត្រូវគូរតួអង្គខ្លួនឯង និងឆ្លងកាត់ជាច្រើនដំណាក់កាល ជាពិសេសពេលត្រូវរ៉េនឌ័រវីដេអូមានរយៈពេលដល់ ២ ទៅ ៣ ថ្ងៃឯណោះ។ វាបានធ្វើឲ្យពួកយើងអស់សង្ឃឹមក្នុងការផលិតវា»។
លោក យក់ ស៊ីវ៉ាល់រី ដែលសិក្សាលើការគូរគំនូរអស់រយៈពេល ៥ ឆ្នាំបានបន្តថា៖ «ប៉ុន្តែពួកយើងបានបន្តផលិតវាទៀត ដោយសារមានកម្មវិធីចេញថ្មីជាច្រើនបានសម្រួលដល់ការផលិត ទើបពួកយើងបន្តការធ្វើវាឲ្យដល់គោលដៅដែលយើងបានគ្រោងទុកដោយបានចាប់ផ្តើមតាំងពីវីដេអូដែលមានរយៈពេល ២ ទៅ ៣ នាទីឡើងទៅដល់ ៩០ នាទី»។
ស្ថាបនិករូបនេះក៏បានបញ្ជាក់ថា វីដេអូឈ្មោះ «យក្សតូច» គឺជាវីដេអូដែលតួអង្គជាយក្សមានចង្កូមតូចៗជាចំណាប់អារម្មណ៍របស់កុមារ។ ផ្តើមពីតួអង្គតែ ២ នាក់ និងរូបភាពខាងក្រោយបែបធម្មតា វិវឌ្ឍទៅជាតួអង្គ ៥ នាក់ជាមួយរូបភាពផ្ទៃក្រោយជាលក្ខណៈធម្មជាតិ និងបកស្រាយអត្ថន័យតាមរយៈកាយវិការតួអង្គដោយមិនមានការនិយាយគ្នារវាងតួអង្គនឹងតួអង្គឡើយ។ បើសិនជាតួអង្គបកស្រាយដោយការនិយាយ ពេលបង្ហោះលើបណ្តាញសង្គម ជនបរទេសមិនអាចយល់ពីភាសាខ្មែរ។
ចំពោះឈុតឆាកប្រយុទ្ធវិញលោក យក់ ស៊ីវ៉ាល់រី បង្ហើបថាលោកនឹងចេញនៅពេលខាងមុខដែលមានអ្នកក្លាហានម្នាក់ព្រមទាំងការបង្ហាញសម្លៀកបំពាក់សម័យមុនដោយមានបង់កក្រមា ដៃកាន់អាវុធប្រយុទ្ធជាមួយផ្ទៃក្រោយជាប្រាសាទព្រមទាំងតួអង្គមានភាពរហ័សរហួនដែលអាចមានរយៈពេលដល់ ៩០ នាទីឯណោះ។
លោក យក់ ស៊ីវ៉ាល់រី បានប្រាប់ពីការរចនាគំនូរជីវចលថា៖ «ដំបូងត្រូវរចនាតួអង្គ និងកំណត់ចរិតលក្ខណៈនិពន្ធសាច់រឿងគូររូបភាពតាមលំដាប់លំដោយ ដំឡើង 3D Asset មានតួអង្គ សម្ភារផ្សេងៗ និងទេសភាព ការចងឆ្អឹង Rigging ជាការដាក់បង្កើត Digital Sketeleton សម្រាប់តួអង្គ ការធ្វើរចនា Animation ការដាក់ពណ៌សម្ភារ និងធាតុផ្សំផ្សេងៗទៅកាន់ Digital Assets ព្រមទាំងដំឡើងពន្លឺ និងដាក់សំឡេង ដើម្បីឲ្យសមជាមួយសាច់រឿងផងដែរ»។
លោកថាលោកជាមួយក្រុមការងារបានត្រៀមរួចជាស្រេចដើម្បីផលិតភាពយន្តខ្លីមានរយៈពេល ១៥ នាទីសម្រាប់យកទៅប្រកួតក្នុងប្រទេស និងនៅលើឆាកអន្តរជាតិដោយបានសិក្សាបន្ថែមពីកម្មវិធីថ្មីៗឲ្យកាន់តែល្អជាងមុន។
លោក ស៊ីវ៉ាល់រី ទទួលផលិតស្ពតគំនូរជីវចល និងប្រកាសបង្រៀនផលិតវីដេអូជីវចលដែរ ដើម្បីបង្កើតធនធានមនុស្សកាន់តែច្រើនជាមួយនឹងតម្លៃ ៣០០ ដុល្លារសម្រាប់រយៈពេល ៨០ ម៉ោង៕