ក្រុងឌូបៃ៖ បន្ទប់បញ្ជាស្ថិតនៅកណ្ដាលសមុទ្រខ្សាច់ក្រុងឌូបៃ ការបង្កើតថ្ងៃរះ និងថ្ងៃលិចបែបសិប្បនិម្មិតដូចនៅន័រវែស និងចរន្ដទឹកដ៏ត្រជាក់ស្រេងនៃសមុទ្រអាត្លង់ទិក ត្រូវបានច្នៃប្រឌិតឡើងសម្រាប់ជាអត្ថប្រយោជន៍ដល់ត្រីសាល់ម៉ុនរាប់ពាន់ក្បាល ដែលត្រូវបានចិញ្ចឹមក្នុងអាងបិទជិតនៃដែនដីល្បីធនធានប្រេងនៃលម្ហវាលខ្សាច់ដ៏ល្វឹងល្វើយ។
ឌូបៃជាដែនដីកែច្នៃយ៉ាងសម្បើមអស្ចារ្យដែលគ្មានអ្វីត្រូវប្លែកនោះទេ ដោយជាមួយលទ្ធភាពឥតដែនកំណត់ រួមទាំង ដែនកោះធាងដូង និងជម្រាលភ្នំព្រឹលសិប្បនិម្មិតក្នុងផ្សារទំនើបបិទជិត ខណៈអាកាសធាតុខាងក្រៅជាង ៤០ អង្សារ។
លោក បាដែរ ប៊ីន មូបារ៉ាក់ នាយកប្រតិបត្ដិកសិដ្ឋានត្រី បាននិយាយថា ប៉ុន្ដែកសិដ្ឋានត្រីសាល់ម៉ុនលើសមុទ្រខ្សាច់ គឺជាអ្វីដែលគ្មាននរណាម្នាក់អាចនឹកស្រមៃដល់។ លោកបន្ដថា៖ «នេះពិតជាអ្វីដែលយើងកំពុងតែធ្វើនៅឌូបៃ»។
ក្នុងកសិដ្ឋាននេះ ទឹកហូរ និងសីតុណ្ហភាពត្រូវបានច្នៃឡើងសម្រាប់ផ្ដល់ផាសុកភាពដល់ការរស់នៅរបស់ត្រីសាល់ម៉ុន ក្នុងធុងទឹកធំចំនួន ៤។
លោក មូបារ៉ាក់ បានប្រាប់ទីភ្នាក់ងារ AFP ថា៖ «យើងផ្ដល់ឲ្យពួកវានូវពន្លឺថ្ងៃរះ ថ្ងៃលិច ចរន្ដផ្លាស់ប្ដូរទឹក ហើយយើងក៏មានទឹកជ្រៅ និងទឹករាក់ថែមទៀត ដែលចម្លងពីធម្មជាតិ»។
ត្រីសាល់ម៉ុនតែងតែរស់នៅក្នុងផ្ទៃទឹកត្រជាក់ ដូចជា នៅតំបន់ដែនសមុទ្រប្រទេស អៀរឡង់ ស្កុតលែន និងអាឡាស្កា ជាមូលហេតុកសិដ្ឋានត្រីសាល់ម៉ុនអាត្លង់ទិក ក្នុងប្រទេសដែលសីតុណ្ហភាពអាចកើនដល់ ៤៥ អង្សាសេ ដ៏សែនក្ដៅ។
លោក មូបារ៉ាក់ បានបន្ដថា៖ «ការបង្កើតបរិយាកាសសីតុណ្ហភាពដ៏ត្រឹមត្រូវសម្រាប់ត្រីសាល់ម៉ុន គឺជាកិច្ចការលំបាកចំពោះពួកយើង។ ប៉ុន្ដែយើងនឹកឃើញគំនិតបង្កើតទិដ្ឋភាពផ្ទៃទឹកងងឹតដូចនឹងសភាពទឹកជ្រៅ ចរន្ដទឹកហូរខ្លាំង ដូចនៅមហាសមុទ្រ រួមទាំងរសជាតិប្រៃ និងសីតុណ្ហភាពបែបអាត្លង់ទិក»។
កសិដ្ឋាននេះចិញ្ចឹមត្រីសាល់ម៉ុនបានចន្លោះពី ១០ ០០០ ទៅ ១៥ ០០០ ក្បាលរៀងរាល់ខែ។ កសិដ្ឋាននេះត្រូវបានបង្កើតឡើងក្នុងឆ្នាំ ២០១៣ ជាមួយការគាំទ្រពីព្រះរាជទាយាទ ព្រះអង្គម្ចាស់ សៃខ៍ ហាមដាន ប៊ីន មូហាមេដ ប៊ីន រ៉ាស៊ីដ អាល់ម៉ាកធូម ដើម្បីកសាងកសិដ្ឋានត្រីសាល់ម៉ុន និងត្រីផ្សេងៗទៀត រួមទាំងត្រីជប៉ុន ដែលធ្វើជាអាហារស៊ូស៊ិទៀតផង។
យោងតាមសភាពាណិជ្ជកម្ម និងឧស្សាហកម្មឌូបៃ បានឲ្យដឹងថា អារ៉ាប់រួម បាននាំចូលផលិតផលត្រី ក្ដាម បង្កង និងប្រភេទអយស្ទើរ ៦៣០ លានដុល្លារ ក្នុងឆ្នាំ ២០១៧ និងនាំចេញតែជាង ៧៦ លានដុល្លារ។
លោកបានបន្ដថា៖ «ក្នុងករណីមានការរំខាន ព្យុះ ឬទឹកជំនន់ អារ៉ាប់រួម នឹងអាចផ្គត់ផ្គង់ស្បៀងទាំងនេះដោយខ្លួនឯង។ នេះជាគោលបំណងចម្បងបំផុត»៕ AFP/HR