មេចុងភៅ Alexandre Mazzia ទទួលសារពីប្រិយមិត្ដ ៣៥០ សារ សួរពីវិធីចម្អិនម្ហូបនៅផ្ទះ។ រូបថត AFP
.jpg)
ក្រុងប៉ារីស៖ អផ្សុកនឹងការសម្ងំនៅតែផ្ទះ ចុងភៅដ៏ល្បីៗនៅបារាំងនាំគ្នាបញ្ចេញស្នាដៃធ្វើម្ហូបងាយៗ ផ្ដល់ភាពស្រស់ស្រាយដល់ប្រិយមិត្ត ដោយមិនចាំបាច់ប្រើប្រាស់រូបមន្តស្មុគស្មាញដូចនៅភោជនីយដ្ឋានលំដាប់ខ្ពស់។
មេចុងភៅ Cyril Lignac ជាតារារះលើវិស័យម្ហូបអាហារនិយាយថា៖ «ថ្ងៃនេះ អត់មានហៅចុងភៅថា លោក Lignac តាមឈ្មោះផ្លូវការអីទេ។ ហៅខ្ញុំថា Cyril ធម្មតាៗបានហើយ។ ខ្ញុំក៏មិនខុសអ្វីពីបងប្អូនបារាំងយើងទេ គឺចូលចិត្តទៅផ្សារក្បែរផ្ទះទិញបន្លែបន្លុកដាំស្លដូចតែគ្នាហ្នឹង»។
ពាក់អាវយឺតរលុងៗ ចម្អិនម្ហូបនៅឯចង្ក្រានបាយក្នុងផ្ទះ លោក Cyril រៀបរាប់ថា៖ «អត់មានរូបមន្តអីលាក់បាំងទេ គ្រឿងផ្សំយកចេញពីទូទឹកកក និងធ្នើគ្រឿងទេស នៅផ្ទះយើងដូចៗគ្នា។ តោះចាប់ផ្ដើម»។
រីឯមេចុងភៅនារីល្បីល្បាញប្រចាំនៅក្រុងប៉ារីស អ្នកស្រី Amandine Chaignot បង្ហាញវីដេអូ កំពុងលាងចានបណ្ដើរ និងឆ្លៀតចម្អិនម្ហូបខុសពីទម្លាប់នៅភោជនីយដ្ឋាន។
កំពុងចម្អិនម្ហូបងាយៗ ទំពាំងបារាំង ស៊ុត និងប៊័រ អ្នកស្រីប្រាប់ថា៖ «កុំឃើញម្ហូបសាមញ្ញៗអ៊ីចឹង រសជាតិវាឆ្ងាញ់ណាស់ មិនគួរមើលរំលងទេ»។
មេចុងភៅម្ហូបមេឌីទែរ៉ាណេ ជាប់ផ្កាយ ២ ពីមីសឺលីន លោក Alexandre Mazzia បានបង្ហោះរូបមន្តចម្អិនម្ហូបតម្រូវតាមស្ថានភាពបម្រាមចេញក្រៅផ្ទះ។
ដោយប្រាប់ទស្សនិកជនឲ្យចាត់ទុកលោក ជាឪពុកចូលផ្ទះបាយធ្វើម្ហូបជាមួយកូនៗនោះ លោករៀបរាប់ថា៖ «ខ្ញុំបានទទួលសារពីប្រិយមិត្ត ចំនួន ៣៥០ សារ ពីវិធីចម្អិនសណ្ដែកបៃតង និងធ្វើពងមាន់ចៀនអូមើឡែត។ អ្នកខ្លះសួរថា ចុះប្រសិនបើខ្វះក្រូចឆ្មារ តើអាចប្រើប្រាស់ផ្លែប៉ោមបៃតងជំនួសបានទេ ចុះបើអស់គ្រាប់ស្វាយចន្ទី អាចយកធញ្ញជាតិផ្សេងជំនួសបានទេ»។
មេចុងភៅជាប់ផ្កាយ ៣ ពីមីសឺលីន Christophe Bacquie ត្រូវបានប្រពន្ធទទូចឲ្យផ្សាយចំណេះដឹងធ្វើម្ហូបតាមបណ្ដាញសង្គមអ៊ីនស្តាក្រាម។
ជាមួយស្ថានភាពផ្សារទំនិញខ្លះបិទទ្វារ លោក Christophe Bacquie បានណែនាំប្រិយមិត្តថា៖ «យើងត្រូវចេះច្នៃអ្វីដែលយើងមាន ហើយក្នុងនាមជាមេចុងភៅម្នាក់ យើងអត់គួរប្រើប្រាស់គ្រឿងផ្សំអីស្មុគស្មាញទេ។ យើងត្រូវតែធ្វើជាគំរូដល់ពលរដ្ឋ»៕ AFP
