ឆ្កែរបស់លោក អូបាម៉ា ធ្លាប់ជាសម្លាញ់ជើង ៤ ដ៏មានប្រជាប្រិយនៅសេតវិមាន ស្លាប់ដោយសារជំងឺមហារីក
ក្រុងវ៉ាស៊ីនតោន៖ សុនខប្រចាំគ្រួសារអតីតប្រធានាធិបតីអាមេរិក លោក បារ៉ាក់ អូបាម៉ា ឈ្មោះ បូ (Bo) ដែលក្លាយជាសមាជិកសេតវិមានដ៏មានប្រជាប្រិយ បានស្លាប់កាលពីថ្ងៃសៅរ៍ ដោយសារជំងឺមហារីក ដែលលោក អូបាម៉ា បាននិយាយរំឭកពីការចងចាំសម្លាញ់ជើង៤ ថា ជាសត្វដ៏សុភាពរាបសា។
លោក អូបាម៉ា បានសន្យាជាមួយកូនស្រី ម៉ាលីយ៉ា និង សាសា ថា ពួកគេអាចចិញ្ចឹមសត្វបានក្រោយការបោះឆ្នោតឆ្នាំ ២០០៨ ហើយ បូ បានចូលរួមក្នុងគ្រួសារនេះមិនយូរប៉ុន្មាន បន្ទាប់ពួកគេរើមកកាន់សេតវិមាន។
លោក អូបាម៉ា បានសរសេរលើ Twitter ដោយបានចែករំលែករូបថតលោក និង បូ រត់លេងនៅបរិវេណសេតវិមាន ហើយ បូ ត្រូវបានក្មេងៗអង្អែលលេងថា៖ «ថ្ងៃនេះ ក្រុមគ្រួសារយើងបានបាត់បង់មិត្ដភក្ដិជិតស្និទ្ធ និង ជាគូកនដ៏ស្មោះត្រង់ម្នាក់»។
លោកបានបន្ដថា៖ «អស់រយៈពេលជាង ១ ទសវត្សរ៍ បូ គឺជាសត្វតំណាងឱ្យភាពរឹងមាំ និងសុភាពរាបសាក្នុងជីវិតយើង។ គាត់រីករាយក្នុងការចែករំលែកសេចក្ដីល្អ និងទុក្ខព្រួយពីយើងគ្រប់ពេលវេលា»។
លោកបន្ថែមថា៖ «គាត់ជាសត្វមានភាពអំណត់ ដែលមករួមរស់ក្នុងសេតវិមាន ដោយពូកែព្រួស តែមិនចេះខាំ ចូលចិត្ដហក់លោតក្នុងអាងទឹកនៅរដូវក្ដៅ ចូលចិត្ដលេងជាមួយក្មេងៗ មកឆ្វែលតុបាយ និងមានរោមស្អាត»។
បូ ជាសត្វឆ្កែពូជទឹកព័រទុយហ្គាល់ពណ៌ខ្មៅលាយស ត្រូវបានប្រគល់ជាកាដូដល់លោក អូបាម៉ា ពីសំណាក់សមាជិកព្រឹទ្ធសភា អេដវើដ ឃេនណេឌី និងត្រូវបានជ្រើសរើស ដោយសារសភាពរោមស្អាតរបស់វា។
ឆ្កែនេះរមែងបង្ហាញខ្លួននៅក្នុងព្រឹត្ដិការណ៍នានានៅសេតវិមាន ជាពិសេស ពិធីបុណ្យ Easter Egg Roll ប្រចាំឆ្នាំជំនួបជាមួយសម្ដេចប៉ាបសួរសុខទុក្ខកុមារតាមមន្ទីរពេទ្យ និងជិះ Air Force One ជាមួយប្រធានាធិបតី។
អតីតស្ដ្រីទី ១ អាមេរិកលោកស្រី មីឆែល អូបាម៉ា បានសរសេរនៅលើអ៊ីនស្ដាក្រាមថា៖ «ជាសមាជិកម្នាក់ក្នុងគ្រួសារយើងប្រាកដជានឹក បូ ខ្លាំង។ ប៉ុន្ដែយើងក៏អរគុណដែលគាត់រស់នៅក្នុងជីវិតដ៏រីករាយកន្លងមក»៕
