.jpg)
ក្រុងប៉េកាំង: លយជាប់នឹងជ្រលងភ្នំកម្ពស់ជាង ៣០០ ម៉ែត្រ ដែលទិដ្ឋភាពជ្រលងខ្ពស់ច្រូងច្រាងទាំងនេះត្រូវបានប្រើក្នុងភាពយន្ដប្រឌិត «Avatar» ជណ្ដើរយោងក្រៅអគារដ៏ខ្ពស់បំផុតក្នុងពិភពលោកបាននាំទេសចរចិត្ដសឿងទស្សនាទស្សនីយភាពស្រៀវឆ្អឹងខ្នង។
ជណ្ដើរយោងភ្លោះ ៣ ប្រឡោះ នៅឧទ្យានព្រៃហ្សាងជៀជី ភាគកណ្ដាលប្រទេសចិន បានបង្ហូតខ្លួនឡើងជ្រលងភ្នំត្រឹមរយៈពេលតែ ៨៨ វិនាទី ជាគោលដៅព្យាបាលវិស័យទេសចរណ៍ក្នុងស្រុក ក្រោយពីកូរ៉ូណាបានបង្ខំឲ្យមានវិធានការរឹងបណ្ដឹងការធ្វើដំណើរ និងបិទប្រទេសកាលពីដើមឆ្នាំ។
ជណ្ដើរយោងបានដឹកជញ្ជូនភ្ញៀវទៅកាន់កំពូលភ្នំ ដែលត្រូវបានប្រើជាលំនាំឈុតឆាកនៃដែនដីមនុស្សខៀវ ណាវី របស់ផលិតករ ចេមស៍ ខាមេរ៉ុន ក្នុងឆ្នាំ ២០០៩។
លោក គីវ កេ អាយុ ៤៥ ឆ្នាំ ដែលធ្វើដំណើរលើជណ្ដើរយោងជាមួយក្រុមគ្រួសារ បាននិយាយថា៖ «មូលដ្ឋានមួយដែលយើងមកទីនេះគឺថា ទីឋាននេះស្ថិតក្នុងភាពយន្ដរឿង Avatar។ ភាពយន្ដហូលីវូដនោះពិតជាល្អមើលមែនទែន ហើយវារំលេចនូវទស្សនីយភាពស្រស់ស្អាតផងដែរ»។
លោក លីវ ជា ជាអ្នកគ្រប់គ្រងក្រុមហ៊ុនជណ្ដើរយោង ដែលមានឈ្មោះថា «នាគមួយរយ» បាននិយាយថា៖ «រចនាសម្ព័ន្ធភូមិសាស្ដ្រពិតជាស័ក្ដិសមក្នុងការប្រើប្រាស់ជណ្ដើរយោងសម្រាប់ជាមធ្យោបាយដឹកជញ្ជូន។ ដូច្នេះ យើងបានផលិត Bailong Elevator»។
លោកបានបន្ថែមថា៖ «កាលពីមុន ប្រើតែទូរខ្សែរ៉តដែលសមត្ថភាពមានកំណត់។ ដូច្នេះ ភ្ញៀវទេសចរត្រូវរង់ចាំរយៈពេលយូរ»។
ជម្រើសមួយផ្សេងទៀត គឺការដើរថ្មើរជើងឡើងភ្នំរយៈពេល ៣ ម៉ោង។
ជិន ស៊ីហាវ ជានិវត្ដជន បានប្រាប់ AFP ក្រោយចុះពីជណ្ដើរយោង ដែលមានតម្លៃសំបុត្រ ១៩ ដុល្លារថា៖ «វាពិតជាលឿនខ្លាំងណាស់»។
ភ្ញៀវទេសចរប្រមាណ ៨០០ នាក់ នាំគ្នាឡើងជិះជណ្ដើរយោងរៀងរាល់ឆ្នាំ។ ប៉ុន្ដែចំនួននេះបានថយចុះខ្លាំងពីចំនួនមធ្យម ១៤ ០០០ នាក់ កាលពីមុនកូវីដ៕ AFP/HR
