បទចម្រៀងរបស់ ចាស្ទីន ប៊ីប៊ើ ធ្វើឲ្យទេសចរមកលេងទីនេះរឹតតែច្រើន។ រូបថត AFP
.jpg)
ក្រុងរ៉ៃក្យាវិក: អៀរឡង់បានបិទទ្វារលែងស្វាគមន៍ភ្ញៀវទេសចររាប់លាននាក់ដែលនាំគ្នាមកលេងប្រជុំកោះភ្នំភ្លើងរៀងរាល់ឆ្នាំពីដំណើរទៅកាន់ជ្រលងមួយ ដែលទទួលភ្ញៀវជោរជន់ពេកតាំងពីទេសភាពទីនេះត្រូវបានរំលេចសម្រស់ក្នុងវីដេអូរបស់តារាចម្រៀង ចាស្ទីន ប៊ីប៊ើ។
ភ្ញៀវទេសចរដ៏ច្រើនសន្ធឹក និងសំណើមរដូវរងាបានរំខានដល់ជីវចម្រុះដ៏ផុយស្រួយនៃជ្រលងទឹក Fjadrargljufur។ ដូច្នេះទីភ្នាក់ងារបរិស្ថានអៀរឡង់ បានបិទតំបន់នោះពីការកម្សាន្ដរបស់មហាជនរហូតដល់ថ្ងៃទី ១ ខែមិថុនា។
ទីប្រឹក្សាទីភ្នាក់ងារ ដានីញ៉ែល ហ្វ្រេ ចនសុន បានឲ្យដឹងថា៖ «អំឡុងពេលទឹកកកចាប់ផ្ដើមរលាយផ្លូវដើរមានភក់ជ្រាំដែលមានការលំបាកដល់អ្នកឡើងភ្នំ។ ដោយសារភក់មានកម្រាស់ក្រាស់ភ្ញៀវត្រូវដើរជាន់របង និងឆ្លងទៅកាន់ផ្លូវថ្មើរជើងដែលខូចខាតដល់ជីវិតរុក្ខជាតិយ៉ាងខ្លាំង»។
ជ្រលងជ្រោះដ៏ស្រស់ស្អាត Fjadrargljufur បិទទ្វារលែងទទួលទេសចរ។ រូបថត AFP
Fjadrargljufur គឺជាជ្រលងជ្រោះដែលមានទឹកធ្លាក់កម្ពស់ ១០០ ម៉ែត្រប្រវែង ២ គីឡូម៉ែត្រអមដោយរុក្ខជាតិបៃតង និងទឹកថ្លាឈ្វេង។ ជ្រលងជ្រោះត្រូវបានបង្កើតឡើងដោយចម្រោះទឹកដែលរលាយពីទឹកកកអាយុ ៩០០០ ឆ្នាំ។
ជ្រលងជ្រោះជាទីឋានមិនសូវពេញនិយមសម្រាប់ភ្ញៀវទេសចរបរទេសទាល់តែដល់ចុងឆ្នាំ ២០១៥ ពេលតារាចម្រៀងកាណាដា ចាស្ទីន ប៊ីប៊ើ មកថតចម្រៀងនៅទីនេះក្រោមចំណងជើងថា «I''ll Show You»។
លោកបានបន្ដថា៖ «ភ្ញៀវទេសចរមកកាន់តំបន់នេះបានកើនឡើងពី ៥០ ទៅ ៨០ ភាគរយក្នុង ១ ឆ្នាំតាំងពីឆ្នាំ ២០១៦ ដោយប៉ាន់ប្រមាណថាមានភ្ញៀវ ៣០ ម៉ឺននាក់បានមកលេងជ្រលងជ្រោះក្នុងឆ្នាំ ២០១៨»។
កាលពីឆ្នាំមុន អៀរឡង់ ទទួលភ្ញៀវទេសចរ ២,៣ លាននាក់។ ចំនួនតំបន់ទេសចរណ៍ជាច្រើនក្នុងប្រទេសអៀរឡង់ត្រូវបានបិទដើម្បីទុកពេលអភិរក្ស រួមមានជ្រលង Reykjadalur ទឹកក្ដៅធម្មជាតិ និងផ្លូវឡើងភ្នំទៅកាន់ទឹកធ្លាក់ Skogafoss ក៏ទើបបានបិទដែរ៕ HR
