រូបតំណាង : គំនរខ្ទឹមបារាំងអាចភាយក្លិនធ្វើឲ្យអ្នកនៅក្បែរហូរទឹកភ្នែក។ រូបថត AFP
.jpg)
ក្រុងប៉េកាំង៖ ស្ដ្រីខូចចិត្ដជនជាតិចិនម្នាក់បានបញ្ជូនកាដូសងសឹកដ៏ចម្លែកមួយទៅកាន់អតីតសង្សារ ដែលបានចែកផ្លូវពីនាង ដោយការចាក់ស្រោចខ្ទឹមបារាំង ១ ឡាននៅមាត់ទ្វារផ្ទះខាងប្រុស ដើម្បីឲ្យបុរសរូបនេះសម្រក់ទឹកភ្នែកព្រោះតែក្លិនខ្ទឹម។
ស្ដ្រីមកពីខេត្ដសានដុងភាគខាងកើតប្រទេស បានទិញខ្ទឹមបារាំងរាប់តោនតាមអនឡាញ និងដឹកជញ្ជូនទៅកាន់ផ្ទះអតីតសង្សារ ដោយបោះសម្ដីថា ដល់វេនគាត់យំម្ដងហើយ។
កាសែត Shandong Net ដែលមានទំនោរទៅខាងរដ្ឋបាលមូលដ្ឋានបានរាយការណ៍នៅថ្ងៃអាទិត្យថា នាងបានកុម្ម៉ង់អ្នកដឹកជញ្ជូនទៅចាក់បន្លែស្រក់ទឹកភ្នែកនេះនៅមាត់ទ្វារផ្ទះអតីតសង្សារ និងចាកចេញដោយមិនបានចុចកណ្ដឹង។
ស្ដ្រីរូបនេះបានសរសេរដាក់ក្រដាស់មួយសន្លឹកភ្ជាប់ជាមួយកាដូនោះថា៖ «ខ្ញុំយំ ៣ ថ្ងៃមកហើយ ហើយពេលនេះ ដល់វេនបងម្ដងហើយ»។
ស្ដ្រីក្នុងខេត្ដសានដុង ឈ្មោះត្រកូល ហ្សាវ បានប្រាប់ Shandong Net ថា នាងមានទំនាក់ទំនងស្នេហាជាមួយអតីតមិត្ដប្រុសជិត ១ ឆ្នាំមុនពេលបុរសរូបនោះបានសម្រេចចិត្ដចែកផ្លូវដោយឯកឯង។
នាង ហ្សាវ ពោលថា៖ «ខ្ញុំឈឺចាប់ណាស់ តែគាត់មិនខ្ចីយំសោះ»។
ភាគីខាងនារីបាននិយាយថា នាងបានសម្រេចចិត្ដបញ្ជូនកាដូ ១ ដែលធ្វើឲ្យភាគីខាងប្រុសយំវិញម្ដង។
នាងបន្ថែមថា៖ «ខ្ញុំមិនអាចជាមនុស្សតែម្ខាងដែលត្រូវយំឡើយ»។
អតីតមិត្ដប្រុសដែលសុំមិនបញ្ចេញឈ្មោះបាននិយាយថា ប្រតិកម្មរបស់កញ្ញា ហ្សាវ ពិតជាលើសហើយ។ ការចែកផ្លូវគ្នាដ៏ក្រហល់ក្រហាយភ្នែកនេះបានបង្កជាក្លិនក្រពុលឆួលដល់អ្នកជិតខាង៕ AFP/HR
