ភ្នំពេញៈ តារាសម្ដែងសម្បុរស្រអែមដែលទើបបន្ថែមជំនាញបង្ហើរសំនៀងបកស្រាយបទអូរីជីណល កញ្ញា ឌី សូនីតា កំពុងតែកាក់កបខ្លាំងនៅក្នុងវិស័យសិល្បៈដោយមហាជនតែងតែឃើញតារាស្រីរូបនេះបង្ហាញពីមុខរបរថ្មីៗជានិច្ចដូចជាការលក់ផលិតផលតាមបណ្តាញសង្គម និងនាំចូលផលិតផលមកពីប្រទេសបារាំងមានកាបូប ស្បែកជើង ជាដើម។
ទន្ទឹមនឹងទីផ្សារសិល្បៈក៏កំពុងតែកាក់កបតារាសម្ដែងដែលចាប់ដៃគូស័ក្ដិសមឥតខ្ចោះ និងកំលោះសង្ហា អេឡិច ហ្សូរ៉ា កញ្ញា ឌី សូនីតា ថ្មីៗនេះក៏បានផ្សព្វផ្សាយបង្ហាញនៅក្នុងបណ្តាញសង្គមផងដែរថា រូបនាងនឹងទទួលរៀបចំកម្មវិធីផ្សេងៗ។
តារាស្រីមានពហុជំនាញទាំងវ័យក្មេងដែលមហាជនបានដឹងថាមានជំនួញខាងអចលនទ្រព្យដែរនោះបានផ្តល់បទសម្ភាសទាក់ទងជាមួយមុខរបរថ្មីទទួលរៀបចំកម្មវិធីមក ភ្នំពេញ ប៉ុស្តិ៍ ថា៖ «តាមពិតទៅការងារនេះ (ទទួលរៀបចំក្នុងកម្មវិធី) តាំងតែពីឆ្នាំ ២០១៨ តែខ្ញុំអត់ដែលចេញមុខទេ ដោយបោះទៅឲ្យមិត្តភក្តិខ្ញុំបន្តទៀតនៅពេលមានភ្ញៀវទាក់ទងមក។ លុះត្រាកម្មវិធីធំៗបានទទួលចេញមុខ។ ទើបតែពេលនេះខ្ញុំចង់ចាប់ផ្តើមធ្វើដោយខ្លួនឯងផ្ទាល់ទាំងអស់ ដោយសារឥឡូវខ្ញុំមានក្រុមការងារគ្រប់គ្រាន់ហើយ»។
កញ្ញា ឌី សូនីតា តារាសម្ដែងរាងតូចច្រឡឹង និងឆ្វាក់ទីផ្សារថតភាពយន្តឲ្យផលិតករបរទេសនោះ រូបនាងក៏បានបន្ថែមពីការទទួលរៀបចំកម្មវិធីផ្សេងៗទៀតថា៖ «ខ្ញុំមានទទួលគ្រប់សេវាកម្មមានទាំងការតុបតែងដេគ័រមុខរោង ក្រុមតន្ត្រី និងមានទទួលម្ហូបអាហារផងដែរ និយាយរួមទៅមួយកំប្លេតាមដែលភ្ញៀវគាត់ចង់បាន»។
យ៉ាងណាមិញតារាសម្ដែងដែលទើបតែបង្ហើរទឹកដមសំឡេងតាមបទអូរីជីណល កញ្ញា ឌី សូនីតា ក៏បានបញ្ជាក់ដែរថាមុខរបរផ្ដល់សេវាកម្មរៀបចំកម្មវិធីនេះគឺដើម្បីបន្ថែមខ្ទង់ចំណូលពីលើវិស័យសិល្បៈ។
ដូច្នេះហើយទើបស្រីស្រស់សម្បុរស្រអែមបញ្ជាក់ទៅកាន់អ្នកដែលចង់បានរូបកញ្ញាឡើងបង្ហើរសំនៀងនៅលើឆាកយ៉ាងដូច្នេះថា៖ «សម្រាប់ការរៀបចំកម្មវិធីចំពោះក្រុមតន្ត្រីគឺមិនមានខ្ញុំច្រៀងទេ បើសិនជាម្ចាស់កម្មវិធីចង់បានខ្ញុំច្រៀងត្រូវគិតតម្លៃផ្សេងទៀត»។
ចំពោះមុខរបរថ្មីការទទួលរៀបចំកម្មវិធីដែលទើបបង្ហាញជាសាធារណៈ តារាភាពយន្ត កញ្ញា ឌី សូនីដា ក៏បានបង្ហើបថាមានការចូលរួមជាមួយដៃគូគឺលោក អេឡិច ហ្សូរ៉ា ដែលតែងតែលេចឮថា មានស្នេហាក្រៅឆាកផងដែរ។
តារាស្រីក្រមិចក្រមើមរូបនេះបានបញ្ជាក់ថា៖ «ពេលដែលត្រូវរៀបចំកម្មវិធីនៅតាមខេត្តគឺយើងតម្រូវឲ្យបង ហ្សូរ៉ា ជាអ្នកទៅរៀបចំ ចំណែកនៅរាជធានីភ្នំពេញខ្ញុំ (សូនីតា) ជាអ្នកចេញមុខ ប៉ុន្តែបើសិនជាកម្មវិធីធំក៏ត្រូវឲ្យគាត់ (អេឡិច ហ្សូរ៉ា) មកជួយដែរ»។
ចំណែកឯការងារសិល្បៈវិញកញ្ញា ឌី សូនីតា បានបង្ហើបថារូបនាងពិតជាមានការរវល់ស្ទើរដកឃ្លាមិនរួច រួមមានទាំងការថតផ្សព្វផ្សាយផលិតផលចូលរួមក្នុងកម្មវិធីដូចជាការច្រៀងក្នុងពិធីការ និងការចេញបទចម្រៀងថ្មីៗជាច្រើនបទរួមទាំងការងារផ្ទាល់ខ្លួនជាច្រើនមុខទៀត។
កញ្ញា ឌី សូនីតា ក៏បានបរិយាយអំពីគម្រោងក្នុងវិស័យសិល្បៈយ៉ាងដូច្នេះថា៖ « ក្នុងពេលខាងមុខនេះ ខ្ញុំកំពុងត្រៀមថតបទចម្រៀងថ្មី ដែលនិយាយពីជីវិតតស៊ូរបស់ខ្ញុំផ្ទាល់ដើម្បីចែករំលែកឲ្យដល់ប្រជាពលរដ្ឋយើងបានដឹង»។
ម្ចាស់បទ «កំហុស» កញ្ញា ឌី សូនីតា ដែលជាកូនកំព្រាធ្លាប់ទៅធ្វើការនៅរោងចក្រជាមួយម្តាយបានប្រាប់ពីការធ្វើបទចម្រៀងលាតត្រដាងខ្សែជីវិតរបស់នាងផងដែរថា៖ «ព្រោះថាជីវិតខ្ញុំជួបការលំបាកច្រើនណាស់ ដែលបទចម្រៀងហ្នឹងមានរយៈពេល ១០ ទៅ ១៥ នាទី»។
ស្រីស្រស់ដែលតែងតែរំឭកគុណរៀមច្បង សុគន្ធ នីសា និង ឯក ស៊ីដេ ដែលជួយឲ្យនាងមានគេស្គាល់លើវិថីសិល្បៈរូបនេះ នាងក៏បានបង្ហើបដែរថា៖ «បានត្រៀមចេញបទញាក់ផងដែរ។ ចំពោះកុនវិញសម្រាប់ឆ្នាំនេះខ្ញុំសុំទទួលតែរឿងដុំទេ ដោយសារតែអត់មានពេលវេលាគ្រប់គ្រាន់សម្រាប់ទៅថតឲ្យពួកគាត់ អ៊ីចឹងឆ្នាំក្រោយអីបានគិតរឿងភាគវិញ»៕