តារាចម្រៀងស្រីវ័យ២៨ ឆ្នាំ កញ្ញា វណ្ណា វត្តី និងរថយន្តថ្មីខ្លួនម៉ាក Hummer។ រូបថត ហ្វេសប៊ុក
.jpg)
ភ្នំពេញ៖ តារាសម្ដែងស្រីកូនកាត់ខ្មែរ-ឥណ្ឌា កញ្ញា វណ្ណា វត្តី ដែលឆ្នាំនេះមានវ័យ ២៨ ឆ្នាំទៅហើយនោះ បានអះអាងថា នៅពេលនេះគ្មានគម្រោងចូលរោងការឆាប់ៗទេ ព្រោះនៅមិនទាន់ជ្រើសរើសគូអនាគតស្វាមីបាននៅឡើយ។ តែយ៉ាងណា កញ្ញាបង្ហើបថា មិនបារម្ភ ខ្លាចជ្រុលវ័យអត់ប្ដីទៅជាក្រមុំចាស់សៅកែនោះទេ ព្រោះថា បើគូព្រេងមកដល់ហើយទោះជាប្រឹងប្រកែកយ៉ាងណាក៏មិនរួចដែរ។
តែពេលសាកសួរថាតើ វត្តី ចង់បានប្ដីជាតិឥណ្ឌា ឬប្ដីខ្មែរនោះ នាង វត្តី ឆ្លើយថា No ចំពោះប្ដីឥណ្ឌានោះតែម្ដង។ ដោយអះអាងថា នាងចង់បានម្ចាស់បេះដូងជាបុរសខ្មែរ ដែលមានវ័យកណ្ដាល ហើយបើទោះជានាងចូលចិត្តស្លៀកពាក់ជាយុវវ័យមែន តែនាងមិនដែលស្រឡាញ់ ឬចង់បានប្រុសក្មេងស្ទាវៗមកធ្វើជាប្ដីម្ដងណានោះឡើយ។
កញ្ញា វណ្ណា វត្តី បានញ្ជាក់ថា៖ «រៀបការជាមួយអ្នកណាទៅ បើអត់មានសង្សារផងហ្នឹង!។ មានអ្នកធ្លាប់តាមស្រឡាញ់អីហ្នឹង មិនអត់ទេ តែកន្លងមកចេះតែមិនត្រូវគ្នាហើយខ្ញុំជាមនុស្សចូលចិត្តសេរីភាពអ៊ីចឹង បើចូលមកមិនត្រូវចិត្តខ្ញុំ មិនខ្លាចបែកនោះទេ។ ចាំមើលបន្ដិចទៀតមើលក្រែងរកអ្នកត្រូវចិត្តបាន តែបើនៅតែមិនត្រូវទៀត ខ្ញុំមិនខ្វល់អត់ប្ដីនោះទេ រស់នៅម្នាក់ឯងរហូតក៏បាន»។
តារាស្រីកញ្ញា វណ្ណា វត្តី ដែលកាត់ឥណ្ឌាទៅខាងជីតារបស់នាង តែនាងមិនដែលបានទៅលេងនៅប្រទេស ឥណ្ឌា ម្ដងណាទេ ហើយនាងក៏មិនចង់បានប្ដីឥណ្ឌាដែរ គឺស្រឡាញ់តែប្រុសខ្មែរ។ តែនាងថា ចេះក្បាច់រាំឥណ្ឌាខ្លះៗដែរ ខណៈដែលមិត្តរួមអាជីពថាកញ្ញា វត្តី មានច្រមុះស្រួចកាត់ទៅខាងឥណ្ឌា។
កញ្ញា វណ្ណា វត្តី បានវិវត្តខ្លួនពីតារាសម្ដែងមកជាអ្នកចម្រៀងម្នាក់ដែលមានទឹកដមសំឡេងគួរឲ្យទាក់ទាញហើយបានចំណាយប្រាក់ផ្ទាល់ខ្លួនផលិតជាបទចម្រៀងចេញនៅលើយូធូប និងផេកខ្លួនផងដែរ។ កញ្ញាថា ទាំងអាជីពសម្ដែងចម្រៀងគឺនាងចាប់យកទាំង ២ ព្រមគ្នាតែម្ដង ហើយពេលនេះ កំពុងហ្វឹកហាត់ធ្វើ MC ដែរព្រោះឲ្យតែការងារសិល្បៈនាងពេញចិត្តទាំងអស់ គឺតាំងពីតូចមកម្ល៉េះ ហើយភាពយន្ដដែលនាងសម្ដែងចុងក្រោយគេនោះ គឺកុនភាគរឿង «កូនពស់កេងកង» របស់ផលិតកម្មហង្សមាស។
ការជិះរថយន្ដម៉ាក Hummer យ៉ាងហំហួនក៏មានការសង្ស័យថា វណ្ណា វត្តី មានគូស្នេហ៍នៅក្រោយខ្នងឧបត្ថម្ភ តែតារាស្រីរូបនេះមិនខ្លាចអត់ប្ដី និងមានសមត្ថភាពរកប្រាក់ចិញ្ចឹមខ្លួនឯងនោះ នាងមិនត្រូវការអ្នកណាមកចិញ្ចឹមខ្លួនឡើយ៕
