ទេព បូព្រឹក្ស ព្រម​ទទួល​សំណង​ជំងឺ​ចិត្ត ១ ម៉ឺន ដុល្លារ ពី​ជន​ដៃ​ដល់​ប្រើ​ហិង្សា ក្រោយ​ពី​ព្រម​សុំ​​ទោស​ជាសាធារណៈ​

Content image - Phnom Penh Post

ភ្នំពេញៈ ទីបំផុតក្រោយពីផ្ទុះរឿងយ៉ាងក្តៅគគុក ដោយសារមានបុរសម្នាក់ប្រើហិង្សាជះស្រាបៀរទៅលើតារាចម្រៀងស្រីល្បី នៅហង្សមាសកញ្ញា ទេព បូព្រឹក្ស កាលពីយប់ថ្ងៃទី២៥ ខែធ្នូ នៅហាងបៀរហ្គាឌិនឈ្មោះ «សមុទ្រ» នោះ បានបញ្ចប់ត្រឹមសំណងជំងឺចិត្ត ១ ម៉ឺន ដុល្លារ ដោយជនដៃដល់ឈ្មោះ ឆេង រស្មី ព្រមសុំទោសជាសាធារណៈ កាលពីរសៀលថ្ងៃទី ២៧ ខែធ្នូ ឆ្នាំ២០១៨ នេះ។

បើតាមការ Live វីដេអូតាមគេហទំព័ររបស់នាងផ្ទាល់ អស់រយៈពេលរាប់ម៉ោងនោះ កញ្ញា ទេព បូព្រឹក្ស ក៏បានប្រកាសទទួលយកសំណង ១ ម៉ឺនដុល្លារ ពីជនបង្កហិង្សា និង នៅតែបន្ត ឆន្ទៈ យក ប្រាក់នោះទៅធ្វើ ទង្វើល្អ​ដូច​បាន​សន្យា​កាលពី​ទាមទារ​ដំបូង​ចំនួន ១០ ម៉ឺនដុល្លារ នោះដដែល។

កញ្ញា ទេព បូព្រឹក្ស ថា៖ «ចំពោះប្រាក់ជំងឺចិត្តនេះ នាងខ្ញុំនឹងប្រើជាមូលនិធិជួយមន្ទីរពេទ្យគន្ធបុប្ផា និងយកជួយដល់ក្រុមសិល្បករចាស់ៗ ដែលជួបនូវការលំបាកជីវភាពដដែល» ក្រោយ​ពី​កិច្ច​ប្រជុំ​ដោះស្រាយ​រវាង​មេធាវីរបស់កញ្ញា ទេព បូព្រឹក្ស និងមេធាវីខាងជនដៃដល់មកនោះ។

Content image - Phnom Penh Post

គួរបញ្ជាកថា ករណីកើតហិង្សាជះស្រាបៀរដាក់តារាចម្រៀងស្រីនៅហង្សមាស កញ្ញា ទេព បូព្រឹក្ស បានកើតឡើងនៅយប់ថ្ងៃទី ២៥ ខែធ្នូ ឆ្នាំ២០១៨ នៅក្នុងភោជនីយដ្ឋានឈ្មោះ «សមុទ្រ» ដែលមានអសយដ្ឋាននៅក្បែរមន្ទីរកុមារជាតិ ស្ថិតនៅក្នុងសង្កាត់ទឹកល្អក់ទី១ ខណ្ឌទួលគោកវេលាម៉ោង ១០ យប់៕

ព័ត៌មានថ្មីៗ