ស្ថិតនៅលើកំពូលភ្នំបៃតង ប្រាសាទ Machu Picchu ជាទីសក្ការៈ និងបេតិកភណ្ឌដ៏សំខាន់របស់ប្រទេសប៉េរូ។ រូបថត AFP
.jpg)
ក្រុងលីម៉ា៖ ទេសចរម្នាក់ ត្រូវបានកាត់ទោស ហើយ ៥ នាក់ទៀតនឹងត្រូវបានបណ្ដេញចេញពីប្រទេស ក្រោយពីរងនូវការចោទបំផ្លាញបេតិកភណ្ឌវប្បធម៌ប្រទេស ប៉េរូ និងបន្ទោបង់នៅប្រាសាទពិសិដ្ឋនៅវិមាននិម្មិតរូប Machu Picchu។
មនុស្ស ៦ នាក់ ត្រូវបានប៉ូលិសចាប់ខ្លួនពីថ្ងៃអាទិត្យ ក្រោយពីត្រូវបានរកឃើញដោយឆ្មាំឧទ្យានក្នុងតំបន់ហាមឃាត់នៃប្រាសាទព្រះអាទិត្យ ជាទីឋានសក្ការៈនៃរជ្ជកាលអ៊ីនកា។
ពួកគេបានចូលបរិវេណបន្ទាយពីថ្ងៃសៅរ៍ និងលាក់ខ្លួននៅទីនោះ ១ យប់ ដែលជាទង្វើត្រូវបានហាមឃាត់។
ក្រុមអាជ្ញាធរបានឲ្យដឹងថា បុរស ៤ នាក់ និងស្ដ្រី ២ នាក់ បានធ្វើឲ្យបែកថ្មប្រាសាទអាយុកាល ៦០០ ឆ្នាំ និងបានបន្ទោបង់លើបរិវេណពិសិដ្ឋ ស្ថិតនៅភាគខាងត្បូងនៃតំបន់គុស្កូ។
ទេសចរទាំង ៦ នាក់ ដែលមានអាយុចន្លោះ ២០ ទៅ ៣២ ឆ្នាំ។ រូបថត AFP
ណាហូអែល ហ្គូម៉េស ជនជាតិអាហ្សង់ទីន ដែលនឹងត្រូវនាំខ្លួនទៅកាត់ទោសបានសារភាពថា បានប៉ងបំបែកថ្មប្រាសាទដែលធ្លាក់រមៀលលើដី និងធ្វើឲ្យបែកបំណែកតូច ក៏ធ្វើឲ្យប្រេះកម្រាលផងដែរ។
មេប៉ូលិសតំបន់ លោក Victor Andres Patino បានប្រាប់អ្នកសារព័ត៌មានកាលពីថ្ងៃអង្គារថា មនុស្សទាំង ៦ នាក់ ដែលមានអាយុពី ២០ ទៅ ៣២ ឆ្នាំ ត្រូវបានចោទពីបទបំផ្លាញបេតិកភណ្ឌវប្បធម៌។
លោក ណាហូអែល បន្ដនៅឯ Machu Picchu ជាទីដែលលោកត្រូវឡើងសវនាការនារសៀលថ្ងៃអង្គារ ខណៈមនុស្ស ៥ នាក់ទៀត ដែលម្នាក់មកពីអាហ្សង់ទីន ២ នាក់ មកពីប្រេស៊ីល ម្នាក់ជាជនជាតិឈីលី និងម្នាក់ជាស្ដ្រីបារាំង នឹងត្រូវបណ្ដេញចេញពីប្រទេសនេះ។
ថ្មប្រាសាទអាយុកាល ៦០០ ឆ្នាំ ត្រូវបានធ្វើឲ្យបែកដោយអ្នកទេសចរ។ រូបថត AFP
យុវជន ណាហូអែល អាយុ ២៨ ឆ្នាំ អាចជាប់គុកយ៉ាងតិច ៤ ឆ្នាំ បើគេរកឃើញកំហុសចំពោះការបំផ្លាញបេតិកភណ្ឌវប្បធម៌ប៉េរូ មែននោះ។
នៅក្នុងឆ្នាំ ២០០០ ថ្មនាឡិកាព្រះអាទិត្យ (Intihuatana) ត្រូវបានបំផ្លាញអំឡុងពេលថតពាណិជ្ជកម្មស្រាបៀរ។ ក្នុងឆ្នាំ ២០១៧ ជនជាតិអាហ្សង់ទីន ៣ នាក់ និងកូឡុំប៊ីម្នាក់ ត្រូវបានចាប់ខ្លួនពីបទគូររូបលើជញ្ជាំងបុរាណ។ ក្នុងឆ្នាំ ២០០៤ ជនជាតិស៊ីលី ២ នាក់ បានដេកគុក ៦ ខែ ពីបទគូររូបលើជញ្ជាំងប្រាសាទអ៊ីនកា។ ពួកគេត្រូវបានដោះលែងក្រោយពីព្រមផ្ដល់សំណង ១០ ម៉ឺនដុល្លារ ចំពោះការខូចខាត។
Machu Picchu ដែលមានន័យថា «ភ្នំចាស់» ស្ថិតនៅលើកំពូលភ្នំបៃតងស្រស់ និងត្រូវបានកសាងឡើងអំឡុងអធិរាជសម័យអ៊ីនកា គឺព្រះមហាក្សត្រផាឆាឃ្យូទី (១៤៣៨-១៤៧១)៕ AFP/HR
