នាយ ចឺម និងគូស្នេហ៍ថ្មី អូនហ្វារ ដែលល្បីថា ជិតចូលរោងការ។ រូប ហ្វេសប៊ុក
.jpg)
ភ្នំពេញៈ នាពេលថ្មីៗនេះស្រាប់តែលេចចេញដំណឹងបែបចចាមអារ៉ាមលើកឡើងថា នាយ ចឺម កំពុងត្រៀមរកពេលា ដើម្បីកំណត់ចូលរោងជ័យជាមួយគូស្នេហ៍ថ្មីគឺកញ្ញា គៀត ប៊ែលឡា ហៅ អូនហ្វារ បន្ទាប់ពីបានបង្កាត់ភ្លើងស្នេហ៍ជាង ១ ឆ្នាំមកនោះ។
ប្រភពដំណឹងដដែលនោះបានឲ្យដឹងបន្តថានឹងដឹកដៃកំពូលស្នេហ៍ជាស្រីស្អាតដែលមានរូបសម្រស់ផូរផង់ជាតារាម៉ូដែល និងតារាសម្តែងស្រីឈ្មោះក្រៅហៅ អូនហ្វារ ចូលរោងការឆាប់ៗ។ ម្យ៉ាងទៀតដោយសារតែ នាយ ចឺម ជិតចេញទៅសម្តែងនៅប្រទេសអាមេរិករយៈពេលខ្លីនាអំឡុងខែកញ្ញាខាងមុខ និងចង់បន្ថែមភាពផ្អែមល្ហែមមួយកម្រិតទៀតជាមួយគូស្នេហ៍ក្រោយនេះ បើទោះបីជាធ្លាប់លេចឮថាអ្នកទាំង ២ គឺបានយល់ចិត្តថ្លើមចូលធ្លុងមួយ រស់នៅក្រោមដំបូលតែមួយទៅហើយក្តី។
តែហាក់ខុសផ្ទុយស្រឡះតែម្តង ខណៈនាយ ចឺម បានបកស្រាយប្រាប់ភ្នំពេញប៉ុស្តិ៍ពីរឿងដំណឹងគេល្បីជិតចូលរោងជ័យជាមួយគូស្នេហ៍ថ្មី អូនហ្វារ នោះដែរថា៖ «តើមានចេញព័ត៌មានបែបនោះ មកពីខាងណាទៅ!គឺមិនពិតដូចជាគេថា នោះឡើយព្រោះថាពួកយើងគឺសុទ្ធតែនៅក្មេងៗ ហើយខ្ញុំទៀតសោតក៏ពុំទាន់បានគិតគូររឿងនោះនៅឡើយ ដោយសារតែចង់ប្រើពេលរកលុយសិនទាន់ពេលដែលខ្លួននៅមានឱកាស ហើយខ្លួនក៏នៅល្បីក្នុងវិស័យសិល្បៈនេះ។ ម្យ៉ាងវិញទៀតទៅថ្ងៃខាងមុខចំពោះរឿងស្នេហានេះ ក៏ខ្ញុំមិនទាន់ដឹងច្បាស់ដែរថា វានឹងមានអ្វីកើតឡើងថ្ងៃខាងមុខ»។
ចំពោះការបង្ហាញមុខសង្សារថ្មីរបស់ នាយចឺម នាពេលនេះក្រោយពីពេលដែលនាយបានរបូតសង្សារជាស្រីស្អាតអស់ ២ នាក់រួចទៅហើយគឺស្រីស្អាតតារាសម្តែងកញ្ញា ពុធ ស្រីខួច និងតារាសម្តែងកញ្ញា អៀ ម៉េងលិ ហៅអូនម៉ីម៉ី ដែលពេលនេះអ្នកទាំង ២ គឺសុទ្ធតែរកបានសង្សារថ្មីចោល នាយ ចឺម អស់ទៅហើយដែរ ខណៈកញ្ញា គៀត ប៊ែលឡា ហៅអូនហ្វារ គឺជាគូស្នេហ៍ទី ៣ របស់ នាយ ចឺម ដែលមានរូបសម្ផស្សមិនចាញ់ទៅនឹងអតីតគូស្នេហ៍ទី ១ និងទី ២ របស់នាយឡើយ។
តារាចម្រៀងរលកក្រោយដែលផុសភាពល្បីចេញពីខាងវិស័យកំប្លែង នាយ ចឺម បានហក់ឡើងខ្លាំង និងបានកសាងភាពល្បីនៅលើអាជីពថ្មី ជាតារាចម្រៀងប្រចាំផលិតកម្មសាន់ដេក្រោយបានលាឈប់ពីក្រុមកំប្លែងនៅប៉ុស្តិ៍ទូរទស្សន៍ស៊ីធីអិន បច្ចុប្បន្នមានវ័យ ២៥ ឆ្នាំមានស្រុកកំណើតនៅឯខេត្តកំពង់ស្ពឺគឺជាក្មួយប្រុសបង្កើតតារាកំប្លែងដ៏ល្បីនាយ ក្រូច នោះប្រាប់ភ្នំពេញប៉ុស្តិ៍បន្តថា៖ «ពេលនេះ ខ្ញុំមានតែការផ្តោតសំខាន់ទៅលើការងារសិល្បៈដើម្បីរកប្រាក់ឲ្យច្រើនសិន ជាពិសេសចង់បំពេញកាតព្វកិច្ចជាកូនល្អមួយរូបចំពោះឪពុកម្តាយខ្ញុំសិន ហើយបញ្ហាទំនាក់ទំនងស្នេហាក៏នៅតែមានធម្មតាជាមួយនឹង អូនហ្វារ»។
គួរបញ្ជាក់ថា នាយ ចឺម ដែលមានឈ្មោះពិតថា សុខ មេសា ជាតារាចម្រៀងរបស់សាន់ដេ ដែលកំពុងតែល្បី និងស្រូបប្រជាប្រិយភាពពីយុវវ័យខ្លាំង ក្រោយពីអតីតតារាចម្រៀងលំដាប់កំពូលលោក ខេមរៈ សេរីមន្ត បានចេញទៅជ្រកផលិតកម្មថ្មីហង្សមាស មក៕
