ក្រុងប៉ារីស៖ នៅជុំវិញពិភពលោក ប្រទេសខ្លះដាក់បម្រាមគ្រឿងស្រវឹង ហើយខ្លះទៀតទទួលស្គាល់ពីភាពចាំបាច់នៃស្រា និងស្រាបៀរ ដោយសូម្បីតែមន្ត្រីថ្នាក់កំពូលម្នាក់បានស្នើថា ការផឹកគ្រឿងស្រវឹងច្រើនបន្តិចអាចស្ដារអារម្មណ៍ធុញថប់ព្រោះតែសម្ងំនៅផ្ទះយូរ។
ពេលការរីករាលដាលជាសកល មតិខុសៗគ្នាពីការផឹកគ្រឿងស្រវឹងខុសគ្នាពីប្រទេស ១ ទៅប្រទេស ១ ដោយផ្តោតលើកត្តាសុខភាព សេដ្ឋកិច្ច និងសុវត្ថិភាពអ្នកបម្រើការ។
តើត្រឹមតែស្រា ១ កែវ ដើម្បីកាត់ស្ត្រេសព្រោះតែឃុំខ្លួនឯងក្នុងផ្ទះជាច្រើនថ្ងៃនោះ ជារឿងគួរ ឬមិនគួរ?
ខណៈនៅអាហ្វ្រិកខាងត្បូង ប៉ូលិសបានបង្ខំបិទហាងលក់គ្រឿងស្រវឹង។
ផ្ទុយទៅវិញ នៅអាមេរិកខាងជើង និងអឺរ៉ុប ហាងលក់គ្រឿងស្រវឹងនៅតែបន្តបើក និងមមាញឹកទទួលអតិថិជន ដូចទៅនឹងផ្សារទំនើប និងឱសថស្ថាន ដែលចាត់ទុកជាទំនិញចាំបាច់ដែរ។
ថ្នាក់ដឹកនាំខេត្តកេប៊ិច កាណាដា Francois Legault និយាយថា៖ «ដើម្បីកាត់បន្ថយស្ត្រេស អ្នកអាចហាត់ប្រាណ ឬដើរចុះឡើង តែជួនកាល ក្រេបស្រា ១ កែវ ក៏វាជួយបន្ធូរអារម្មណ៍ខ្លះដែរ»។
សំណើឲ្យនៅផ្ទះចៀសវាងការដើរហើរធ្វើឲ្យពលរដ្ឋកាណាដាយល់ថា ថ្ងៃណាក៏ដូចថ្ងៃចុងសប្ដាហ៍ដែរ។
លទ្ធផលតម្រូវការស្រា និងស្រាបៀរកើនឡើង ជាពិសេសការជាវអនឡាញ ដែលស្មើនឹងការសម្រុកទិញនារដូវកាលបុណ្យគ្រិស្តស្មាស់ដែរ។
នៅទូទាំងប្រទេស បើហាងលក់គ្រឿងស្រវឹងបិទទ្វារ រដ្ឋាភិបាលបាត់បង់ចំណូលប្រមាណជា ២៨៨ ដុល្លារអាមេរិក សម្រាប់ពលរដ្ឋម្នាក់។
នៅរដ្ឋញូវយ៉ក ដែលមានករណីឆ្លងវីរុសកូរ៉ណាដ៏ច្រើននោះ តម្រូវការស្រាបានកើនឡើងគួរឲ្យកត់សម្គាល់។
ដោយធីបចោលហេតុផលផឹកជ្រុលនាំឲ្យមានអំពើហិង្សានោះ អ្នកជំនាញផ្នែកសុខភាពសម្គាល់ថា អ្នកញៀនស្រាអាចប្រឈមផលប៉ះពាល់ខ្លាំង បើមានការកាត់ផ្ដាច់គ្រឿងស្រវឹងភ្លាមៗ រួមមានបញ្ហាគេងមិនលក់ ធីងធោង កន្ត្រាក់ និងឈឺសាច់ដុំជាដើម។
អ្នកជំនាញ Anne-Elizabeth Lapointe នាយិកាមជ្ឈមណ្ឌលការពារសារធាតុញៀននៅម៉ុងរេអាល់ ថា៖ «បើមនុស្សត្រូវនៅផ្ទះជាប់ទៀតនោះ វារឹតតែបង្កបញ្ហាធ្ងន់ធ្ងរ ប្រសិនបើបង្អត់ពួកគេពីទម្លាប់ផឹកស្រា»។
ប្រធានាធិបតីបេឡារុស Alexander Lukashenko ក៏ណែនាំឲ្យពលរដ្ឋក្រេបស្រាវ៉ុដកា ១ កែវ ក្រោយចេញពីសោណាទៀតផង។
នៅហុងកុង លោកស្រី Carrie Lam បានហាមភោជនីយដ្ឋាន និងបារ៍ពីការលក់គ្រឿងស្រវឹង ក្រែងធ្វើឲ្យបាត់បង់ការរក្សាគម្លាតសុវត្ថិភាព៕ AFP