បុរសអូស្ត្រាលីដេកពេទ្យ ដោយសារជាប់មេដែកឆក់ក្នុងរន្ធច្រមុះ។ រូបថត AFP
.jpg)
ក្រុងស៊ីដនី៖ អ្នកស្រាវជ្រាវតារាសាស្រ្តម្នាក់ ដែលមានអារម្មណ៍ធុញទ្រាន់នឹងនៅតែក្នុងផ្ទះ បានសាកល្បងច្នៃគ្រឿងពាក់ការពារកុំឲ្យរមាស់ដៃប៉ះមុខមាត់នាំឆ្លងមេរោគ។ តែចៃដន្យអាក្រក់ កំហុសបច្ចេកទេសបានធ្វើឲ្យលោកជាប់មេដែកឆក់ក្នុងរន្ធច្រមុះ។
លោក ដានីញែល រៀរដិន ជានិស្សិតកំពុងសិក្សាស្រាវជ្រាវនៅសាកលវិទ្យាល័យ Swinburne ឯទីក្រុងមែលប៊ន បានព្យាយាមច្នៃធ្វើខ្សែកបំពាក់មេដែកឆក់ ដែលនឹងបញ្ចេញសញ្ញាក្រើនរំឭកអ្នកពាក់ ប្រសិនបើពួកគេយកដៃដាក់ជិតផ្ទៃមុខ។
អ្នកជំនាញតារាសាស្ត្ររូបនេះ បានប្រាប់ ABC ថា ក្រោយពីសាកល្បងលើកដំបូងបរាជ័យ លោកអង្គុយលើសាឡុង ហើយជក់ដៃកាត់មេដែកជាបំណែកៗរហូតដល់ភ្លេចខ្លួន។
លោកបានរៀបរាប់ថា៖ «ដំបូងខ្ញុំកាត់តម្រូវសម្រាប់ពាក់ត្រចៀក រួចបំណែកផ្សេងទៀតតម្រូវរន្ធច្រមុះ»។
លោកបន្តទៀតថា៖ «នៅទីបំផុត ខ្ញុំមានមេដែក ១ គូនៅក្នុងរន្ធច្រមុះទាំង ២ របស់ខ្ញុំ ហើយវាឆក់ជាប់គ្នា កៀបសាច់រន្ធច្រមុះខ្ញុំទាំង ២»។
លោក រៀរដិន បានចំណាយពេលជាង ១ ម៉ោង ដើម្បីយកមេដែកចេញ មុនពេលដែលសង្សាររបស់លោក ជាអ្នកជំនាញផ្នែកវិទ្យុសាស្ត្រ នៅមន្ទីរពេទ្យក្រុងមែលប៊ន បានជំរុញឲ្យលោកប្រញាប់ទៅពេទ្យ។
ថ្លែងទាំងគួរឲ្យអស់សំណើច លោកបានអះអាងថា ច្រមុះលោកមិនមានរបួសធ្ងន់ធ្ងរនោះទេ តែលោកលែងហ៊ានលេងមេដែកឆក់ទៀតហើយ។
យ៉ាងណាក្ដី លោកមិនបោះបង់ចោលគំនិតបង្កើតឧបករណ៍ការពារមេរោគឆ្លងនោះទេ។
ស្របនឹងការណែនាំរបស់គ្រូពេទ្យជាច្រើនដែលថា ជំងឺកូវីដ ១៩ ឆ្លងដោយសារការប្រើដៃមិនស្អាតប៉ះពាល់មុខ លោក រៀរដិន បញ្ជាក់ថា៖ «គំនិតខ្ញុំពីមុននៅតែល្អ គ្រាន់តែខ្ញុំត្រូវរកវិធីត្រឹមត្រូវជាងនេះ»៕ AFP
