ភ្នំពេញ៖ ទោះបីជាមិនទទួលបានជោគជ័យ នាពេលប្រកួតប្រជែងកម្មវិធីចម្រៀងលំដាប់ពិភពលោកដូចជា The Voice Cambodia និង Cambodian Idol ដើម្បីបំពេញក្តីសុបិននៅលើវិថីសិល្បៈចម្រៀងមែនក្តី តែពេលនេះ ស្រីស្រស់ ថុល ស្រីល័ក្ខណ៍ កំពុងតែទាញបានប្រជាប្រិយភាពខ្លាំងពីមហាជន ក្រោយពីបានក្លាយជាតារាចម្រៀងប្រចាំផលិតកម្មថ្មីសន្លាង Davitra Media ជាពិសេស តាមរយៈបទមានចំណងជើងថា «ផ្ញើលុយចងដៃ ៨២ ០០០៛»។
តារាចម្រៀងស្រី ទើបមានវ័យ ២១ ឆ្នាំ ដែលអតីតជាបេក្ខនារីធ្លាប់ចូលរួមប្រឡងប្រជែងកម្មវិធី The Voice Cambodia រដូវកាលទី២ នៅក្នុងឆ្នាំ ២០១៦ កញ្ញា ថុល ស្រីល័ក្ខណ៍ បានបង្ហើបពីការចាប់ផ្តើមអាជីពជាតារាចម្រៀងស្រីប្រចាំផលិតកម្មថ្មី Davitra Media កើតនៅឆ្នាំ ២០២០ នេះថា៖ «នាងខ្ញុំបានចូលរួមជាមួយផលិតកម្ម Davitra Media ថ្មីៗនេះទេ។ មកទល់នឹងពេលនេះ គឺបានប្រហែលជាជាង ៣ ខែ ដោយនាងខ្ញុំមានចម្រៀងចំនួនជាង ១០ បទ ហើយសុទ្ធជាបទប្រភេទ Original Song។ ចំពោះបទជាចំណង់ចំណូលចិត្តនាងខ្ញុំ គឺបែបសង់ទីម៉ង់ ដោយសារនាងខ្ញុំចូលចិត្តដាក់មនោសញ្ចេតនាទៅតាមទឹកដៃនិពន្ធរបស់បងៗ អ្នកតែងនិពន្ធបទចម្រៀង។ តែនេះមិនមែនមានន័យថា នាងខ្ញុំមិនចូលចិត្តច្រៀងបទញាក់កន្រ្តាក់អារម្មណ៍នោះទេបង ខ្ញុំក៏បានច្រៀងបទញាក់មួយចំនួនផងដែរ»។
ស្រីស្រស់ ថុល ស្រីល័ក្ខណ៍ ដែលធ្លាប់ចូលរួមប្រកួតកម្មវិធី Cambodian Idol រដូវកាលទី២ ផងដែរនោះ បានបន្តឱ្យដឹងថា៖ «នាងខ្ញុំបានចូលប្រឡូកក្នុងវិស័យសិល្បៈជាច្រើនឆ្នាំមកហើយ ដោយខ្ញុំភាគច្រើនច្រៀងតាមកម្មវិធីអាហ្វែរផ្សេងៗ និងថតឱ្យផលិតកម្មនានាតាម YouTube។ ជាមួយគ្នានេះដែរ នាងខ្ញុំក៏ធ្លាប់ចូលរួមប្រឡងចម្រៀងកម្មវិធីល្បីៗ ដូចជា The Voice Cambodia 2 កម្មវិធី Cambodian Idol 2 និងកម្មវិធីថ្នាក់ជាតិមួយនៅប៉ុស្តិ៍ MYTV ទទួលបានជយលាភីលេខ ២ ទៀតផង»។
អ្វីដែលគួរឱ្យកត់សម្គាល់នោះ ជាមួយបទចម្រៀងដែលមានចំណងថា «ផ្ញើលុយចងដៃ ៨២ ០០០៛» របស់កញ្ញា ថុល ស្រីល័ក្ខណ៍ ដែលបានចេញ MV នៅក្នុងផលិតកម្ម Davitra Media ក៏កំពុងតែមានភាពលេចធ្លោ និងទទួលបានការគាំទ្រខ្លាំងតាមបណ្តាញសង្គមនានាដូចជា Facebook,YouTube និង TikTok ជាដើម។
ស្រីស្អាត ថុល ស្រីល័ក្ខណ៍ ក៏បានបង្ហាញពីចំណាប់អារម្មណ៍ខ្លួនថា៖ «នាងខ្ញុំបានតាមដានដែរថាបទ «ផ្ញើលុយចងដៃ ៨២ ០០០៛» របស់នាងខ្ញុំគ្រាន់តែចេញជាង ១ សប្តាហ៍ គឺមានបងប្អូនគាំទ្រទស្សនាច្រើន និងមានបងប្អូនយើងមួយចំនួនបានយកបទនាងខ្ញុំទៅបង្ហោះ និងថតដើរតួលើបណ្តាញសង្គម ជាពិសេស Facebook និងតាមអាខោន TikTok ពួកគាត់»៕