តារាសម្តែង និងចម្រៀងស្រី អតីតបេក្ខនារីប្រឡងកម្មវិធី The Voice Cambodia 1 កញ្ញា ប៉ាច គីមមួយ។ រូបថត ភ្នំពេញប៉ុស្តិ៍
.jpg)
ភ្នំពេញៈ នាប៉ុន្មានឆ្នាំចុងក្រោយនេះគេសង្កេតឃើញថា មិនត្រឹមតែមានរូបសម្ផស្សកាន់តែស្រស់ផូរផង់ សាច់ឡើងសខ្ចី រាងស្រឡូនស្អាតជាងមុននោះប៉ុណ្ណោះទេ តារាស្រីស្រស់អតីតជាបេក្ខនារីប្រកួតកម្មវិធី The Voice Cambodia រដូវកាលទី ១ ទៅដល់វគ្គផ្តាច់ព្រ័ត្រកញ្ញា ប៉ាច គីមមួយ កំពុងតែមានរាសីឡើងស្រឺតៗហើយសម្បូរទីផ្សារក្នុងសិល្បៈទាំងចម្រៀង និងថតកុនតែម្តងនៅទ្រនំហង្សមាស។
កញ្ញា ប៉ាច គីមមួយ តារាចម្រៀងស្រីដែលមានគេសង្កេតឃើញចូលចិត្តលេងស្ទីលតែងខ្លួនដូចជាតារាចម្រៀងស្រីកូរ៉េនាង CL កំពុងតែទាក់ទាញប្រជាប្រិយភាពច្រើនពីមហាជនគ្រប់ស្រទាប់តាមរយៈការបង្ហើរសំនៀងបានទាំងបទពីដើម និងសម័យ។ យ៉ាងណាមិញជិតពេលចូលរដូវកាលចូលឆ្នាំថ្មី នាងក៏មានចម្រៀងថ្មីៗជាច្រើនបទ ដើម្បីវាយលុកទីផ្សារ និងបំពេអារម្មណ៍ប្រិយមិត្តផងដែរ។
តារាចម្រៀងស្រីមុខកូនកាត់ចិនដែលមានស្រុកកំណើតមកពីស្រុកថ្មគោល ខេត្តបាត់ដំបងវ័យ ២៥ ឆ្នាំរូបនេះបង្ហើបឲ្យដឹងពីទីផ្សារសិល្បៈនាពេលបច្ចុប្បន្នរបស់ខ្លួនថា៖ «មានការមមាញឹកគួរសមដែរបង!គឺនាងខ្ញុំរវល់ទាំងថតបទចម្រៀងសម្រាប់ផលិតកម្មផង និងទៅច្រៀងក្នុងកម្មវិធីប្រគំតន្ត្រីនៅតាមខេត្តនានាផង ហើយថ្មីៗនេះក៏រាងរវល់ការថតបទចម្រៀងត្រៀមចេញពេលចូលឆ្នាំថ្មីដែរ។ តែនាងខ្ញុំមិនដឹងចេញប៉ុន្មានបទទេ ព្រោះថានាងខ្ញុំក៏ទើបបានចេញបទថ្មីផងដែរ»។
ទោះជា កញ្ញា ប៉ាច គីមមួយ អតីតជាបេក្ខភាពប្រកួតកម្មវិធី The Voice Cambodia រដូវកាលទី ១ មិនបានជោគជ័យលើវិថីសិល្បៈកាលពីឆ្នាំ ២០១៦ ដោយបានរបូតពានធ្លាក់ក្នុងកណ្តាប់ដៃលោក ប៊ុត សីហា មែនក្តី តែនាពេលនេះតារាចម្រៀងស្រីជ្រកនៅផលិតកម្ម WeProduction ដែលជាបុត្រសម្ព័ន្ធហង្សមាសកំពុងតែបានបន្ថែមនូវអាជីពថ្មីមួយទៀតគឺក្លាយជាតារាសម្តែងភាពយន្តជាហូរហែបានចំនួន ២ រឿងរួចហើយគឺរឿង «បិសាចគួរឲ្យស្រឡាញ់» និងរឿង «ខ្ញុំមានញាណលើស» ព្រមទាំងក្តាប់បានឱកាសឡើងឆាកប្រគំតន្ត្រីទេសចរណ៍តាមខេត្តនានាមិនសូវជាលោះពេលឡើយលើទ្រនំហង្សមាស។
កញ្ញា ប៉ាច គីមមួយ ក៏ប្រាប់ពីអារម្មណ៍យល់ឃើញលើអាជីពទាំង ២ ដែរថា៖ «ប្រសិនបើនិយាយទូទៅ អាជីពទាំង ២ នេះគឺសុទ្ធតែមានលក្ខណៈមិនងាយស្រួលដូចគ្នាសម្រាប់រូបនាងខ្ញុំ។ តែប្រសិនប្រៀបធៀបវិញ នាងខ្ញុំគិតថា អាជីពជាតារាសម្តែងហាក់ដូចជាត្រូវការនូវភាពសម្របច្រើនព្រោះបានទាមទារឲ្យយើងប្រើអារម្មណ៍ច្រើនទៅតាមសាច់រឿងនៃខ្សែភាពយន្តជាងការច្រៀង»៕
កញ្ញា ប៉ាច គីមមួយបច្ចុប្បន្នកាន់តែមានរូបសម្ផស្សស្អាត និងសម្បូរទីផ្សារសិល្បៈ។ រូបថត ហ្វេសប៊ុក
