ក្រុមតារាចម្រៀងប្រុសស្រីវ័យក្មេងនៅផលិតកម្មថ្មីសន្លាង Davitra Media។ រូបថត សហការី
.jpg)
ភ្នំពេញ៖ បើទោះបីជាមានវ័យក្មេងខ្ចី ទើបប្រសូតនៅក្នុងយុគសម័យកំពុងតែមានវិបត្តិ ដែលបង្កដោយជំងឺកូវីដ ១៩ ឆ្នាំ ២០២០ នេះក្តី តែបើមើលទៅផលិតកម្មថ្មីសន្លាងមួយឈ្មោះ Davitra Media ហាក់មានឆន្ទៈ និងផែនការយ៉ាងច្បាស់លាស់សម្រាប់ទិសដៅអនាគតដ៏វែងឆ្ងាយនៅលើវិស័យសិល្បៈ។
អ្នកស្រី ច័ន្ទ ដាវី ចាងហ្វាងផលិតកម្ម Davitra Media បង្ហើបឱ្យដឹងពីគោលបំណងរបស់ខ្លួនថា៖ «ផលិតកម្ម Davitra Media បានបង្កើតឡើងនៅឆ្នាំ ២០២០ ក្នុងគោលដៅជំរុញ និងជួយជ្រោមជ្រែងក្នុងការផលិតចម្រៀង និងភាពយន្ត ដែលបង្កប់នូវសារអប់រំ និងជាស្នាដៃច្នៃប្រឌិតរបស់កូនខ្មែរពិតប្រាកដ ដោយមិនចម្លងពីប្រទេសដទៃ»។
ទោះបីផលិតកម្ម Davitra Media ទើបបង្កើតថ្មីនៅក្មេងខ្ចីសម្រាប់បទពិសោធសិល្បៈមែនក្តី តែខ្លួនក៏បានត្រៀមខ្លួនគ្រប់យ៉ាងដូចជា ក្រុមតារាចម្រៀង ក្រុមអ្នកនិពន្ធទំនុកច្រៀង និងទំនុកភ្លេង អាចប្រជែងផលិតកម្មធំៗដូចជាហង្សមាស ហ្គាឡាក់ស៊ី ថោន សាន់ដេ ផងដែរ។
តារាសម្តែង និងអ្នកដឹកនាំថត MV ផលិតកម្ម DavitraMedia។ សហការី
ចាងហ្វាងផលិតរូបនេះបានបន្តថា៖ «ពិតណាស់ វិស័យសិល្បៈនៅក្នុងប្រទេសកម្ពុជា មានការរីកចម្រើនខ្លាំង។ ជាក់ស្តែងយើងឃើញថា មានផលិតកម្មចម្រៀង និងភាពយន្តជាច្រើន បានលេចរូបរាងក៏ច្រើនបន្តបន្ទាប់ ដែលស្តែងឱ្យឃើញពីការប្រកួតប្រជែងខ្ពស់ក្នុងវិស័យនេះជំរុញឱ្យផលិតកម្មនីមួយៗត្រូវពង្រឹងសមត្ថភាព។ ក្នុងន័យនេះ ផលិតកម្ម Davitra Media បានត្រៀមខ្លួនរួចជាស្រេចក្នុងការឈានជើងចូលក្នុងការប្រកួតប្រជែងនេះ។ Davitra Media មានក្រុមផលិត និងបច្ចេកទេស ដែលមានជំនាញពិតប្រាកដ និងទេពកោសល្យខ្ពស់។ មួយវិញទៀត អ្នកនិពន្ធចម្រៀង ក៏ដូចជាអ្នកនិពន្ធរឿងយើងសុទ្ធតែមានបទពិសោធ និងចំណេះជំនាញច្បាស់លាស់ក្នុងការផលិតបទចម្រៀង និងភាពយន្ត ជាស្នាដៃរបស់កូនខ្មែរផ្ទាល់។ ផលិតកម្មក៏សម្រិតសម្រាំងនូវតារាចម្រៀង និងតារាសម្តែងដែលមានទេពកោសល្យខ្ពស់ ហើយក៏បាននិងកំពុងខិតខំពង្រឹងសមត្ថភាពពួកគាត់បន្ថែម ដោយការបង្ហាត់បង្រៀនបន្ថែមពីអ្នកជំនាញក៏ដូចជាសាស្ត្រាចារ្យផ្នែកសិល្បៈផងដែរ។ លើសពីនេះ គណៈគ្រប់គ្រង Davitra Media ផ្ទាល់គឺជាអ្នកមានបទពិសោធខ្ពស់ច្រើនឆ្នាំ ក្នុងការគ្រប់គ្រងក្នុងវិស័យផ្សព្វផ្សាយ និងវិស័យផលិតភាពយន្ត និងចម្រៀង ដែលត្រៀមខ្លួនរួចជាស្រេចក្នុងការដឹកនាំ Davitra Media ឱ្យឈានទៅក្លាយជាផលិតកម្មឈានមុខនៅកម្ពុជា»។
លើសពីនេះផលិតកម្ម Davtira Media ក៏មានស្ទូឌីយោផ្ទាល់ខ្លួន លាតសន្ធឹងនៅលើផ្ទៃដី ៥ ហិកតា ស្ថិតនៅស្រុកកៀនស្វាយ ខេត្តកណ្តាល ដើម្បីផលិតថតបទចម្រៀង សម្តែង MV ថតកុន និងកម្មវិធីប្រគំតន្រ្តីផ្ទាល់ខ្លួននាពេលអនាគតយ៉ាងខ្លី និងមានគោលដៅសហការជាមួយនឹងបណ្តាផលិតកម្មនៃបណ្តាប្រទេសនានានៅក្នុងតំបន់អាស៊ី ដើម្បីរួមគ្នាផលិតបទចម្រៀង និងការថតខ្សែភាពយន្តផងដែរ សម្រាប់ការជួយអភិវឌ្ឍវិស័យសិល្បៈកម្ពុជា៕
