ក្រុងវ៉ាស៊ីនតោន៖ ខណៈអ្នកក្រុងវ៉ាស៊ីនតោនត្រូវសម្ងំក្នុងផ្ទះអំឡុងពេលផ្ទុះវីរុសកូរ៉ូណា កាលពីចុងសប្ដាហ៍ ផ្កាសាគូរ៉ាដ៏ស្រស់ស្អាតប្រចាំក្រុងបានរីកស្គុសស្គាយហាក់បីដូចជាសាកល្បងចិត្ដ ចំពោះភាពអត់ធ្មត់របស់អ្នកព្យាយាមនៅផ្ទះ កាត់ផ្ដាច់ទំនាក់ទំនងសង្គម។
រដូវផ្ការីកបើកស្វាគមន៍មនុស្សម្នាជាច្រើន ស្របពេលទីកម្សាន្ដដទៃទៀតត្រូវបានបិទទ្វារក្នុងទីក្រុង ដែលស្ថិតនៅជាស្នូលនៃភាពទាក់ទាញមហាជន។ ចំណោមទីឋានជាច្រើនក្នុងតំបន់ មានសារមន្ទីរ US Capitol និង Smithsonian ដែលបច្ចុប្បន្នបានបិទទ្វារ ព្រមទាំងវិមានរំឭកដល់អតីតប្រធានាធិបតី ដូចជា Washington Monument ក៏ត្រូវបានបិទទ្វារ។
កាលពីថ្ងៃសុក្រ ដើមសាគូរ៉ាដែលដុះត្រសងនៅឧទ្យានផ្កា Tidal Basin ក្នុងទីក្រុងជាវេលាដែលទូទៅវាទាក់ទាញទេសចរប្រមាណ ១,៥ លាននាក់ មកទីបណ្ដារដ្ឋផ្សេងៗ។
ដោយវិស័យទេសចរណ៍កំពុងតែដាំក្បាលចុះ ការបំផ្លាស់ទីរបស់ពលរដ្ឋក្នុងសកលលោកត្រូវបានផ្អាក រួមទាំងការបញ្ជាឲ្យសម្ងំនៅតែក្នុងផ្ទះចាប់ផ្ដើមចូលជាធរមានតាមបណ្ដារដ្ឋនានានៅសហរដ្ឋអាមេរិក។
ក្នុងការប្រកាសអាសន្នទូទាំងពិភពលោកបានបង្កើតនូវប្រភេទអ្នកដំណើរថ្មី អ្នកសម្ងំខ្លួនក្នុងផ្ទះបានរំលេចនូវបរិយាកាសខ្យល់ស្រស់ស្រាយ។ ដូច្នេះ កាលពីចុងសប្ដាហ៍ សេវាកម្មឧទ្យានជាតិបានទទូចឲ្យអ្នកដែលចង់ធ្វើដំណើរទៅមើលបុប្ផាសាគូរ៉ារីក គិតគូរឡើងវិញ ខណៈខ្លួនបានប្រកាសពីការគ្រប់គ្រងចរាចរណ៍ និងបិទឧទ្យានក្នុងបំណងទប់ស្កាត់ហ្វូងមនុស្សច្រើន។
អ្នកស្រី ម៉ារី ម៉ាកហ្គ្រីវី មកពីទីក្រុងក្បែរខាង Alexandria រដ្ឋ Virginia ដើរជុំវិញបរិវេណឧទ្យាន Tidal Basin ជាមួយកូនស្រី ២ នាក់ បានឲ្យដឹងថា ការចេញក្រៅលើកនេះ គឺជារឿងដ៏កម្របំផុតសម្រាប់អ្នកស្រី។
ស្ដ្រីអេក្វាទ័រ អាយុ ៤៣ ឆ្នាំរូបនេះ បានប្រាប់ AFP ថា អ្នកស្រីមិនភ័យខ្លាចខ្លាំងពេកនោះទេ តែក៏កត់សម្គាល់ថា៖ «ខណៈមនុស្សម្នាដើរកាត់ យើងដឹងច្បាស់ថា វាប្រាកដជាមិនមានគម្លាតពីគ្នាជិត ២ ម៉ែត្រនោះទេ»។
អ្នកស្រី ជូលី ហ្វីសឈ័រ ជាសាស្ដ្រាចារ្យអតិសុខុមជីវសាស្ដ្រ មកពីសាកលវិទ្យាល័យ ជេអូហ្គេថោន បាននិយាយថា៖ «ខ្ញុំគិតថា មនុស្សគ្រប់រូបមានអារម្មណ៍ថា អត់មានជញ្ជាំងដែលយើងភ្លេចខ្លួនក្នុងការគិតគូរពីហានិភ័យប្រឈមរៀងៗខ្លួន»។
អ្នកស្រីបានកត់សម្គាល់ថា៖ «បើយើងចេញក្រៅផ្ទះដែលមានមនុស្សច្រើន អ៊ីចឹងយើងប្រាកដជាជួបហានិភ័យដោយសារតែនៅក្បែរអ្នកដទៃ ដែលអាចមានផ្ទុកវីរុសកូរ៉ូណាដោយមិនដឹងខ្លួន»៕ AFP/HR